O regulamento de réxime interno (RRI) diríxese á comunidade escolar e pretende regular o funcionamento interno do IES de Melide baseándose no respecto dos dereitos e liberdades fundamentais dentro dos principios democráticos, e procurando a adquisición de hábitos intelectuais no marco dunha actitude humanística.

Art. 1

Fins

Son fins do presente RRI:

a) Precisar de forma clara os dereitos e deberes dos membros da comunidade escolar e establecer as normas de convivencia no centro.

b) Dotar o centro de marcos de referencia para a súa organización e funcionamento.

c) Estruturar, definir e repartir responsabilidades.

d) Establecer e desenvolver os mecanismos de participación de todos os membros da comunidade educativa.

Art. 2

Principios

1. A comunidade escolar está formada por alumnos/as, profesores/as, pais/nais ou titores/as, persoal non docente, representante do Concello, asociacións do alumnado e asociacións de pais/nais do alumnado.

2. Todos os membros do centro están obrigados a coñecer este regulamento. O seu descoñecemento non exime do seu cumprimento.

3. Correspóndelle ao equipo directivo cumprir e facer cumprir este regulamento. O claustro do profesorado e o consello escolar velarán para que isto suceda.

4. Prohíbense terminantemente os castigos físicos e humillantes, así como calquera manifestación de violencia e coacción física ou moral, as ameazas e os insultos persoais.

5. Todos os membros da comunidade escolar deberán respectar a liberdade de conciencia, as conviccións relixiosas e morais, a dignidade e a intimidade dos demais.

6. Ningún membro da comunidade educativa poderá discriminar aos demais por razón de nacemento, raza, sexo ou por calquera outra circunstancia.

7. Todos os membros da comunidade escolar deberán utilizar as canles establecidas pola normativa vixente e por este Regulamento para solucionar os problemas que se presenten.

8. Queda garantida a liberdade de reunión e expresión dentro das canles establecidas neste RRI.

9. As normas superiores que vertebran este regulamento son o Real Decreto 732/1995 de 5 Maio (BOE do 2 de Xuño de 1995) e o Decreto 324/1996 de 26 de Xullo (DOG do 9 de Agosto de 1996).

Art. 3

Obxectivos

O proceso docente aspira a:

a) O desenvolvemento da capacidade crítica e participativa dos seus protagonistas, como suxeitos activos dunha comunidade implicada na cultura dos valores propios e universais.

b) Respectar os dereitos e deberes baseados na convivencia e nas liberdades.

c) Participar activa e criticamente na vida social e educativa.

d) Educar para a paz, a cooperación e a solidariedade.

e) Respectar e conservar o medio.

2. Órganos de representación

Art. 4

Xeneralidades

Todos os membros da comunidade escolar teñen o dereito a participar no funcionamento do centro tal e como o dispoñan as leis vixentes e o este regulamento. Tal participación desenvolverase, primordialmente, a través dos distintos órganos de representación de cada estamento e centrarase naqueles aspectos que afecten aos distintos colectivos de xeito directo ou ao funcionamento do centro en xeral.

2.1 Consello Escolar

Art. 5

Consello escolar

a) O consello escolar organizarase en comisións que traballarán sobre aspectos específicos da súa competencia. Haberá cando menos as seguintes comisións:

· comisión de convivencia

· comisión económica

· comisión de actividades

b) Na sesión constitutiva asignaranse as funcións de cada comisión.

c) Cada comisión estará presidida por un membro do equipo directivo e haberá algún membro de cada sector representado, agás o persoal non docente e o do Concello, que pertencerán obrigatoriamente á comisión económica.

d) A comisión de convivencia encargarase de velar polo cumprimento e interpretación deste regulamento. Estará integrada polo/a director/a, o/a xefe/a de estudos, dous/dúas profesores/as, dous/dúas alumnos/as e un pai/nai ou titor/a legal. Esta comisión traballará conxuntamente co observatorio de convivencia.

e) O observatorio de convivencia estará constituído polo/a director/a do centro, o/a xefe/a de estudos, o/a orientador/a, catro representantes do profesorado, un representante do alumnado, un representante de pais/nais, un representante do PND, e titores/as, e profesionais da sanidade e servizos sociais que mostrasen a súa disposición.

f) A comisión económica estará composta polo/a director/a, o/a secretario/a, un/unha representante do profesorado, un/unha representante dos pais/nais, un/unha representante do alumnado, o/a representante do Concello e o/a representante do persoal non docente.

g) A comisión de actividades estará formada polo/a director/a, vicedirector/a, un/unha representante do profesorado, un/unha representante dos pais/nais e un/unha representante do alumnado.

Art. 6

Consello escolar

a) A dirección comunicaralles aos representantes e ás asociacións dos distintos estamentos a súa decisión de convocar as reunións ordinarias cunha antelación mínima de cinco días hábiles. A partir desta comunicación os representantes poderán solicitar, durante dous días, a inclusión de temas do seu interese na correspondente orde do día.

b) Antes da celebración de reunións do consello escolar informarase aos colectivos representados da orde do día para posibilitar a contribución de suxestións e informar do sentir xeral dos distintos representantes.

c) Despois de cada reunión de consello escolar realizaranse, se é o caso, reunións dos distintos colectivos representados para informar dos acordos acadados.

d) A dirección moderará as intervencións dos distintos representantes.

e) As votacións realizaranse mediante sufraxio secreto, agás no caso de que, a proposta de calquera dos seus membros, todos os presentes estean de acordo en pronunciarse a man alzada.

f) Os membros do consello escolar deben gardar segredo sobre os asuntos tratados.

g) As reunións do consello escolar realizaranse, preferiblemente, os mércores pola tarde.

2.2 Claustro do Profesorado

Art. 7

Claustro

A dirección comunicaralles aos/ás xefes/as de departamento a decisión de convocar as reunións ordinarias cunha antelación mínima de cinco días hábiles. A partir desta comunicación os xefes/as de departamento poderán solicitar, durante dous días, a inclusión de temas do seu interese na correspondente orde do día.

Art. 8

Claustro

Nas sesións de claustro, as votacións realizaranse mediante sufraxio secreto, agás no caso de que, a proposta de calquera dos seus membros, todos os presentes estean de acordo en pronunciarse a man alzada.

Art. 9

Claustro

Os membros do claustro de profesorado deben gardar segredo sobre os asuntos tratados.

Art. 10

Claustro

As reunións de claustro celebraranse preferentemente os martes pola tarde.

2.3 Equipo Directivo

Art. 11

Equipo directivo

En cada hora lectiva haberá un cargo directivo de garda que será o encargado de resolver as incidencias que se produzan e de atender funcións dos outros membros do equipo directivo que non estean no centro nese momento e que precisen de resolución inmediata.

Art. 12

Equipo directivo

O equipo directivo terá no seu horario dous períodos lectivos consecutivos de reunión semanal para poñer en común as decisións adoptadas e analizar a marcha do curso.

Art. 13

Equipo directivo

O equipo directivo ten a obriga de manter informados aos membros da comunidade escolar de todas as incidencias que se produzan no centro, da marcha das negociacións e contactos con outros chanzos da administración educativa e, en xeral, de todo aquilo que dunha ou doutra maneira teña transcendencia na marcha do centro.

2.4 Órganos de representación do Alumnado

Art. 14

Representación alumnado

A xunta de delegados/as estará formada polos/as delegados/as, subdelegados/as, os/as representantes do alumnado no consello escolar e un representante da asociación de alumnos/as. Terá unha vixencia dun curso escolar.

Art. 15

Xunta delegados

A xunta de delegados/as terá as funcións reguladas polo art. 112 do Decreto 324/96). Entre outras funcións, debe:

a) Ser ponte de comunicación entre os órganos de goberno do centro e o alumnado.

b) Elaborar propostas de modificación do regulamento de réxime interno.

c) Informar aos estudantes das súas actividades.

d) Solicitar a inclusión de puntos na orde do día do consello escolar.

e) Crear un regulamento propio.

Art. 16

Xunta delegados

A xunta de delegados/as constituirase mediante convocatoria efectuada pola xefatura de estudos que deberá producirse nun prazo non superior a dúas semanas despois da elección do último delegado.

A súa organización e funcionamento rexerase polos seguintes principios:

1. Na primeira sesión elixirase por sufraxio secreto e por esta orde, o/a presidente/a, o/a secretario/a, o/a vicepresidente/a e o vicesecretario/a. En caso de empate atenderase aos criterios preferentes de a) maior antigüidade no centro; b) maior idade.

2. Os delegados/as que presenten as súas candidaturas á presidencia e á vicepresidencia disporán de tempo para expoñer as súas ideas programáticas antes da votación.

3. O presidente/a e o secretario/a pertencerán a calquera dos grupos de alumnado do segundo ciclo da ESO, de bacharelato ou dos ciclos formativos. O vicepresidente/a e o vicesecretario/a pertencerán a un dos grupos de alumnado do primeiro ciclo da ESO.

4. A xunta de delegados/as desdobrarase en dúas xuntas de delegados/as paralelas, unha correspondente ao segundo ciclo da ESO, bacharelato e ciclos formativos, e outra correspondente ao primeiro ciclo da ESO. Non obstante, poderá reunirse en pleno tal e como se estipula no epígrafe 8 deste mesmo artigo.

