Sumario del Diario Oficial de Galicia

Diario Oficial de Galicia

venres, 2 de marzo de 2007

III. OUTRAS DISPOSICIÓNS

Número do Dog:

Páxina do Dog:

3.158

Data da Disposición:

23 de febreiro de 2007

Sección:

III. OUTRAS DISPOSICIÓNS

Organismo:

CONSELLERÍA DE EDUCACIÓN E ORDENACIÓN UNIVERSITARIA

Rango:

Orde

Título:

Orde do 23 de febreiro de 2007 pola que se establecen as bases que rexen as axudas ao alumnado de niveis non universitarios para a adquisición dun ordenador persoal durante o ano 2007 e se procede á convocatoria.

O Estatuto de autonomía de Galicia, no artigo 31, establece a competencia plena para o regulamento e administración do ensino en toda a súa extensión, niveis e graos, modalidades e especialidades, no ámbito das súas competencias e sen prexuízo do disposto no artigo 27 da Constitución e nas leis orgánicas que o desenvolven.

A Consellería de Educación e Ordenación Universitaria, como órgano da Administración autonómica responsable do exercicio das competencias e funcións en materia de políticas educativas, debe potenciar as novas tecnoloxías da información e comunicación co obxectivo de contribuír á creación de mellores condicións para o desenvolvemento económico, social e cultural, e á mellora da calidade de vida dos cidadáns.

Para facilitar o uso das novas tecnoloxías a aqueles colectivos que teñan menor posibilidade de acceso a elas a Consellería de Educación e Ordenación Universitaria fixo públicas durante o ano 2006 dúas convocatorias que tiveron como finalidade proporcionarlles axudas aos alumnos de niveis non universitarios para a adquisición de equipamentos informáticos co obxecto de incrementar o número de fogares na comunidade autónoma que dispoñen de equipamento informático adecuado.

Tendo en conta o volume da actividade administrativa que deriva das competencias que ten atribuídas a Consellería de Educación e Ordenación Universitaria na tramitación destas axudas e coa finalidade de acadar unha maior axilización no trámite e resolución delas, aconsellan delegar no titular da Dirección Xeral de Formación Profesional e Ensinanzas Especiais determinadas competencias legalmente atribuídas á conselleira, todo iso en beneficio tanto da Administración como dos administrados.

Esta nova convocatoria axústase ao disposto no artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia e ao Decreto 287/2000, do 21 de novembro, que o desenvolve e, en concreto, no relativo aos principios de obxectividade, concorrencia e publicidade na concesión das axudas e subvencións, así como ás normas básicas da Lei 38/2003, do 17 de novembro, xeral de subvencións.

Por todo isto,
DISPOÑO:
Artigo 1º.-Obxecto.
Esta disposición ten por obxecto establecer as bases para regular a concesión de 10.000 axudas, en réxime de concorrencia competitiva, ao alumnado de niveis non universitarios que adquiran un ordenador persoal no ano 2007.

Artigo 2º.-Orzamento.
A Consellería de Educación e Ordenación Universitaria financiará as anteditas axudas con cargo á partida orzamentaria 09.03.423B.780.0 dos orzamentos xerais da Comunidade Autónoma de Galicia para o ano 2007, cun total orzamentario de 3.000.000 A.

Artigo 3º.-Destinatarios.
Poderán solicitar as axudas os pais, nais ou titores legais do alumnado que reúna os seguintes requisitos:

a) Estar matriculado/a no ano escolar 2006-2007 nun centro educativo sostido con fondos públicos da Comunidade Autónoma de Galicia en calquera dos cursos de educación primaria e secundaria obrigatoria, ou equivalentes no caso do alumnado con necesidades educativas específicas.

b) Adquirir ou ter adquirido un ordenador persoal de primeira man, de sobremesa ou portátil, no período comprendido entre o 1 de xaneiro e o 20 de setembro de 2007. O ordenador persoal de sobremesa estará composto, como mínimo, pola CPU, un teclado, un rato e unha pantalla.

c) Ser o único membro da unidade familiar para o que se solicita a axuda.
d) Non ter recibido esta axuda a unidade familiar en anteriores convocatorias.
Artigo 4º.-Solicitudes e documentación.
1. Os que desexen optar á axuda deberán completar, on-line, a solicitude e anexos que como formulario electrónico se atoparán na páxina web: http://www.edu.xunta.es/axudasord ou ben presentar os anexos desta orde debidamente cubertos. Posteriormente, e sempre antes de que remate o prazo establecido no punto 2 deste artigo, presentarán esa mesma solicitude impresa e anexos, debidamente asinados, no rexistro da Consellería de Educación e Ordenación Universitaria (edificio administrativo San Caetano, s/n, código postal 15781, en Santiago de Compostela), ou ben por calquera dos medios previstos para a presentación de instancias no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro. Se a solicitude se remite por correo, presentarase en sobre aberto para que sexa datada e selada polo funcionario de correos antes de proceder á súa certificación.

