III PREMIO NACIONAL DE DINAMIZACIÓN E INNOVACIÓN DA BIBLIOTECA

O MINISTERIO DE EDUCACIÓN ven de concedernos o III Premio Nacional de boas prácticas docentes para a dinamización da biblioteca escolar. Unha vez máis a labor da comunidade educativa do CEIP A PEDRA recibe un recoñecemento á súa labor en prol da educación integral do seu alumnado.  A dotación económica é de 7000€

OBXECTIVOS

O obxectivos do Proxecto da Biblioteca enmárcanse na liña de actuación que dende hai 4 anos diríxense á mellora permanente do servizo bibliotecario do centro e á súa consideración por parte da comunidade educativa como un centro de recursos multimedia para a formación e o lecer e, ao mesmo tempo, como axente dinamizador da vida cultural e pedagóxica do centro..
Non supón, xa que logo, un comezo senón a continuidade dun proxecto xa en marcha pero que evidentemente, este curso recibiu un enorme impulso, sobre todo no concernente a infraestructuras e equipamentos sao lograr entrar no Plan de Mellora de Bibliotecas Escolares.

O noso proxecto está feito para que a biblioteca se converta en:

1.-Un lugar de encontro e de recursos para as persoas e sectores da contorna relacionados coa nosa comunidade educativa.
2.- Un recurso e un axente para a normalización lingüística do centro.
3.- Enriquecedora da nosa cultura de tradición oral.
4.- Posibilitado o acceso a diferentes tipos de información e nunha ampla gama de soportes.
5.- Dinamizadora das actividades culturais e pedagóxicas do centro, participando activamente na elaboración dos documentos programáticos do mesmo.

E con iso poder conseguir os seguintes obxectivos:

1.- Posibilitar o cambio cara unha metodoloxía que aposte polo constructivismo, o aprendizaxe significativo, o sentido crítico, a autonomía e en definitiva polo principio de aprender a aprender.

2.- Promover a lectura entre os nosos alumnos e alumnas, ofrecendo unha contorna agradable que invite a ler, ao encontro cos libros e ao uso da biblioteca así como calquera outro servizo de información.

3.- Facer partícipe a todo o profesorado e á comunidade educativa sobre a importancia e o papel que debe desempeñar a biblioteca escolar mediante cursos (PFAC) charlas, campañas.

4.- Elaborar materiais que desde a biblioteca axuden ao desenvolvemento dos contidos das distintas áreas curriculares.

5.- Formar un grupo de persoal voluntario entre o alumnado que colabore co funcionamento da biblioteca.

6.- Enriquecer a nosa biblioteca coa colaboración con outras bibliotecas escolares e públicas , por unha banda mediante proxectos conxuntos e por outra propiciando a creación dun marco xurídico por parte da Administración educativa que dote de entidade legal ás actuacións e formas de organización das nosas biblioteca.