5. A presidencia e a vicepresidencia terán como misión convocar e presidir as reunións e coordinar as actividades das xuntas. Será función da secretaría e da vicesecretaría levantar acta dos acordos tomados en cada reunión.

6. As dúas xuntas reuniranse cando menos unha vez ao trimestre e cando a presidencia -ou a vicepresidencia- ou un tercio dos compoñentes de cada xunta o soliciten. Así mesmo, deberán reunirse antes e despois da celebración dunha reunión do consello escolar, se os temas a tratar na mesma son da súa incumbencia.

7. A xunta de delegados e delegadas poderá nomear para o seu funcionamento distintas comisións que informarán das súas actividades.

8. As reunións da xunta realizaranse fóra das horas de clase, agás cando estas se realicen en plenario da única xunta porque así o demanden os temas a tratar.

9. O alumnado ten o dereito de expresar calquera discrepancia ou suxestión a través dos seus representantes.

10.O equipo directivo ou órganos correspondentes deben argumentar ante calquera reclamación efectuada a través da xunta de delegados/as.

11.O director debe facilitar os locais e o material para as reunións.

12.A xunta de delegados/as pode convocar a asemblea total ou parcial do alumnado do instituto, interrompendo o menos posible o horario de clases.

13.A convocatoria de asemblea comunicaráselle ao director 48 horas antes da súa celebración para que adopte as medidas oportunas.

14.A xunta de delegados/as pode ser convocada polo director ou xefe/a de estudos por motivo xustificado.

15.A xunta de delegados/as colaborará co equipo directivo na difusión e cumprimento das normas de convivencia.

Art. 17

Delegados/as

A elección de delegados/as e subdelegados/as realizarase segundo dispón o art. 111 do Decreto 324/96:

a) Nos 30 primeiros días que se contarán a partir do comezo efectivo de cada curso escolar, cada grupo elixirá un delegado/a e un subdelegado/a en votación universal e secreta entre os compañeiros/as do grupo.

b) Nos días previos á votación o titor/a do grupo exporá, nas sesións de titoría, cales son as funcións dos delegados, promovendo o coñecemento do alumnado entre si e o debate sobre o labor que debe desempeñar o/a delegado/a.

c) A votación será convocada e presidida polo titor/a e dela levantarase acta que se conservará na xefatura de estudos. Neste labor, o titor/a estará asistido por dous membros do grupo elixidos ao chou que actuarán como xecretario/a, o máis novo, e como vogal, o segundo.

d) O alumnado que desexe presentar a súa candidatura a delegado/a poderá expoñer o seu programa antes da votación.

e) Cada membro do alumnado depositará unha papeleta na que faga constar o nome da persoa que desexa que represente o grupo.

f) Resultará elixida a candidatura que obteña a maioría absoluta na primeira votación. De existir un número de candidaturas inferior a tres, procederase á proclamación inmediata como delegado/a e subdelegado/a ao primeiro e segundo alumno/a en maior número de votos obtidos, respectivamente. De existir empate ou non acadar a maioría absoluta ningunha das persoas votadas na primeira votación, deberá realizarse unha segunda volta entre os tres membros do alumnado que tivesen maior número de sufraxios, na que abondará con obter a maioría simple. En caso de empate, atenderase aos seguintes criterios: 1) maior número de votos na primeira volta; 2) maior idade.

Art. 18

Delegados/as

As Funcións e dereitos dos delegados e delegadas son as seguintes:

1. Ostentar a representación dos compañeiros/as de grupo. Por ausencia ou por delegación, son substituídos polos subdelegados/as.

2. Formar parte da xunta de delegados/as, á que teñen a obriga de asistir.

3. Ser os interlocutores entre os alumnos/as e os profesores/as ou órganos de goberno do centro.

4. Poder informar á comisión de convivencia ante calquera conflito.

5. Ser recibidos e escoitados por calquera órgano ou cargo directivo ao que llo soliciten.

6. Canalizar a participación dos alumnos/as nas actividades complementarias e extraescolares.

7. Manter contacto permanente cos representantes dos alumnos/as no consello escolar.

8. Velar para que o alumnado vexa respectados os seus dereitos.

9. Colaborar para que o alumnado cumpra cos seus deberes.

10.Os delegados/as e subdelegados/as non poderán ser sancionados polo exercicio das súas funcións como representantes dos alumnos/as.

Art. 19

Delegados/as

Os cargos de delegado/a e subdelegado/a terán unha vixencia do curso académico no que foron elixidos, agás no caso de que sexan cesados por algún dos seguintes motivos:

a) Por seren sancionados polo consello escolar, por cometeren falta grave ou cando este órgano así o decida a proposta fundamentada da dirección por existir constancia do incumprimento reiterado das funcións que teñen asignadas.

b) Se a maioría absoluta do alumnado dun grupo solicita a substitución do/s seu/s representante/s, en escrito razoado e asinado polos demandantes dirixido á dirección, que estudará a solicitude, e elevaraa ao consello escolar.

c) Os delegados/as ou subdelegados/as poderán presentar a súa dimisión en escrito dirixido á dirección, que deberá oír as razóns alegadas e aceptala no caso de que o representante dimisionario se ratifique na súa decisión. Neste caso procederase a unha nova elección.

Art. 20

Asociacións de alumnado

a) Poderán existir as asociacións de alumnado que, de acordo coa lexislación vixente, se constitúan.

b) Rexeranse por normas democráticas con eleccións periódicas segundo o estipulen os seus estatutos.

c) Os seus representantes serán recibidos por calquera dos órganos de goberno ao que llo soliciten.

d) Poderán nomear un representante nas xuntas de delegados/as.

3 Órganos de Coordinación docente

3.1 Departamentos

Art. 21

Departamentos

Constituiranse os seguintes órganos de coordinación:

1. Departamento de orientación.

2. Departamento de actividades complementarias e extraescolares.

3. Departamentos didácticos.

4. Comisión de coordinación pedagóxica.

5. Coordinación de formación en centros de traballo.

6. Equipo de normalización lingüística.

7. Xuntas de avaliación.

8. Titorías e orientación do alumnado. xunta de titores/as.

9. Equipo docente. Profesorado de nivel.

10. Comisión de avaliación de diagnóstico.

3.2 Comisión de Coordinación Pedagóxica

Art. 22

Comisión coordinación pedagóxica

A comisión de coordinación pedagóxica estará formada polo director/a, xefe/a de estudos, xefes/as de departamento, coordinador/a do equipo de normalización lingüística e profesor/a de apoio.

Todos os membros da comisión de coordinación pedagóxica terán no seu horario unha hora de reunión semanal. Dos acordos tomados na reunión levantarase unha acta que se entregará a cada departamento.

3.3 Titorías e Orientación do alumnado. Xunta de Titores/as

Art. 23

Tutorías e comisión de avaliación diagnóstica

Os titores/as terán as seguintes funcións:

1. Cada grupo de alumnos/as terá un profesor/a titor/a.

2. Os titores deberán reunirse co grupo ao seu cargo cando menos antes de cada sesión de avaliación.

3. Deberán permanecer localizables no centro durante o tempo que figura nos seus horarios como dedicado a atender os pais e nais, mesmo se non está prevista a visita de ningún deles.

4. Xestionarán a entrevista dos pais/nais con outros membros do profesorado do seu grupo cando se lles solicite, sempre que haxa razóns que o aconsellen.

5. Os titores/as deberán colaborar co equipo de orientación e co equipo directivo no desenvolvemento de actividades que teñan como obxectivo o seguimento dos alumnos/as, o diagnóstico de problemas na aprendizaxe e a presentación de accións que tendan a mellorar a súa formación.

6. Colaborarán cos organismos do centro para fomentar hábitos de convivencia e para manter a disciplina entre o alumnado que estea ao seu cargo.

7. Mediarán, en colaboración co delegado do grupo, ante o resto do profesorado, alumnado e órganos directivos.

8. Serán os responsables do control das faltas de asistencia e de expulsións de aula, segundo a información recibida do profesorado do grupo. Informarán, quincenalmente, aos pais/nais dos alumnos/as das faltas de asistencia e reclamarán a comunicación do motivo destas ou o xustificante se é o caso.

9. Cando un alumno/a supere as faltas de asistencia permitidas poñerano en coñecemento do alumno/a, pais/nais, profesorado e equipo directivo.

10.Cando un alumno/a cometa unha falta grave poñerano en coñecemento do alumno/a, pais/nais e equipo directivo.

11.Requirirán a presenza dos pais/nais ante calquera incidencia que o precise.

12.Deberán recoller os boletíns de avaliación, íntegros, durante os 15 días seguintes á súa entrega. Comprobarán se están asinados polos pais/nais e devolveranos ás respectivas familias, arquivando o resgardo de cada un deles.

13.Colaborarán estreitamente co profesor de garda así como co cargo directivo de garda ante calquera problemática relacionada coa súa titoría.

14.Recollerán desde o principio de curso aqueles datos que poidan influír directamente no rendemento do alumno/a, deixando constancia deles para sucesivos titores/as, e poñerano en coñecemento do profesorado que imparte docencia nese grupo.

15.Desenvolverán, durante os períodos lectivos semanais destinados ao labor específico de titoría do alumnado, o plano de acción titorial do centro.

16. Recollerán e valorarán o motivo das faltas de asistencia dos seus titorandos, e xustificarán as que corresponda, segundo o caso.