De acordo co establecido no artigo 71 da citada Lei 30/1992, do 26 de novembro, naquelas solicitudes que non se acheguen os requisitos sinalados, requirirase o interesado para que nun prazo de dez días hábiles emende as faltas ou presente os documentos preceptivos; de non facelo, considerarase que desistiu da súa petición e arquivarase o expediente, nos termos previstos no precitado artigo.

2. O prazo de presentación de solicitudes será dun mes contado a partir do día seguinte ao da publicación desta orde no Diario Oficial de Galicia.

3. Para os efectos do disposto na disposición adicional do Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006, os solicitantes deberán consentir expresamente á Administración concedente a incluír e facer públicos, nos rexistros regulados no citado decreto, os datos relevantes referidos ás axudas recibidas.

A reserva que o peticionario poida facer no sentido de non autorizar a obtención de datos ou a publicidade dos datos nos rexistros, que en todo caso terá que expresar, poderá dar lugar á exclusión do proceso de participación para obter a axuda ou subvención ou, noutro caso, á revogación do acto de outorgamento e, se procede, ao reintegro do importe concedido.

4. Ás solicitudes achegarase a seguinte documentación:
a) Copia do DNI do solicitante (pai, nai u titor legal) ou, se é o caso, do NIE (número de identidade de estranxeiro).

b) Fotocopia compulsada do libro de familia no que figuren todos os membros da unidade familiar (pai, nai, fillos menores de dezaoito anos e fillos de dezaoito ou máis anos con algunha minusvalía).

No caso de non ter libro de familia terá que presentarse un documento ou documentos que acrediten os membros da unidade familiar. No suposto de non convivencia de ambos os proxenitores deberase acreditar que o solicitante convive cos fillos (certificado de convivencia do concello).

c) Autorización do solicitante e doutros membros da familia cuxos ingresos son computables para coñecer os ingresos totais da unidade familiar, coa finalidade de poder recadar datos de carácter tributario ou económicos que lle fosen legalmente pertinentes á Axencia Estatal de Administración Tributaria relativos ao nivel de renda (IRPF). A autorización cubrirase segundo o modelo que figura no anexo III. Na medida en que, a través deste sistema a Consellería de Educación e Ordenación Universitaria poida dispoñer destas informacións, non se lles exixirá aos interesados a achega individual de certificacións expedidas pola Axencia Estatal de Administración Tributaria, nin a presentación, en orixinal, copia ou certificación, das súas declaracións tributarias.

d) Declaración responsable do solicitante de percibir ou non outro tipo de bolsa ou axuda das administracións públicas ou calquera dos seus organismos, entes ou sociedades públicas, para a adquisición de ordenadores, segundo o modelo do anexo II.

e) Fotocopia compulsada do certificado de minusvalidez no caso de que algún membro da unidade familiar teña esa condición. Na referida certificación deberá constar o grao de minusvalidez, que terá que ser do 33% ou superior.

f) Documento orixinal, facilitado pola entidade bancaria, acreditativo da existencia dunha conta bancaria aberta a nome do solicitante (pai, nai ou titor legal), en que conste o código da conta do cliente comprensivo dos códigos que identifican o banco ou caixa, a oficina, o díxito de control e o número de conta.

Os que presentasen na convocatoria anterior os documentos correspondentes ás alíneas a), b), e) e f) e non resultasen beneficiarios da axuda estarán exentos de presentalos sempre que o fagan constar por escrito no momento de realizar a solicitude.

Artigo 5º.-Criterio de valoración.
1. O criterio de valoración que se terá en conta para conceder estas axudas será o do nivel de ingresos da unidade familiar.

2. Os ingresos determinantes do dereito á axuda virán referidos aos ingresos familiares, que se fixarán en función da contía, en número de veces o salario mínimo interprofesional, corrixida segundo se establece no punto 4 deste artigo, da parte xeral e especial da base impoñible reguladas nos artigos 38 e 39, respectivamente, do Real decreto lexislativo 3/2004, do 5 de marzo, polo que se aproba o texto refundido da Lei de imposto sobre a renda das persoas físicas, correspondente á declaración (ou declaracións) presentada por cada un dos membros da unidade familiar relativa ao período impositivo inmediatamente anterior (con prazo de presentación vencido) á solicitude de axuda. Para tal efecto, atenderase ao importe comprobado pola Administración tributaria. Se o representante legal ou os membros

da unidade familiar do solicitante non presentasen declaración, por non estaren obrigados a iso, a acreditación dos seus ingresos familiares efectuarase mediante a información de carácter tributaria ou económica facilitada pola Administración tributaria, relativa ás mencionadas parte xeral e especial da base reguladas nos artigos 38 e 39, respectivamente, do Real decreto lexislativo 3/2004, do 5 de marzo.

