Páxina seguinte

UNHA NOVA PROMESA DA LITERATURA GALEGA CON RAÍCES NA TERRA DE MELIDE

Inma López Silva, natural de Santiago e asidua dos lares melidenses (a súa familia é orixinaria de Santiso), licenciada en Filoloxía galega, con só 24 anos xa publicou unha noveliña, Neve en abril; un libro de relatos, Rosas,corvos e cancións; participou no volume Narradoras, e acaba de agasallarnos coa publicación da súa primeira novela longa, Concubinas.

Concubinas é unha novela na que se recollen todas as formas de amor posibles: amores imposibles, amores frustrados, vinganzas por amor, amor en tempos de guerra, en tempos de paz..., protagonizado polas mulleres da familia Zumálave. Unha novela na que se producen brincos ó pasado, épocas memorables para Carme Sálvora, unha das protagonistas, cando sementaba éxito no Moulin Rouge e cos seus pintorescos amigos intentaba loitar en contra de Hitler e a súa dictadura; e ao presente, onde Inés se lamenta pola súa mala sorte cos homes, xa que cada un que se namora dela acaba morrendo.

Chea de personaxes e anécdotas moi curiosas que se van entrelazando facendo unha novela nada monótona, desenvolvéndose nun escenario mítico chamado San Eirís, onde o párroco é inmortal e cada 18 de xullo o río Furel (non sabemos por qué se chamará así) baixa con auga vermella.

Desde aquí recomendámosvos esta novela na que Inma López fai uso dun moi coidado estilo literario.

Laura Ramos Rúa
Marta Blanco Rodríguez
María García Torreiro
B2A