17. Cubrirán o informe de avaliación final na ESO e recollerán en acta os acordos tomados na avaliación.

3.4 Comisión de coordinación da avaliación de diagnóstico nos centros educativos.

Art. 24

Comisión de coordinación da avaliación de diagnóstico nos centros educativos

1. Nos centros educativos que impartan as ensinanzas referidas no artigo 2.1º, constituirase unha comisión de coordinación da avaliación de diagnóstico, formada polas seguintes persoas:

a) Director ou directora do centro, que a presidirá.

b) Xefe ou xefa de estudos.

c) Xefe ou xefa do departamento de orientación, de ser o caso.

d) Un titor ou titora de cada un dos niveis que se avalían, nomeados pola dirección do centro.

2. A súas funcións serán as seguintes:

a) Informar a comunidade educativa sobre o sentido e a finalidade da avaliación diagnóstica.

b) Coordinar o proceso desta avaliación no centro.

c) Colaborar coa Administración educativa e cos servizos de inspección naqueles aspectos do proceso para a que sexa requirida.

3. Esta comisión constituirase ao comezo de cada curso escolar e a súa composición reflectirase na correspondente programación xeral anual.

4 Funcionamento do centro

4.2 Horarios

Art. 25

Horarios

Confeccionaranse a principios de curso por parte da xefatura de estudos e faranse públicos para a súa aplicación. Deben atender fundamentalmente ás necesidades do alumnado, respectando os dereitos do profesorado. Na súa confección seguiranse cando menos as seguintes pautas:

1. Os alumnos de 1º ciclo da ESO terán dous recreos, o primeiro despois do segundo período lectivo e o segundo despois do cuarto. Os alumnos/as dos demais niveis poderán ter un único recreo, entre o terceiro e cuarto períodos lectivos.

2. O profesorado manifestará as súas preferencias de horario que, dentro do posible, serán atendidas.

3. Durante a primeira semana de curso poderanse realizar cambios entre os horarios de dous ou máis profesores/as, sempre que tales cambios non contraveñan os criterios xerais de confección dos horarios. Estes cambios precisan a autorización da xefatura de estudos.

4. A xefatura de estudos asignaralle a cada membro do claustro do profesorado as horas de garda que lle correspondan, atendendo ás necesidades do centro.

5. A xefatura de estudos poderá asignar titorías específicas e/ou clases específicas de preparación adicional para o alumnado con materias pendentes de ESO, na medida en que as dispoñibilidades de persoal docente asignado ao centro cada curso académico así o permita.

6. Na medida en que a administración educativa o autorice, aplicarase a correspondente redución horaria para aqueles profesores/as que desenvolvan actividades complementarias ou extraescolares en beneficio do alumnado do centro. Esta medida inclúe tamén a todos aqueles profesores/as que cumpran a función de profesores/as titores/as.

4.2 Asistencia e puntualidade do alumnado

Art. 26

Asistencia e puntualidade

A asistencia e puntualidade do alumnado queda regulada polas seguintes normas:

1. A non asistencia ás clases de modo reiterado, pode motivar a imposibilidade dunha aplicación correcta da avaliación continua, establecéndose un sistema extrórdinario de avaliación.

2. Todas as faltas de asistencia e demoras do alumnado deben ser computadas polo profesorado correspondente nas unidades persoais (UP) do sistema de xestión docente utilizado no centro. As UP depositaranse na consola central do sistema de xestión, situada na sala do profesorado, ao remate da xornada docente. O profesorado que exerza labores titoriais consultará no ordenador habilitado para estes efectos as faltas de asistencia e puntualidade así como calquera outra incidencia definida como tal no sistema de xestión e comunicarállelas aos pais/nais/titores/as legais cunha periodicidade quincenal.

3. O alumnado ten a obriga de asistir a todas as actividades que figuran no seu horario e non pode abandonar o recinto escolar sen causa xustificada durante a súa xornada lectiva.

4. En ausencia do profesorado, o alumnado non poderá abandonar as súas aulas, debendo esperar ao profesor de garda ou a algún membro do equipo directivo.

5. Se algún alumno/a ten razóns especiais para chegar reiteradamente tarde a algunha das actividades, debe comunicarllo ao profesor/a titor/a e este á xefatura de estudos e ao profesorado implicado, ademais deberá achegar a correspondente xustificación para que os atrasos non sexan contabilizados.

6. O alumno/a que chegue tarde acudirá á aula respectiva para solicitar a incorporación á clase. No caso de que o permiso lle sexa denegado o/a profesor/a cubrirá o correspondente parte de incidencias e anotará tal incidencia na UP. O/A alumno/a presentarase ao profesor/a de garda para que lle indique onde agardar, e realizará o traballo correspondente, o comezo da clase seguinte.

7. O profesorado deberá permitir que o alumnado que chegue tarde con carácter excepcional poida asistir á clase.

8. A partir do 3º atraso, o profesorado poderá denegarlle ao alumno/a o permiso para entrar na aula despois do comezo da clase. Neste caso, o profesor/a debe informar de tales circunstancias, mediante un parte de incidencias aos titores/as legais , ao titor/a do alumno/a e a xefatura de estudos. Tres atrasos deste tipo computaránselle como unha falta de asistencia inxustificada.

Art. 27

Xustificación de faltas

A xustificación das faltas do alumnado farase tendo en conta os seguintes aspectos:

1. Non son xustificables aquelas ausencias que non constitúan un suposto de forza maior para o alumno/a., e en particular as producidas tendo acudido ao centro

2. A xustificación farase nun formulario facilitado pola xefatura de estudos, localizable na sala de profesorado e na conserxería.

3. Se a ausencia é motivada pola visita a un organismo ou entidade pública ou privada, o alumno/a achegará o documento acreditativo correspondente.

4. En caso de enfermidade non superior a tres días bastará a comunicación do motivo pola persoa que represente ao alumno/a. De ser superior a tres días, requirirase xustificante médico.

5. A comunicación do motivo da ausencia realizarase inmediatamente despois da reincorporación do alumno/a á clase. O prazo para xustificar a ausencia é de 15 días (non ampliables) que se contarán a partir do mesmo día da reincorporación do alumno/a.

6. A xustificación das faltas de asistencia é competencia do titor ou titora. A aceptación ou non dos xustificantes é competencia do titor/a.

7. Os alumnos/as maiores de idade que convivan emancipados asinarán as xustificacións das súas propias faltas. Cando estas sexan de máis de 3 días, a causa destas se reitere ou cando así o aconsellen as circunstancias, o motivo deberá acreditarse documentalmente.

8. O profesor titor informará das faltas dos alumnos/as, aos pais/nais ou titores/as legais cando menos unha vez cada 15 días, e solicitará a súa xustificación.

9. Cando a acumulación de faltas non xustificadas alcance cada un dos topes establecidos para os efectos de correccións ou estea xa perto da perda da avaliación continua, o/a titor/a remitirá ás familias a comunicación correspondente.

A partir deste punto remitirase comunicación de faltas non xustificadas cada vez que se acumule un número destas equivalente ao que corresponda ao 1º tope, ou antes se o titor/a o estima oportuno.

De cada comunicación de este tipo gardarase o oportuno rexistro.

10.O profesorado poderá solicitarlles un xustificante a aqueles/as alumnos/as que non asistan a probas significativas de avaliación. A non aceptación deste por parte do profesor/ora poderá impedir a realización da proba noutra data.

11.Non serán xustificables as faltas de asistencia colectivas debidas ao abandono da aula por parte do alumnado ante a ausencia do profesorado.

Art. 28

Actuacións colectivas que alteren a acitividade académica

Os requisitos que debe reunir unha convocatoria de alumnado que implique a paralización da actividade docente para non ser obxecto de sanción serán os seguintes:

1. Ser unha convocatoria formal feita por un sindicato de estudantes ou representantes recoñecidos legalmente, con 48 horas de antelación e coa debida publicidade. Neste caso a xunta de delegados/as ou Asociación de estudantes comunicarallo formalmente ao director/a.

2. Convocatoria dun paro estudiantil por un problema interno do centro. Deberá comunicárselle á comisión e ao observatorio de convivencia, que apreciará a racionalidade da petición.

O exercicio do dereito do alumnado a manifestar a súa discrepancia respecto a aqueles asuntos que lle afecten pode revestir formas de actuación colectiva que atinxan ao desenvolvemento da actividade académica.

1. Nas 48 horas previas, informarase na aula da mobilización e de quen a convoca, recolleranse as sinaturas dos que a secundan. Pódense solicitar 10 minutos da aula, preferentemente ao titor ou titora. O alumnado que queira secundar a folga recollerá a autorización na conserxaría para que a asinen na casa.

2. Ao día seguinte (24 horas) reunirá a xunta de delegados, na cal cada delegado e delegada informará do número de alumnos do seu grupo que apoia a mobilización. Unha vez acabada a reunión, os delegados entregarán as listaxes na xefatura de estudos (ou na conserxaría) coas autorizacións pertinentes do alumnado. As autorizacións teñen que ser entregadas antes do inicio da folga.

3. A xefatura de estudos entregará aos titores as sinaturas e autorizacións para a xustificación da falta de asistencia. Só se xustificaran as faltas correspondentes a folgas oficiais convocadas por sindicatos oficiais para o alumnado de ensinanzas medias.

