Lucía está
sentada na súa habitación. Parece preocupada. Xa leva un
tempo estraña pero agora é distinto. A regra tiña
que virlle fai unha semana e non aparece. Hai cousa dun
mes tivo a súa primeira relación sexual completa. Sinte
bombear o sangue nas veas da cabeza. A simple
posibilidade de estar embarazada tena bloqueada. Son as
cinco da tarde dun día gris de novembro, fóra chove e
fai frío; na radio, como se fose unha premonición, sona
unha canción de Sergio Dalma...(“Ave lucía, el
predictor se pinta de rosa en tu cuarto de baño, y te
dice que vas a ser madre a finales de mayo...). Un
calafrío percórrelle o corpo e rompe a chorar. Non pode
aceptar a posibilidade de ter un fillo agora, con 16
anos; agora non, e menos este... o colexio, os seus
pais, a viaxe a Londres do verán, Deus...decide chamar a
Uxía, a súa mellor amiga, a ver se a ela se lle ocorre
algo. Lucía non pode pensar, se segue así vai estoupar.
E esa maldita canción non se que quita da
cabeza...(tu novio de noches secretas se ha vuelto
enemigo, hace unos días, vaya ironía...) Se aínda
fose dun noivo, de
Carlos...
Os próximos días non van
ser fáciles de esquecer para Lucía e os seus amigos.
Nesta webquest que conta a súa historia, trátase de que
elixas personaxe, te metas na súa pel e reproduzas as
súas experiencias. De paso terás que poñer en práctica
as túas dotes de investigador, non só para obter a maior
cantidade de información posíbel sobre un tema que che
convén coñecer como é o mundo da sexualidade e
afectividade, senón que terás que descubrir o gran
segredo que atormenta a
Lucía...