IES Aquis Celenis

O Concello de Caldas de Reis bloquea o acceso de sempre (a través da carballeira) ó Instituto público IES Aquis Celenis e pretende deixar como único acceso ó centro a pista de Mariñoleiras.
O acceso de sempre
Nos 24 anos que ten o Instituto público de Caldas os accesos ó mesmo fixéronse sempre a través da carballeira; nunca se plantexou un acceso alternativo porque a outra vía que chega ata o centro é a pista de Mariñoleiras, que nunca reuniu, nin reúne, os requisitos mínimos para ser considerado un verdadeiro acceso.
 
A corredoira de Mariñoleiras

O camiño que sae do centro cara á pista de Segade non cumpre as condicións mínimas para poder considerarse un acceso alternativo ó Instituto:

  • É unha pista pola que na maior parte dos tramos non poden pasar dous coches asemade.
  • Nas tardes de inverno a saída do centro faise de noite, e a pista non conta con iluminación ningunha.
  • Cando chove a auga empoza certos tramos e oculta os bordos asfaltados, co correspondente perigo para a circulación.
  • Non dispón de beirarrúas que garantan a seguridade dos peóns nin do alumnado que utiliza esta vía para acceder a pé ó centro.
  • O asfaltado é pésimo, habendo multitude de buracos; ademais a escorrentía das choivas do inverno arrastra pedras e terra que se deposita na vía, o que a fai moi perigosa e ás veces impracticable.
  • Na zona alta hai unha curva de 180º na que os coches non poden dar a volta, e deben manobrar sobre o carril contrario para poder saír; ademais esta manobra faise sobre un terraplén sen protección ningunha (calquera erro do condutor/a faría que o coche acabase caendo por un desnivel de moitos metros de altura).
  • Esta curva é impracticable para calquera vehículo que exceda as dimensións dun utilitario; os camións, ambulancias e outro transporte que ten que acceder ó centro non pode en ningún caso facelo por aquí.
  • Un pouco máis arriba volve haber outra curva de 180º que tamén resulta de extremo perigo; para collela hai que invadir o carril contrario, co agravante de que non hai visibilidade ningunha debido ó desnivel; que os coches non colisionen nesta zona débese tan só ó escaso tráfico que polo de agora hai nesta pista.
  • Xa na estrada xeral, tanto o acceso coma a saída cara á pista entrañan un grave risco, aumentado por estar a conexión á saída dunha curva.
O que quere o alcalde

Tras a realización de obras na carballeira e sen ningunha comunicación oficial á dirección do Instituto, o Concello decidiu unilateralmente converter o acceso ó centro nunha vía de sentido único, con entrada pola carballeira e saída pola pista de Mariñoleiras; esta solución considérase provisional mentres non se acondicione a pista de Mariñoleiras, momento no que a prohibición de acceso pola carballeira sería total.

Esta decisión tomouse amparándose en dous pretextos: o perigo que supuña para o alumnado que accede ó centro de primaria Alfonso VII a través da carballeira, e a necesidade de protexer a carballeira mediante a prohibición do aparcamento e a restrición do tráfico.

A pista de Mariñoleiras en imaxes
A nosa proposta

O IES Aquis Celenis propuxo, a través da súa dirección e do Consello Escolar, iniciativas que permitisen acadar unha solución consensuada que non fose en detrimento de ninguén.

En primeiro lugar o centro entende que pode haber un perigo potencial co tráfico en relación ó alumnado do centro de primaria Alfonso VII; é por iso que propón que o acceso ó Instituto se siga facendo pola carballeira (mentres non haxa unha alternativa digna que permita unhas condicións mínimas de seguridade), pero permitindo o paso só naqueles momentos en que o alumnado do centro Alfonso VII non usa a vía.

Por outra banda este centro é sensible á necesidade de protexer a carballeira, tanto do tráfico como doutras agresións que vén sufrindo (Cultura quente, festas e celebracións diversas) pero a solución non pasa por prexudicar de xeito tan ruín ó IES de Caldas. Consideramos que o Concello, antes de impoñer unha medida que marxina gravemente ó único Instituto público, debería garantirlle un acceso digno e non perigoso, co que o problema estaría resolto.

Mentres o Concello non crea as condicións mínimas para garantir un acceso alternativo que sexa digno e seguro, propoñemos que o acceso ó centro se siga facendo pola carballeira, coa restrición de non usar ese acceso no horario en que o alumnado do centro Alfonso VII estea entrando ou saíndo do mesmo.