Art. 29

Asistencia e puntualidade

As alteracións do horario nas clases de bacharelato e dos ciclos formativos regularanse da seguinte maneira:

1. O cambio de hora, substitución ou supresión das actividades previstas no horario oficial teñen que ser coñecidas pola xefatura de estudos, que poderá dar autorización (se é da súa competencia) cando haxa razóns que as xustifiquen.

2. Na medida do posible, procurarase que o alumnado non teña ocos no seu horario normal e tratarase de que as ausencias do profesorado se cubran con outras clases ou actividades correspondentes a ese mesmo día.

3. A realización de probas, tanto de avaliación normal como de preparación adicional, que alteren o horario oficial do centro contará co beneplácito do profesorado afectado e da xefatura de estudos.

4. A realización de probas fóra do horario normal do alumnado deberá ser debido a razóns fundamentadas e contar co consentimento do propio alumnado, informando á xefatura de estudos.

5. Cando se produzan ocos por unha folga parcial do profesorado, o horario do alumnado non poderá ser alterado.

6. Na realización de probas o alumnado non poderá abandonar a aula antes da hora de saída, agás que se trate da última clase de cada xeira.

O alumnado de bacharelato e dos ciclos formativos poderá non asistir ao centro durante o primeiro período lectivo -ou marchar del, se se trata do último- de cada xeira, cando sexa informado previamente da inasistencia do/a profesor/a ou cando se modificase o seu horario nesa xeira para evitar ocos no mesmo.

7. O alumnado non poderá abandonar o centro unha vez que estea nel, aínda que non teña asistido o profesorado.

4.3 Asistencia e puntualidade do profesorado

Art. 30

Asistencia e puntualidade

A asistencia e puntualidade do profesorado queda regulada polas seguintes normas:

1. Ante a imposibilidade por parte dun profesor/a da asistencia a clase, se é posible, comunicarao á xefatura de estudos con 48 horas de antelación, e realizará a anotación correspondente no libro de gardas para que sexa substituído polo profesor/a de garda. De ser a ausencia motivada por calquera circunstancia ocasional imprevisible, comunicaraa, pola vía máis rápida, ao centro para que poida ser substituído. No caso do alumnado de bacharelato e de ciclos formativos, comunicarállelo tamén aos alumnos/as, se se trata do primeiro ou último período lectivo dunha xeira.

2. As ausencias do profesorado das súas horas lectivas -incluídas as gardas de recreo, biblioteca, dirección e titorías específicas- serán anotadas polo profesorado de garda no libro de gardas. Do mesmo xeito, deberán sinalarse as faltas de puntualidade e/ou o abandono anticipado da actividade docente, especificando o tempo aproximado que o/a profesor/a tardou en incorporarse á súa actividade ou en abandonala anticipadamente.

3. O control de asistencia do profesorado corresponde á xefatura de estudos, agás as ausencias ás reunións de departamento, que lle serán comunicadas a través da xefatura do departamento correspondente.

4. Cando os atrasos do profesorado se produzan de xeito reiterado, a dirección tomará as medidas oportunas e, de persistir, poñerá este feito en coñecemento da Inspección Educativa.

5. O profesorado que deba xustificar algunha ausencia ou solicitar permiso para faltar a algunha actividade debe cubrir un formulario que lle será facilitado pola xefatura de estudos. Cando a xustificación da ausencia precise proba documental, achegará esta ao xustificante. A non presentación da devandita proba documental, en tempo e forma, poderá supoñer a asignación dos motivos da ausencia por un apartado distinto do que se pretendía.

4.4 Entradas e saídas

Art. 31

Entradas e saídas

As entradas e saídas estarán reguladas polas seguintes normas:

1. Realizaranse respectando as normas de convivencia.

2. No 1º toque de timbre os/as alumnos/as deben entrar nas aulas de forma que cando soe o 2º timbre os alumnos/as estean dispostos para empezar a clase xunto co profesor/a correspondente.

3. As entradas e saídas deben ser controladas polo profesor/a de garda coa colaboración dos demais profesores e o cargo directivo de garda.

4. Durante o tempo de recreo, o alumnado non poderá volver ás aulas, corredores e escaleiras até a súa finalización, agás casos excepcionais e contando coa autorización dalgún dos profesores/as de garda.

5. Cando un alumno/a deba permanecer na aula durante o tempo de recreo por indicación dun profesor/a, terá que estar acompañado por este. Excepcionalmente, e durante períodos concretos, o cargo directivo de garda poderá autorizar a permanencia de parte do alumnado na súa aula de referencia durante o recreo para realizar tarefas puntuais e/ou repasar os contidos dunha materia que será obxecto dunha proba escrita no mesmo día.

6. Facilitarase o uso da biblioteca no tempo de recreo exclusivamente como lugar de estudo e lectura, e en todo caso de acceso voluntario. A biblioteca usarase tamén como espazo para os xogos de mesa, excluídas as cartas, sempre que se garantan o silencio e o respecto cara as persoas que estean estudando.

4.5 Recreos

Art. 32

Recreos

Os recreos quedan regulados polas seguintes normas:

1. Os alumnos/as do 1º ciclo de ESO terán dous recreos, o primeiro despois do segundo período lectivo e o segundo despois do cuarto. Estes recreos serán controlados polos profesores de garda e o alumnado non poderá saír do recinto escolar.

2. Os alumnos dos demais niveis poderán ter un só recreo, entre o terceiro e o cuarto períodos lectivos. O alumnado do 2º ciclo da ESO non poderá sair do centro e o de bacharelato, ciclos e demáis deberá presentar o seu carné do centro, que equivale á autorización por parte dos titores legais para sair do centro.

3. Poderanse organizar durante os tempos de lecer actividades de libre participación que precisen do uso de locais, sempre e cando haxa profesorado responsable destas.

4.6 Gardas

Art. 33

Gardas

As gardas estarán reguladas polas seguintes normas:

1. Desde o momento en que o timbre anuncia a hora de entrada a clase, até o momento en que soa novamente para marcar o final dela, correspóndelle ao profesorado de garda velar para que se manteña a orde e a disciplina nos corredores e nas aulas non ocupadas polo profesorado.

2. En cada hora lectiva haberá, cando menos, un profesor e un cargo directivo de garda.

3. Nos recreos dos alumnos/as de ESO haberá cando menos dous profesores de garda.

É función dos profesores de garda a tutela dos alumnos da ESO durante os períodos de lecer. Esta función estará a cargo, preferentemente, dos profesores que dan aula na etapa.

O exercicio da garda de lecer requirirá a presenza dos profesores responsables no patio e no pavillón, atentos ás evolucións do alumnado.

Os profesores de garda de lecer velarán pola correcta conduta dos alumnos, intervindo alí onde as circunstancias o requiran e adoptando as medidas que consideren oportunas.

4. O profesorado de garda deberá asinar e anotar no libro de gardas as ausencias do profesorado e calquera tipo de anomalía que ocorra durante a súa hora de garda.

5. Cando un/ha alumno/a sexa expulsado/a da aula, dirixirase inmediatamente ao profesor de garda co parte de expulsión debidamente cumprimentado, o profesor/a de garda asinarao e faralle unha fotocopia que introducirá no apartado correspondente da carpeta habilitada para tal efecto na sala do profesorado, anotará a incidencia no apartado correspondente do libro de gardas, e farase cargo da atención do alumno/a.

6. O profesorado de garda debe permanecer nos corredores mentres non sexa total a orde no centro. Deberán estar localizados e pendentes de resolver as alteracións da orde que se poidan producir.

7. No caso de que se produza unha indisposición dun alumno/a ou un accidente, o profesor/a de garda deberá avisar ao pai/nai do alumno/a ou, se é o caso, ao Centro de Saúde da vila de Melide a través do teléfono de urxencias 112 , comunicándollo ao equipo directivo. Cando o profesor/a de garda acompañe a un alumno/a a unha dependencia sanitaria anotará tal incidencia no apartado correspondente do libro de garda. Evitarase, na medida do posible, que o traslado do alumnado se realice en vehículo propio, polo que terá preferencia o traslado en vehículo de servicio público ( ambulancia, taxi…)

8. Cando se produzan ausencias do profesorado que tivese clase, os profesores/as de garda tomarán as medidas necesarias para que o alumnado permaneza traballando dentro da aula sen interferir nas actividades dos demais grupos do centro.

9. O profesor/a que coñeza previamente a súa ausencia durante algún dos períodos lectivos, indicaralle ao alumnado as tarefas que este debe realizar durante ese período, coa supervisión do profesorado de garda.

10.No caso de que a circunstancia á que fai referencia o epígrafe anterior non poida darse por non ser coñecida a ausencia previamente, o profesorado de garda disporá actividades xenéricas, nomeadamente de estudo, que impliquen cando menos un aproveitamento mínimo do período en cuestión.

11.Se durante unha franxa horaria faltasen máis ensinantes que profesores de garda houbese destinados, porase en coñecemento do cargo directivo de garda, o cal poderá autorizar o agrupamento de dous ou máis grupos, dando sempre preferencia na atención aos cursos dos niveis inferiores. Excepcionalmente poderase usar o pavillón polivalente para tal fin, sempre e cando non se estean impartindo clases nel.

12.O profesorado de garda evitará a saída do alumnado da súa aula, en colaboración co resto do profesorado, entre clase e clase, sen motivo xustificado.

