A Escola de Educación Infantil A Marisma é un centro de ensino público que está situado no que antigamente foi unha marisma en Redondela, de aí o seu nome.

Leva 26 anos en funcionamento, ao longo dos cales sufríu varias transformacións:

- Pasou de ter 5 aulas con 5 mestres a ter 9 aulas e 13 mestres. Destes, dous son especialistas en Audición e Linguaxe e Inglés; e dous son mestres de apoio que imparten Psicomotricidade e un obradoiro de Animación á Lectura.

- O edificio tamén experimentou cambios, aumentando o espazo que se converteu en aula de psicomotricidade, aula de A.L., dirección, dous novos aseos, o almacén e o patio cuberto.

- Tamén se integraron alumn@s de distintas procedencias, debido ao incremento da inmigración e adopcións doutros países.

- No plano didáctico foi onde máis cambios se produxeron, pasando, por exemplo, de facer fotocopias manuais a ter un ordenador por aula.

No ano 2006 esta escola cumpriu 25 anos de funcionamento. Neste aniversario participaron distintos membros da comunidade que dalgún xeito estiveron relacionados co centro e realizáronse diversas actividades.

Na nosa escola intentamos, entre outros obxectivos, que tódolos nen@s se integren nela e coñezan a súa realidade social e cultural.

A fin deste sitio web é crear unha nova forma de colaboración e achegamento ás familias, respondendo a unha demanda social, así como aportar a información necesaria para que a escola de educación infantil A Marisma sexa coñecida e accesible para todos, tanto para as familias como para o resto da comunidade educativa.