3. Para efectos desta orde, enténdese por ingresos familiares os referidos á unidade familiar tal e como resulta definida polas normas reguladoras do imposto sobre a renda das persoas físicas. As referencias á unidade familiar para efectos de ingresos fanse extensivas ás persoas que non estean integradas en ningunha unidade familiar.

4. Aos ingresos familiares aplicaráselles un coeficiente multiplicativo corrector, en función do número de membros da unidade familiar:


Número de membros da unidade familiar	Coeficiente corrector

1 ou 2	1,00
3	0,97
4	0,93
5	0,88
6 ou máis	0,83

No caso de que algún membro da unidade familiar estea afectado con minusvalidez, nas condicións establecidas na normativa do imposto sobre a renda das persoas físicas, o coeficiente corrector aplicable será o do tramo seguinte ao que lle correspondese sen esta consideración.

5. Todas estas circunstancias valoraranse unicamente no caso de que da documentación que figura no expediente se poida deducir claramente o seu contido, en virtude de certificacións orixinais ou copias compulsadas delas. En caso contrario, non se terán en conta para a adxudicación da contía destas axudas.

Artigo 6º.-Importe das axudas.
1. O importe de cada unha das axudas destinarase a sufragar parte dos gastos derivados da adquisición dun ordenador persoal.

2. Estas axudas son compatibles co aproveitamento de calquera outro tipo de axudas de institucións públicas ou privadas destinadas á adquisición de ordenadores, sen prexuízo do establecido na alínea d) do artigo terceiro.

3. O importe da axuda será de 300 A. En ningún caso o importe da axuda será tal que, illada ou en concorrencia con outras axudas ou subvencións doutras administracións ou entes públicos ou privados, nacionais ou internacionais, supere o custo total do ordenador.

Artigo 7º.-Comisión de avaliación.
A selección dos beneficiarios será realizada por unha comisión de avaliación integrada por:

-O subdirector xeral de Ensinanzas Especiais e Formación Permanente, que actuará de presidente.

-O xefe do Servizo de Ensinanzas de Réxime Especial.
-O xefe do Servizo de Xestión Económica e Educación de Adultos.
-Un representante da Subdirección Xeral de Sistemas Informáticos.
Actuará como secretario un funcionario da Dirección Xeral de Formación Profesional e Ensinanzas Especiais.

A comisión poderá dispoñer a constitución dunha subcomisión técnica só para os efectos de colaborar na valoración dos documentos achegados segundo o previsto no punto 4 do artigo cuarto. Os membros da comisión poderán percibir axudas de custo por asistencias e axudas para gastos de locomoción por concorrer ás sesións conforme o Decreto 144/2001, do 7 de xuño (DOG do 25 de xuño).

Artigo 8º.-Tramitación e resolución.
1. Unha vez valoradas as solicitudes conforme aos criterios fixados no artigo 5º desta orde, a comisión de avaliación publicará unha listaxe provisional de todos os solicitantes coa indicación de se se lles concede a axuda, se están na lista de espera ou se a solicitude está descartada coa indicación de cal é o motivo. Esta listaxe publicarase no mesmo día na páxina web: http://www.edu.xunta.es/axudasord, no taboleiro de anuncios da Consellería de Educación e Ordenación Universitaria, na Consellería de Presidencia (Oficina de Atención ao Cidadán), e nas delegacións provinciais da Consellería de Educación e Ordenación Universitaria. Abrirase un prazo de dez días naturais contados a partir do día seguinte ao da súa publicación para a presentación de reclamación por parte dos solicitantes.

2. Rematado o prazo, a comisión de avaliación resolveraas e elevará un informe-proposta de adxudicatarios e unha lista de reserva ao director xeral de Formación Profesional e Ensinanzas Especiais, que resolverá por delegación da conselleira de Educación e Ordenación Universitaria.

