O Boletín Deportivo nace no Instituto Fermín Bouza Brey, no Departamento de Educación Física, por iniciativa de Pepe Castaño Dios.
  O motivo deste nacemento é que a variada e ampla oferta deportiva do centro: torneos de tenis de mesa, baloncesto feminino e masculino, fútbol sala, fútbol, voleibol, xadrez... requiriría publicar moitos papeis nos taboleiros de anuncios coas correspondentes clasificacións. Así que se decidiu englobar todo nunha publicación conxunta.

  Periodicidade: Nun principio comezou sendo mensual, pero debido as características da redacción: alumnos e profesores coas súas correspondentes vacacións... que non permitían manter ese ritmo, pasou a ser bimensual. Actualmente publicamos dous números cada curso.

  Redacción: Como dicía, está formada por alumnos e profesores de Educación Física, sobre todo os primeiros (fundamentalmente son os alumn@s maiores: os de 5: Administrativo e 2: Bachareis os que se encargan da maior parte do traballo), facendo labores de xornalismo, entrevistas, tecleando nos ordenadores, facendo fotografías, deseñando..., pero tendo en conta que se trata de unha publicación aberta a calquera colaboración.

  Contido: Resultados e clasificacións dos torneos do Instituto, entrevistas con alumnos deportistas do centro, artigos técnicos de deporte e educación física, humor, literatura deportiva, deporte comarcal....

  Tirada: Normalmente sae unha tirada de 300 exemplares, que se reparten, en primeiro lugar, ós protagonistas do número en cuestión e ó equipo de redacción, e, a continuación póñense a venda por un prezo simbólico, para que os interesados as poidan adquirir. Hai que resaltar que nos seus inicios repartíase gratuitamente.

  Trátase dunha experiencia singular, que xa chegou ós 40 números editados, o que resulta moi meritorio dadas as características dos centros escolares.