ENTREVISTAMOS A BRAIS MACEIRAS.

Profesor de acordeón aquí en Melide e membro do grupo de Susana Seivane.

Brais é un rapaz novo que comezou no mundo da música tradicional por casualidade e gustoulle; agora vive diso e transmite os seus coñecementos aos alumnos que agora queremos saber tanto coma el.

- Nome e apelidos: Brais Maceiras Barreiro.

- Lugar de nacemento: A Coruña.

- Data de nacemento: 10-08-78.

P - ¿Cando empezaches no mundo da música tradicional?

R - Foi moi curioso, con doce anos quería entrar no equipo de fútbol de Elviña e meu pai díxome que se quería xogar ó fútbol, tiña que toca-la gaita. Así comecei.

P - ¿E co acordeón?

R - O meu profesor de gaita, Bieito Romero, tocaba o acordeón e a min comezou a gustarme. Un día cheguei á casa e tiña o acordeón enriba da mesa; e dende aquelas...

P - ¿Canto tempo hai diso?

R – Pois haberá xa catro anos.

P - ¿Bieito Romero foi o teu único profesor?

R – Non, tamén me ensinou o asturiano Xoán Expósito.

P - ¿Cando coñeciches a Susana Seivane?

R – Coñecina nunha banda que formou Bieito; alí tocabamos os dous e comezamos a tocar xuntos nalgún grupiño.

P - ¿Como comezaches a tocar con ela en serio?

R – Cando lle chegou a oportunidade de gravar un disco díxome “ti vés co acordeón”, e fun.

P - ¿Tocas nalgún grupo máis?

R – En serio non, gústame a carallada e a festa e, entón, apúntome a todas.

P – A túa opinión de Susana Seivane.

R - ¡¡Uf!! Está como unha cabra, pero é moi boa tía. Lévome moi ben con ela.

P - ¿E de Cristina Pato?

R - ...; tamén está algo tola, pero non me gusta o seu estilo. Musicalmente non é mala, pero non estou de acordo coa súa forma de actuar, coa posta en escenario.

P - ¿E de Manuel Varelita?

R – A ese coñecino un día de borracheira. Presentáronnos uns amigos comúns ¡Tiña uns pelos...! E dende aquela quedamos de cando en vez e agora levámonos moi ben.

P - ¿Que pensas de Melide?

R - ¡Sáese! Sobre todo polas noites, as “juergas” son incribles, axuda moito a xente.

P - ¿Que tal ves a relación actual entre xuventude e música tradicional?

R – Mellorou moito nos últimos anos. Hai moita xente nova que comeza coa gaita e iso axuda moito.

P - ¿Que opinas das “gaitas marciais”?

R – Sen comentarios, mellor ver e calar, non quero darlles publicidade.

P – A pregunta do millón ¿Que tal o panorama actual da música galega?

R – Impresionante, estamos no mellor momento da historia. Hai moitos grupos e moito nivel. A ver se continúa así.

P - ¿Pódese vivir da música?

R – Poder, pódese. Pero non se pode se queres vivir ben. A min polo de agora non me vai mal, pero todo depende de que siga habendo concertos e alumnos.

P - ¿Cando comezaches a dar clases?

R – Con quince anos.

P - ¿De que?

R – D e gaita e acordeón.

P - ¿Cantos días á semana?

R – Luns, martes, mércores, xoves e sábados.

P - ¿Cantas horas ensaias ó día?

R – Coa gaita, ultimamente nada e co acordeón pouco. Pero cando me poño non poño límite, o que me apeteza.

P - ¿Segues a prepararte?

R - Si, estou en 6º no Conservatorio de Carballo e estou a sacar FÍSICA DE C.O.U. (todo sobresalientes, por agora).

Isto é o que deu de si o noso faladoiro con Brais.

Polo que podedes ver é unha persoa activa, extrovertida e, ás veces, bastante coherente ¡A tomar exemplo!

Un saúdo dos teus alumnos:

Pikika.

Toño Bande Vázquez.