13.O profesor/a de garda anotará na UP do profesor/a que substitúa as ausencias do alumnado á súa clase. Ao remate da garda depositará a UP na consola central situada na sala de profesorado para que poida ser usada polo seguinte profesor/a de garda.

4.7 Uso de espazos de lecer e aulas específicas

Art. 34

Uso dos espazos de lecer e aulas específicas

O uso dos espazos de lecer realizarase atendendo ás seguintes normas:

1. As instalacións do IES de Melide só poderán ser usadas polos membros da comunidade escolar nos horarios establecidos. Para podelas utilizar persoas alleas a este, fóra de horario escolar, deberán dispoñer da correspondente autorización.

2. As instalacións que estean libres poderán ser utilizadas polo profesorado que o desexe solicitándollo á xefatura de estudos a efectos de establecer unha orde de utilización.

3. O alumnado poderá usar libremente o patio de recreo e as instalacións deportivas sempre que nelas non se desenvolva unha actividade organizada.

4. Para usar aulas específicas ou laboratorios en horas que non estean ocupados deberase contar coa autorización do xefe/a de departamento correspondente, informando á xefatura de estudos desta circunstancia.

5. A cafetería rexerase polas normas de convivencia recollidas neste regulamento e polas condicións específicas recollidas no contrato de adxudicación desta.

6. Para utilizar as aulas 100-101 “Camiño de Ovedo”, 106 “As Fervenzas” e 309 “Carlos Velo”, así como para empregar o material audiovisual e informático que nelas existe, será necesario anotar a súa preferencia de uso nun libro de reserva que estará na sala do profesorado. Cubriranse os apartados de reserva de hora, profesor/a e grupo de alumnos que a van utilizar, aceptando tacitamente o compromiso dun bo uso das instalacións e material.

7. Nas aulas de informática e aulas específicas, o profesorado que faga uso de elas, deberá rexistralo no libro correspondente que se atopa na aula e, así mesmo, anotar nel, calquera incidencia ou desperfecto, de ser o caso.

4.8 Avaliacións

Art. 35

Avaliacións

As avaliacións realizaranse atendendo ás seguintes normas:

1. O profesorado comunicaralle ao seu alumnado, ao principio de curso, os elementos máis significativos da programación do departamento na materia que vai impartir, no referente a obxectivos, contidos, actividades, sistema de avaliación e recuperación.

2. O profesorado acordará co seu alumnado as datas das probas máis relevantes que deberán realizar ao longo do curso.

3. Os departamentos deberán expoñer publicamente unha síntese da súa programación, na que consten os contidos mínimos e o sistema de avaliación e recuperación referidos aos distintos cursos.

4.8.1 Temporalización da avaliación

Art. 36

Avaliacións

A fixación de probas de avaliación realizarase seguindo as seguintes normas:

1. O profesorado de cada grupo coordinarase co titor ou titora para que a carga de traballo de cada materia e as probas de avaliación das distintas materias non se acumulen nos mesmos períodos de tempo, naqueles casos onde non sexa posible chegar a un acordo co alumnado.

2. Baixo a coordinación do titor/a velarase para que o esforzo esixido ao alumnado en cada materia en períodos determinados non impida a súa dedicación ás demais.

3. A xefatura de estudos comunicaralle ao profesorado, no transcurso do segundo mes do curso, as datas nas que se desenvolverán as sesións de avaliación correspondentes.

4. Establécese unha xornada para celebrar sesións de avaliación inicial dos grupos con alumnado de ESO que se realizará na segunda quincena do mes de outubro. Establecerase tamén unha xornada para realizar a avaliación de diagnóstico do alumnado de 2º de ESO, que se realizará no mes de maio.

4.8.2 Desenvolvemento das sesións de avaliación

Art. 37

Avaliacións

1. Antes da sesión de avaliación o titor/a reunirase co alumnado do seu grupo para recoller todos aqueles aspectos que este queira transmitir á xunta de avaliación. O alumnado poderá enviar un máximo de dous representantes a esta xunta, podendo estes estar presentes durante os primeiros momentos desta, cando se debatan aspectos xenéricos referidos ao grupo de alumnado en cuestión.

2. O profesorado deberá informar aos seus alumnos e entregar as cualificacións con anterioridade ás sesións de avaliación para confeccionar unha acta provisional.

3. O titor/a presidirá a sesión incidindo nos factores que poidan influír nos resultados da avaliación e recollerá as opinións do profesorado que sexan relevantes para mellorar o rendemento, as actitudes e o comportamento do alumnado. Nesta mesma sesión de avaliación, o equipo docente deberá avaliar as competencias básicas, tal e como aparece recollido no decreto 133/2007, do 5 de xullo.

4. O/a titor/a entregaralle ao alumnado, no día e na hora fixados, o boletín de avaliación cos datos achegados por cada profesor/a, e informará ao seu grupo das opinións recollidas na sesión de avaliación.

5. O alumnado terá acceso ás probas realizadas, e coñecerá cales foron os criterios de corrección e, no seu caso, que partes da materia deberá recuperar, cando e como. Así mesmo, o profesorado deberá dar ao alumnado o mesmo tipo de información cando se trate de probas orais.

6. A asistencia ás sesións de avaliación, tanto ordinarias como extraordinarias será obrigatoria para todo o profesorado que forme parte do equipo avaliador.

4.8.3 Reclamacións

Art. 38

Avaliacións

1. O profesor ou profesora estará obrigado a amosar as probas ao alumnado que o solicite, fixando día e hora.

2. Será suficiente a petición de palabra do alumnado. No caso de negativa do profesorado, o/a alumno/a deberá facer constar por escrito a súa petición diante da xefatura de estudos. A xefatura de estudos elevará un escrito ao profesor ou profesora no prazo de 48 horas lembrándolle a súa obriga de amosar as probas.

3. A modificación desta cualificación corresponderá unicamente ao profesorado responsable da materia reclamada, agás que a reclamación estea fundamentada na manifesta inadecuación da proba aos contidos recollidos na programación de departamento. Esta modificación non suporá necesariamente a modificación da cualificación de avaliación.

4. Contra as cualificacións finais o alumnado poderá achegar unha reclamación que consistirá nunha instancia dirixida ao director/a, no prazo estipulado no calendario de avaliación. O profesor ou profesora correspondente atenderán a esta solicitude e despois o fará o departamento no seu conxunto. De non chegar a un acordo, seguiranse os trámites sinalados na regulamentación xeral vixente.

5. Se un profesor/a cre conveniente cambiar a cualificación outorgada a un alumno/a nunha avaliación parcial, deberá comunicalo ao titor/a e á secretaría do centro para que se tome nota da modificación.

6. Cando un membro do profesorado ou o xefe/a de departamento desexe modificar unha cualificación final que figure na correspondente acta de avaliación, deberá comunicarllo á dirección expoñendo cales son os motivos da rectificación. A dirección deberá convocar no prazo máis breve posible unha nova reunión da xunta de avaliación correspondente. A xunta de avaliación será quen, en última instancia, autorice a modificación.

5. Alumnado

5.1 Dereitos do alumnado

Art. 39

Dereitos do alumnado

1. Os alumnos/as teñen os dereitos establecidos no Real Decreto 732/1995, de 5 de maio e no presente Regulamento.

2. O exercicio dos dereitos dos alumnos/as leva consigo o respecto aos dereitos dos demais membros da comunidade educativa.

3. Todos os alumnos/as teñen os mesmos dereitos e as mesmas oportunidades, sen discriminación por raza, sexo, capacidade económica, nivel social, conviccións políticas, morais ou relixiosas, ou discapacidades físicas ou psíquicas. Este centro establecerá as medidas oportunas para que ningún alumno/a sexa discriminado e se lle respecte a súa integridade física e moral.

4. Os alumnos/as teñen dereito a recibir unha formación que asegure o pleno desenvolvemento da súa personalidade.

5. Os alumnos/as teñen dereito a que o seu rendemento escolar sexa avaliado con plena obxectividade. Para garantir a obxectividade faranse públicos os criterios xerais que se van aplicar para a avaliación das aprendizaxes e promoción do alumnado.

6. En caso de accidente ou enfermidade prolongada, a dirección do centro dará parte ás autoridades educativas competentes para que os alumnos/as conten cun apoio específico co obxecto de que, no posible, este feito non supoña detrimento do seu rendemento escolar.

7. O alumnado ten dereito a participar co profesorado na elaboración do calendario de probas de avaliación.

8. O alumnado ten dereito a formular diante do profesorado e dos órganos directivos do centro as iniciativas e suxestións que consideren oportunas, así como as discrepancias respecto das decisións educativas que lles afecten. Cando as discrepancias teñan carácter colectivo serán canalizadas a través dos seus representantes.

9. Todo o alumnado ten dereito a que a súa actividade académica se desenvolva nas debidas condicións de seguridade e hixiene.

10. O alumnado ten dereito a reunirse previo coñecemento do equipo directivo en horas non lectivas e no lugar que se lles asigne para a reunión.

11. O alumnado ten dereito á utilización adecuada das instalacións e ao correcto destino destas.

12. O alumnado ten dereito á liberdade de expresión. Poderán fixar notas informativas e carteis nos taboleiros destinados para estes efectos sempre e cando estean asinados polos seus autores ou polos interesados e respecten os dereitos dos demais membros da comunidade educativa.

