Unha das primeiras tarefas realizadas neste curso  dende o Departamento de Orientación, foron entrevistas individuais  cos pais, nais ou titores do noso alumnado. Resultaron moi proveitosas para sacar temas estrictamente académicos e outros moi parellos e ligados aos estudos. O noso orientador puido constatar como gran parte dos nenos e nenas  almorzaban moi pouco ou incluso non querían tomar nada sólido polas mañás.
    O orientador comezou a traballar neste aspecto e organizou actividades encamiñadas a concienciar ao alumnado e as familias de que o almorzo é unha das máis importantes comidas do día. Pediu asesoramento e conseguiu organizar unha charla, impartida no Centro por unha pediatra e unha enfermeira do Centro de Saúde de Boiro, e aberta ao público en xeral. Neste orde de actuacións, e apoiado en todo momento polo Claustro, puxo en marcha a campaña "Os almorzos saudables". Contouse coa colaboración de compañías e comercios da zona, que nos proporcionaron produtos e vales de compra. Durante tres días consecutivos, por ciclos,  o alumnado almorzou no colexio. Temos que dar as grazas aos pais e nais que nos axudaron coa súa colaboración.
   A experiencia resultou moi interesante para o alumnado, chegando a probar produtos como o aceite de oliva con pan, que para a gran maioría non formaba parte da súa dieta nos almorzos.