3. A resolución da solicitude de subvención será publicada no mesmo día na páxina web: http://www.edu.xunta.es/axudasord, no taboleiro de anuncios da Consellería de Educación e Ordenación Universitaria, na Consellería de Presidencia (Oficina de Atención ao Cidadán), e nas delegacións provinciais da Consellería de Educación e Ordenación Universitaria, no prazo máximo de seis meses, contados desde o día seguinte ao da publicación desta orde no Diario Oficial de Galicia. Transcorrido este prazo sen que se dite resolución expresa, deberá entenderse desestimada a petición correspondente. Esta resolución esgota a vía administrativa e contra ela poderá interpoñerse o recurso potestativo de reposición ante o mesmo órgano que resolveu, no prazo dun mes, na forma e condicións que determina a Lei 30/1992, do 26 de novembro, de réxime xurídico das administracións públicas e do procedemento administrativo común, ou ser impugnadas directamente perante a xurisdición contencioso-administrativa, no prazo de dous meses contados a partir do día seguinte ao da notificación da resolución, de conformidade co disposto na Lei 29/1998,

do 13 de xullo, reguladora da xurisdición contencioso-administrativa.
Artigo 9º.-Pagamento.
Unha vez concedida a subvención e notificada a resolución, e logo da previa presentación do xustificante de ter adquirido o ordenador persoal e da declaración a que se refire o punto 3 do artigo 10º desta orde, a Dirección Xeral de Formación Profesional e Ensinanzas Especiais efectuará a correspondente proposta de pagamento.

Artigo 10º.-Xustificación da axuda.
1. O período para xustificar estas axudas abranguerá ata o 5 de outubro de 2007, inclusive.

2. Os beneficiarios deberán xustificar a adquisición do ordenador persoal a través de factura orixinal ou fotocopia compulsada dela, que deberá estar a nome do solicitante ou do beneficiario. Na factura deberán figurar con detalle as características do ordenador adquirido.

3. Presentar, no momento da xustificación da axuda concedida e, en calquera caso, antes do pagamento, unha declaración complementaria do conxunto das axudas solicitadas para a adquisición de ordenadores, tanto das aprobadas ou concedidas como das pendentes de resolución, das administracións públicas competentes ou calquera dos seus organismos, entes ou sociedades; segundo o modelo do anexo II.

Artigo 11º.-Obrigas do beneficiario.
1. Xustificar os gastos da adquisición do ordenador persoal tal e como se establece no artigo 10º desta orde.

2. Comprometerse a manter o ordenador adquirido para a finalidade obxecto desta orde durante un período mínimo de catro anos.

3. Estar sometido ás actuacións de comprobación que efectuará a Dirección Xeral de Formación Profesional e Ensinanzas Especiais, e ás de control financeiro que corresponden á Intervención Xeral da Comunidade Autónoma en relación coa axuda concedida, e ás previstas na lexislación do Tribunal de Contas e do Consello de Contas.

Artigo 12º.-Reintegro ou modificación da subvención.
1. Procederá o reintegro nos termos e supostos previstos nos artigos 19 e 20 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, nos casos seguintes:

a) Incumprimento da obriga de xustificación.
b) Obtención da subvención sen reunir os requisitos exixidos para a súa concesión.

c) Incumprimento da finalidade para a que foi concedida a subvención.
d) Incumprimento das condicións impostas aos beneficiarios con motivo da concesión da axuda ou subvención pública.

2. Toda alteración das condicións tidas en conta para a concesión da subvención e, en todo caso, a obtención doutras subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución da axuda.

Artigo 13º.-Renuncias.
Se por calquera circunstancia o beneficiario non puidese adquirir o ordenador persoal, deberá presentar antes do 5 de outubro de 2007 unha renuncia á subvención concedida.

Os destinatarios das axudas que renuncien a ela serán substituídos pola Dirección Xeral de Formación Profesional e Ensinanzas Especiais de acordo coa lista de reserva.

Disposicións adicionais
Primeira.-Delégase a competencia da conselleira de Educación e Ordenación Universitaria no director xeral de Formación Profesional e Ensinanzas Especiais para resolver a concesión, denegación, modificación ou outras incidencias das axudas previstas nesta orde, así como a resolución dos recursos de reposición.

Segunda.-En todo caso, a concesión das axudas terá como límite a cantidade consignada na correspondente aplicación orzamentaria para o ano 2007.

Terceira.-Os beneficiarios destas axudas quedan suxeitos ao réxime de infraccións e sancións previstas para esta materia no texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, no disposto no Decreto 287/2000, do 21 de novembro, e demais normas de procedente aplicación.

Disposición derradeiras
Primeira.-Facúltase o titular da Dirección Xeral de Formación Profesional e Ensinanzas Especiais para adoptar os actos e medidas necesarias para a aplicación desta orde.

Segunda.-Esta orde adáptase ás normas básicas aplicables do texto articulado da Lei 38/2003, do 17 de novembro, xeral de subvencións, e ás do seu desenvolvemento; élle igualmente de aplicación o Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia. O Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia será de aplicación en todo aquilo que non se opoña aos preceptos legais citados.

Terceira.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 23 de febreiro de 2007.
Laura Sánchez Piñón
Conselleira de Educación e Ordenación
Universitaria

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es