5.2 Deberes do alumnado

Art. 40

Deberes do alumnado

Os deberes dos alumnos/as concrétanse nas seguintes obrigas:

1. O estudo é unha obriga básica do alumnado.

2. Asistir a clase con puntualidade e participar nas actividades orientadas ao desenvolvemento dos planos de estudo.

3. Cumprir e respectar os horarios aprobados para o desenvolvemento das actividades do centro.

4. Seguir as orientacións do profesorado a respecto da súa aprendizaxe.

5. Respectar o exercicio do dereito ao estudo dos seus compañeiros.

6. Respectar o proxecto educativo ou o carácter propio do centro, de acordo coa lexislación vixente.

7. Coidar e utilizar correctamente os bens, mobles e as instalacións do centro, e respectar as pertenzas dos outros membros da comunidade educativa.

8. Participar na vida e funcionamento do centro.

9. Mostrar respecto e consideración cara a todos os membros da comunidade educativa.

10.Non realizar en público observacións de carácter persoal que afecten á intimidade dunha persoa.

6. Profesorado

6.1 Dereitos do profesorado

Art. 41

Dereitos do profesorado

Os profesores/as teñen os dereitos establecidos na lexislación vixente, ademais daqueles que deste regulamento se deriven:

1. Liberdade de cátedra.

2. Participar na xestión e control do centro.

3. Elixir ou ser elixidos libremente para os diferentes cargos de xestión do centro ou para os órganos colexiados deste.

4. Respecto aos seus dereitos sindicais.

5. Convocar aos pais/nais, titores/as dos seus alumnos individual ou colectivamente.

6. Contar cos medios materiais, instrumentais e de instalacións adecuadas para desenvolver o seu labor docente.

7. Formular suxestións, queixas, peticións ou recursos ante os órganos de goberno.

8. Ser informados de todo o concernente ao funcionamento do centro.

6.2 Deberes do profesorado

Art. 42

Deberes do profesorado

Os profesores/as teñen os deberes establecidos na lexislación vixente, ademais daqueles que deste regulamento se deriven:

1. Tratar co debido respecto a todos os membros da comunidade escolar.

2. Non realizar en público observacións de carácter persoal que afecten á intimidade dunha persoa.

3. Participar na organización do centro a través dos órganos correspondentes.

4. Asistir con puntualidade e permanecer no seu posto de traballo.

5. Fixar os obxectivos e programar as actividades, así como fixar criterios de recuperación e avaliación dentro do respectivo departamento didáctico. Asemade, cada departamento tomará as medidas necesarias para a coordinación entre os distintos departamentos.

6. Programar e organizar, en tempo e forma axeitados, o seu traballo escolar.

7. Mostrar aos alumnos/as, e aos pais/nais que así o soliciten, as probas de avaliación realizadas, unha vez corrixidas e cualificadas.

8. Recibir individualmente aos alumnos/as, pais/nais ou titores que o solicitasen, previo acordo de hora a través do profesor/a titor/a.

9. Rexistrar as faltas de asistencia á clase do alumnado e as incidencias na aula, no sistema de xestión docente utilizado no centro, para que estean a disposición do titor/a cada día. No caso de faltas de orde ou faltas colectivas comunicarano persoalmente, utilizando os partes habilitados a tal fin no momento en que se produza a falta, ao profesor de garda e ao xefe de estudos, que anotarán a incidencia no libro de gardas e poñerano en coñecemento das familias.

10.Gardar segredo sobre os asuntos tratados nos claustros, nos consellos escolares e nas xuntas de avaliación.

11.Velar pola convivencia e mantemento da orde no centro.

12.Poñer en coñecemento da dirección do centro calquera situación de acoso, violencia ou abuso de autoridade que presence, e que non poida resolver no momento dada a súa gravidade.

7. Pais, nais e ANPAS

7.1 Dereitos dos pais e nais

Art. 43

Dereitos dos pais e nais

Os pais, nais e titores/as legais teñen os dereitos establecidos na lexislación vixente ademais daqueles que deste regulamento se deriven:

1. Ser informados por escrito do horario e da hora en que os atenderá o profesor/a titor/a do seu fillo/a.

2. Ser convocados a unha reunión ao comezo de cada curso escolar.

3. Ser informados do proxecto educativo do centro.

4. Utilizar as instalacións do centro, con comunicación previa á dirección, para as xuntanzas das súas asociacións legalmente constituídas.

5. Ser recibidos por calquera profesor/a do seu fillo/a despois de acordar a hora a través do profesor/a titor/a correspondente.

6. Formular suxestións, peticións e queixas.

7. Participar activamente na vida do centro.

8. Ser informados periodicamente do rendemento e do comportamento dos fillos/as.

7.2 Deberes dos pais e nais

Art. 44

Deberes dos pais e nais

Teñen os deberes establecidos na lexislación vixente ademais daqueles que deste Regulamento se deriven:

1. Procurar a asistencia e puntualidade dos seus fillos/as á clase.

2. Comunicar no prazo establecido (art. 26.5) o motivo das faltas de asistencia.

3. Informarse periodicamente do comportamento e rendemento dos fillos/as.

4. Darse por informados/as das comunicacións oficiais que sobre o seu fillo/a lles remita o centro.

5. Colaborar co profesorado na educación dos fillos/as.

8. Persoal de administración e servizos

Art. 45

Dereitos do PAS

8.1 Dereitos do Persoal de administración e Servizos

O persoal de administración e servizos está formado polo persoal subalterno, o persoal administrativo e o persoal de limpeza e mantemento. Teñen os dereitos establecidos na lexislación vixente ademais daqueles que deste regulamento se deriven:

1. Dereito a realizar o seu traballo nas mellores condicións posibles e cos medios máis axeitados.

2. Dereito a que as súas propostas encamiñadas a un mellor funcionamento do servizo sexan escoitadas polo secretario do centro.

3. Dereito a que o seu traballo e as súas actuacións respecto do alumnado sexan respectadas e amparadas, se fose o caso, polos órganos directivos do centro.

Art. 46

Deberes do PAS

8.2 Deberes do Persoal de administración e Servizos.

Os deberes do PAS son os que se establecen no marco das funcións establecidas pola normativa vixente e en particular os convenios e regulamentos correspondentes.

Art. 47

Funcións de vixilancia do persoal subalterno

1. Colaborar no bo funcionamento e estado das instalacións, dando conta dos deterioros e anomalías que poidan atopar.

2. Velar pola seguranza das persoas e das instalacións sen descoidar o fechamento de xanelas e portas, vixiando o bo estado dos sistemas de seguridade e sen permitir o acceso de persoas alleas ou non identificadas.

3. Comprobar periodicamente que non se achen no recinto persoas non autorizadas a permanecer nel, identificalos e procurar que o abandonen. Se se resistisen a facelo, comunicalo ao directivo de garda para que resolva o que proceda.

4. Contribuír ao aforro de recursos empregando adecuadamente o material e evitando o gasto inútil de enerxía e auga.

Art. 48

Traballo do PAS

Dentro do respecto aos dereitos e ás obrigas marcadas pola lei, o persoal de administración e servizos desenvolverá con dilixencia o traballo que lle solicite o profesorado para cumprir co seu labor docente e realizará as tarefas que lle encomende o equipo directivo para o axeitado funcionamento do centro.

Art. 49

Prioridade de ordes

No caso de discrepancia entre as ordes recibidas de distintos membros do profesorado, estarase ao que dispoña a secretaría ou outro compoñente do equipo directivo do centro.

Art. 50

Participación na

asignación de tarefas

Os membros do persoal de administración e servizos teñen dereito a que se escoiten as súas suxestións sobre a distribución das tarefas que lles corresponde desenvolver como colectivo.

Art. 51

Reclamacións

Se algún membro do persoal de administración e servizos está en desacordo coas ordes recibidas poderá reclamar por escrito, sucesivamente, ante a secretaría, a dirección e o consello escolar do centro.

9. Disciplina e convivencia

9.1 Normas xerais de disciplina do Centro

Art. 52

Prohibición de fumar

Ningún membro da comunidade escolar poderá fumar no centro.

Art. 53

Uso de teléfonos móbiles e aparellos de son e imaxe.

Prohíbese a todos os membros da comunidade escolar o uso de teléfonos móbiles , videoxogos, reprodutores de música ou aparellos semellantes nas aulas e na Biblioteca, e fóra delas cando interrompan o desenvolvemento da actividade docente ou laboral. Prohíbese así mesmo realizar calquera tipo de gravación en formato audio ou vídeo con calquera de estos aparellos ou outros, agás naqueles casos nos que forme parte dunha actividade docente e baixo a autorización e a supervisión do profesorado.

1. Se un alumno/a necesitase facer unha chamada urxente, corumicarao ao profesor/a, quen tras valorar a situación, autorizará ao alumno/a a acudir a xefatura de estudos ou a dirección para realizar a chamada.

2. Se un/ha alumno/a recibise unha chamada de carácter urxente, o persoal de conserxaría ou o/a profesor/a de garda transmitirían a mensaxe ou darían o permiso para atender a chamada o antes posible.

3. Os teléfonos móbiles, cámaras de fotos, aparatos reproductores de música, etc., que sexan utilizados, do modo que fose, en lugares non permitidos serán entregados en xefatura de estudos e devoltos aos pais/nais ou titores/as dos seus propietarios/as.

