Actividades nas aulas: Cada grupo de alumnos e alumnas elaborou unha ilustración cun lema sobre este día e o seu significado. Con tódolos carteis realizouse un gran mural. O 8 de marzo o alumnado baixou cos seus respectivos titores e titoras para comentar e analiza-los traballos realizados por tódolos compañeiros e compañeiras.

O Día da Muller Traballadora é unha conmemoración declarada polas Nacións Unidas no 1978, pero que ten a súa orixe nuns desgraciados feitos ocurridos no ano 1908.

A comezos do século XX moitas mulleres incorpóranse ó traballo nas fábricas nunhas condicións moi duras. Esta situación fixo que se organizaran para reivindicar melloras laborais. Un encerro organizado polas traballadoras dunha fábrica téxtil en Nova Iork o 8 de marzo de 1908, rematou coa morte de 129 traballadoras, cando os donos incendiaron a fábrica para facelas saír.

A cor lila coa que se identifica esta data ten que ver coa cor do tecido que estaban a facer ditas mulleres o día no que morreron.

Cada 8 de marzo é unha reflexión sobre este longo camiño que as mulleres tiveron que percorrer para ser recoñecidos os seus dereitos: pasaron 70 anos dende o día destes desgraciados feitos ata a declaración da ONU. O que se reivindica é a igualdade entre os dous sexos, non só na redacción das leis senón na aplicación das mesmas e os seus resultados. Todo isto aínda debe ser reivindicado, pois o obxectivo final da igualdade aínda non se conseguiu.