4. Ao non ser este tipo de aparatos considerados necesarios para o traballo diario, o centro desaconsella que se traian e non se fará responsable das perdas ou substraccións que puidesen producirse, sendo o seu propietario/a o único responsable.

5. Os auriculares deste tipo de aparatos non poderán estar á vista. De estalo procederase como no caso anterior.

6. De acordo coa lexislación vixente non está permitidos fotografar nin filmar ás persoas sen o seu consentimento ou dos seus pais/nais se son menores.

7. No caso de que algún membro da comunidade educativa fose obxecto de fotografías ou gravacións non consentidas, o centro porá os feitos e probas, se dispuxese delas, a disposición das autoridades pertinentes.

8. Non está permitido mostrar nin difundir entre os membros da comunidade educativa a través de teléfonos móbiles ou outros medios audiovisuais, imaxes de mal gusto e nas que se contemplen tratos degradantes, vexacións ou agresións.

Art. 54

Uso dos corredores

O alumnado utilizará os corredores do centro unicamente para desprazarse a ou desde a súa aula cando lle cumpra. Non deberá permanecer neles nos intercambios de clase ou durante os recreos.

Art. 55

Puntualidade na entrada ás aulas

1. En aplicación dos art. 35 a), b), d) do R.D. 732/95 no comezo, continuación da xornada lectiva e inmediatamente despois do recreo, no momento do toque do timbre de inicio de cada período lectivo, o alumnado atoparase na aula correspondente para iniciar as actividades académicas correspondentes a ese período.

2. Tres faltas de puntualidade serán consideradas como unha falta de asistencia ordinaria. Así mesmo, se o retraso se produce sempre na mesma franxa horaria e co mesmo profesor, este pode considerar dita circunstancia como unha actitude contraria ás normas de convivencia e así notificarllo ao alumno.

Art. 56

Aulas

1. Todos os alumnos e alumnas teñen dereito ao seu posto escolar, dereito que leva consigo o deber de asistencia a clase, o de aproveitamento na aula e o de respecto aos demais.

2. O alumnado disporá dunha aula limpa e ordenada. É tarefa do grupo que ocupa habitual ou ocasionalmente unha aula, mantela limpa e ordenada.

3. Calquera dano (pintadas, manillas rotas etc.) que se produza na aula ou no seu mobiliario, deberá ser reparado por quen o causara ou deberá correr cos gastos de reparación. Se o dano é intencionado provocará as sancións estipuladas. En caso de non atopar á persoa responsable, será o grupo quen asuma toda a responsabilidade.

4. Terase especial coidado coas pertenzas e os traballos individuais ou colectivos que se atopen nunha aula. En caso de dano actuarase como no parágrafo precedente.

5. Cada titor/a de xeito xeral ou calquera profesor/a na súa sesión de clase, establecerá o lugar que deba ocupar cada alumno ou alumna.

6. O centro non se fará responsable da perda ou substracción de obxectos en caso de incumprimento desta norma.

7. O alumnado permanecerá dentro da aula entre unha clase e a seguinte, se non debe acudir a unha aula específica ou de desdobre.

8. O profesor da aula velará para que as aulas queden valeiras nos tempos de lecer e nas últimas horas.

9. O procedemento de autorización das saídas voluntarias entre clases ou en períodos de lecer será o seguinte:

a) No período de cambio de clase o alumno/a deberá permanecer, como norma xeral, na súa aula.

b) Cando por razóns xustificadas o alumnado deba ausentarse momentaneamente da aula, deberá contar coa autorización do profesor ou profesora entrante. No caso de non contar con tal autorización o profesorado deberá contabilizala coma unha falta de puntualidade.

c) O alumnado deberá abandonar a aula nos períodos de lecer, permanecendo, durante estes, dentro do recinto educativo. Exceptúanse na obrigatoriedade de permanencia no recinto escolar durante os períodos de lecer os alumnos e alumnas, de bacharelato e dos ciclos formativos.

10. Para previr un uso incorrecto das instalacións e a substracción de pertenzas, o alumnado abandonará necesariamente as aulas durante o recreo e non poderá voltar a elas ata que remate o recreo, agás acompañado dun profesor/a de garda ou no caso recollido no art. 30.4.

11. Ao rematar a xornada diaria o alumnado levará consigo todo o seu material.

12. Para facilitar o traballo do persoal de limpeza ao termo da xornada escolar o alumnado dexará todas as mesas colocadas en orde, e sobre estas, as cadeiras. O profesor/a que imparte a última sesión na aula é o responsable do cumprimento desta norma.

13. Se unha aula quedase especialmente sucio ou non colaborase un grupo na súa limpeza colocando as mesas e as cadeiras ao final da xornada, non será atendida polo persoal de limpeza.

Art. 57

Responsabilidade por danos

Os membros da comunidade escolar serán responsables dos danos debidos á neglixencia ou ao mal uso intencionado que produza no mobiliario do centro, na súa estrutura ou nas pertenzas doutras persoas que se atopen nel. En todo caso, contribuirán á reparación dos danos, sen prexuízo das sancións que lles puidesen corresponder.

Art. 58

Abandono da aula en ausencia do profesorado

O alumnado deberá agardar na aula ao profesorado de garda en ausencia do membro do profesorado que debería darlle clase.

O alumnado de bacharelato, dos ciclos formativos e programa de cualificación profesional inicial (PCPI) poderá ausentarse da primeira e última ou dúas últimas clases de cada xeira da xornada sempre que sexa informado con anterioridade da falta do profesor/a, e previa autorización da xefatura de estudos.

Art. 59

Comportamento no centro

O alumnado deberá manter, tanto dentro das aulas como fóra delas, un ton de voz baixo para non molestar ás demais persoas que se atopen no centro, estean estas traballando ou non.

Art. 60

Coidado do centro e acceso ao recinto

1. Os membros da comunidade escolar deberán coidar que o recinto do centro e as súas dependencias estean limpos e evitarán toda acción que poida ser contraria á hixiene e á estética. Do mesmo xeito, procurarase que o mobiliario, equipos audiovisuais e informáticos e instrumental empregado quede ordenado ao remate de cada xornada, seguindo as instruccións que a tal fin dea o equipo directivo ou o profesorado correspondente.

2. Os membros da comunidade escolar deberán contribuír ao aforro no centro e manterán posturas ecolóxicas no uso de recursos e materiais.

3. O acceso ao recinto para persoal do centro, alumnado, provedores e público en xeral será a porta principal. Esta porta permanecerá aberta durante o horario de actividade académica., agás nos recreos do 1º ciclo da ESO. Nos recreos de 2º ciclo da ESO, bacharelato, e ciclos formativos, permanecerá vixiada por un profesor de garda.

Art. 61

Presencia de persoas alleas ao centro

Non se permitirá a presenza de persoas alleas ao centro no recinto ou nas dependencias deste, agás cando acudan a el para realizar trámites administrativos, estean citadas cun membro do profesorado ou teñan a autorización da dirección.

Art. 62

Exames

Os alumnos e alumnas non poderán abandonar a aula durante a realización dunha proba de avaliación, aínda que a rematen antes da finalización da hora lectiva, agás o contemplado no art. 29.6

Art. 63

Expulsións de aula

1. Cando a un alumno ou alumna o expulsen da clase, dirixirase inmediatamente ao profesor que se lle indique, ao profesor de garda ou, no seu defecto, a algún cargo directivo.

2. O profesor ou profesora, no momento da expulsión, deberá cumprimentar un parte de expulsión de aula no que especificará o motivo ou motivos polo que expulsou o alumno/a, asignándolle algunha tarefa ou traballo. O devandito parte facilitarase na sala de profesores.

3. O/a profesor/a que expulsa anotará a expulsión ou o parte de actitudes ou accións contrarias ás normas de convivencia como incidencia no parte de gardas. O/a profesor/a correspondente farase cargo da custodia do alumno/a, asesorándoo/a, se é preciso, na realización da tarefa encomendada. Igualmente, asinará o parte de expulsión que lle entregará en man ao conserxe para que o entregue canto antes ao/á profesor/a titor/a, para que teña coñecemento da expulsión.

4. O profesorado que expulsa será quen comunique aos pais/nais ou titores/as legais as expulsións de aula ou os partes de actitudes contrarias ás normas de convivencia. De ser posible, esta comunicación realizarase mediante contacto telefónico durante a mesma xornada na que se produciu, de tal xeito que a familia teña coñecemento do feito antes de que alumno/a regrese á súa casa.

Non atender a estas instruccións por parte do alumnado, implica unha dobre sanción.

5. Cando o profesor que expulsa considere que o traballo encomendado foi realizado correctamente, farao constar no “resgardo” do parte de expulsión e comunicarallo ao titor. Respecto á emenda de conduta neste sentido, véxanse os art. 73 e 79 de este RRI.

Art. 64

Parte de actitudes contrarias ás normas de convivencia e amoestacións na UP

Para circunstancias nas cales un alumno/a cometa unha falta susceptible de ser sancionada fóra do ámbito estrito das actividades de aula, establécese un parte de actitudes e accións contrarias ás normas de convivencia que, a efectos prácticos, terá exactamente o mesmo tratamento que unha expulsión de aula, segundo se describe no artigo anterior deste RRI. Así mesmo, o profesorado pode amoestar a un alumno no período de clase e anotar a incidencia na súa UP. Tres incidencias de este tipo equivalerán a un parte coas características sinaladas arriba. A xestión e contabilidade destas amoestacións correspóndelle ao profesor titor, que o poñerá en coñecemento da xefatura de estudos.

Art. 65

Falsificación de documentos

Os boletíns de avaliación, os partes de xustificación e demais correspondencia do centro teñen a consideración expresa de documentos con valor académico, polo que a súa falsificación ou substracción constitúe un suposto do art. 52 apartado d) do R.D. 732/95 e como tal poderá ser sancionado de conformidade co art. 53 do citado R.D.

9.2 Relacións interpersoais

Art. 66

Xeneralidades

O respecto de cada un dos membros da comunidade escolar a todos os demais será esixible en todo momento e a falta del será sancionable de acordo coa gravidade do feito e as circunstancias nas que se produza.

Art. 67

Uso do diálogo

Darase prioridade ao diálogo para a resolución dos conflitos que se poidan presentar entre os membros da comunidade escolar.

Art. 68

Resolución de conflictos entre o alumnado ou entre o alumnado e o profesorado

Se se produce un conflito entre un ou varios membros do alumnado entre si e/ou un membro do profesorado, o primeiro paso para a súa solución debe ser o diálogo. De non resolverse a situación recorrerase á intervención do profesor/a titor/a correspondente e, se é preciso, á da xefatura de estudos e/ou da dirección. Se aínda nesta instancia non se chega a acordo ningún, informarase á inspección educativa para que prosigan os trámites segundo proceda.

9.3 Réxime disciplinario

9.3.1 Faltas de asistencia

Art. 69

Faltas de asistencia

Para o alumnado de bacharelato, ciclos formativos e PCPI, o procedemento sancionador en canto ás faltas de asistencia e atrasos sen xustificar será o seguinte:

· Ás seis (6) faltas nunha mesma materia, ou doce (12) na totalidade destas, realizarase un apercibimento escrito.

· Ás doce (12) faltas nunha mesma materia, ou vintecatro (24) na totalidade destas, a xunta avaliadora reunirase en sesión extraordinaria para adoptar as medidas oportunas, e que poderán contemplar a perda de avaliación continua.

· Para os efectos dos supostos recollidos nos parágrafos precedentes, tres atrasos sen xustificar terán a mesma consideración que unha falta de asistencia ordinaria.

Para o alumnado de ESO e con 16 anos cumpridos, o procedemento sancionador será o mesmo. Para aquel alumnado menor de 16 anos o procedemento sancionador será o mesmo, agás no que fai referencia á perda do dereito á avaliación continua. Neste caso, a dirección do centro comunicará a circunstancia ás autoridades competentes, solicitando a súa actuación.

A asistencia é parte integrante do proceso formativo, polo que ten incidencia directa na propia avaliación e forma parte dos criterios de promoción e titulación na ESO.

9.3.2 Resolucións e reclamacións

Art. 70

Dereito de audiencia

O alumno/a -e, no seu caso, os seus pais- ten dereito a ser escoitado sempre que sexa amoestado ou sancionado por condutas contrarias á disciplina e á convivencia no centro. As súas alegacións deben constar cando a amoestación se faga por escrito.

Art. 71

Comunicación de sancións

A imposición de sancións ou a aplicación de medidas correctoras comunicaráselle ao alumno/a nun prazo máximo de 48 horas despois de que se acordasen polas instancias competentes e entrarán en vigor tan pronto como haxa constancia de que a comunicación foi recibida.

Art. 72

Suspensión de sancións

A dirección poderá acordar a suspensión provisional da aplicación dunha sanción no caso de que se produzan reclamacións contra ela. Tal suspensión deberá comunicáselles aos interesados no prazo de tempo máis breve posible.

Art. 73

Prescrición das faltas

As condutas contrarias á disciplina e á convivencia no centro poderán quedar corrixidas, se o profesor o estima oportuno, tras a constatación de que se produciu un cambio positivo na actitude do alumno/a e ademais este realizou as tarefas encomendadas segundo o caso.

Primeira expulsión: Se o traballo encomendado polo profesor que expulsa é realizado correctamente. (a valoración do traballo realizaraa o profesor que expulsa na seguinte clase que teña co alumno/a.). No caso de darse esta circunstancia, o profesor que encargou a tarefa poñerao en coñecemento do titor.

Segunda expulsión: Procederase como na primeira expulsión máis un traballo adicional, de tipo social, encomendado polo titor.

Terceira expulsión: Procederase coma na primeira expulsión máis un traballo adicional encomendado polo xefe de estudos.

As correccións impostas deixan de estar en vigor ao remate do curso escolar.

Art. 74

Reclamación contra ascorreccións

O alumnado ou os seus representantes poderán reclamar contra as correccións acordadas polos profesores/as, titores/as ou xefe de estudos ante a dirección.

As reclamacións faranse mediante escrito dirixido á dirección.

Art. 75

Prazos de reclamación e constancia escrita das infraccións

As reclamacións deberán achegarse nun prazo non superior aos tres días hábiles, que se contarán dende o momento en que a corrección ou sanción lle foi comunicada ao alumno/a.

Non se poderá instar a actuación dun órgano respecto das faltas das que non se dea, ou de que non haxa constancia escrita.

Ordinariamente esta constancia terase através dos partes de expulsión, incidencias e amoestacións.

9.3.3 Establecemento de responsabilidade colectiva

Art. 76

Obxecto de responsabilidade colectiva

Os danos causados no mobiliario ou instalacións da sala de aula dun grupo, cando se produzan por uso indebido, neglixente ou malintencionado, serán reparados ou aboados polo conxunto do alumnado do grupo e, subsidiariamente, polos seus pais.

Art. 77

Declaración de responsabilidade colectiva

1. Se unha vez constatado o dano, da información recollida non se desprende a súa autoría individual, notificarase ao titor e ao delegado. Abrirase a continuación un prazo dunha semana para que o propio curso e o titor tenten de esclarecer os feitos.

2. Unha vez que transcorriu este prazo sen resultado, esixirase a reparación ou o pago colectivo do importe total, que determinará un técnico ou un profesional designado polo centro.

9.4 Condutas contrarias ás normas de convivencia

Art. 78

Tipificación das condutas contrarias ás normas de convivencia

Consideraranse condutas contrarias ás normas de convivencia no centro as seguintes:

1. O deterioro non grave, causado intencionadamente, nas dependencias do centro, do material deste ou dos obxectos ou pertenzas doutros membros da comunidade educativa. Consideraranse deterioro non grave, causado intencionadamente, as seguintes condutas

a) Fumar.

b) Tirar xices, borradores, papeis, refugallo, latas... no chan.

c) Ensuciar o chan, paredes, teitos, mesas ou cadeiras.

d) Deteriorar levemente materiais e instrumentos didácticos ou deportivos, así como o equipamento do centro: extintores, ascensor, aseos...-

e) Comer nas aulas ou na biblioteca, incluídos produtos como as lambetadas, os caramelos, os chupa-chups, etc.

2. Calquera acto inxustificado que perturbe levemente o normal desenvolvemento das actividades do centro. Consideraranse actos inxustificados, perturbadores da vida normal do centro, os seguintes:

a) Proferir berros, ruídos molestos ou causar alboroto.

b) Obstaculizar os accesos ao edificio, aulas, aseos, etc.

c) Non respectar os prazos de devolución de libros da biblioteca.

d) Xogar ás cartas nas aulas e na biblioteca.

e) Realizar actos violentos ou agresivos que non prexudiquen gravemente a convivencia.

f) Utilizar unha linguaxe ou xestos groseiros.

g) Adoptar posturas irrespectuosas.

h) Utilizar teléfonos móbiles, reprodutores de música, videoxogos e outros aparellos semellantes durante os períodos lectivos.

i) Actos que interfiran e/ou desvirtúen a comunicación entre o centro e os pais/nais do alumno/a.

3. A sistemática actitude pasiva do alumnado en relación á súa participación nas actividades orientadas ao desenvolvemento do currículo, así como ás orientacións do profesorado respecto da súa aprendizaxe.

a) Non traer o caderno de traballo obrigatorio na materia.

b) Non traer habitualmente o libro de texto.

c) Facer comentarios inoportunos que entorpezan o desenvolvemento da clase, logo de reiterados apercebementos orais.

d) Non respectar o turno de palabra de forma reiterada.

e) Incorporarse con retraso a clase de forma habitual.

f) Non realizar as actividades obrigatorias na aula cando o profesor o indica.

g) Non traer feitas as tarefas indicadas para realizar na casa, de forma habitual.

h) Molestar aos compañeiros.

i) Non respectar o material do centro ou dos compañeiros.

j) Non atender ás indicacións do profesor/a.

k) Replicar de malas maneiras as indicacións do profesorado.

Art. 79

Procedemento de corrección de condutas contrarias ás normas de convivencia

As correccións de condutas contrarias ás normas de convivencia, o órgano competente para acordalas e os requirimentos para facelas efectivas, quedan estipulados do seguinte xeito:

CORRECCIÓN	ÓRGANO COMPETENTE PARA DECIDIR A CORRECCIÓN	CONDICIÓNS OU REQUIRIMENTOS
a) Amoestación privada ou por escrito.	· Os profesores/as do centro. · O titor/a do alumno/a.	· Oído o alumno/a. · Dar conta ao titor/a e ao xefe/a de estudos.
b) Realización de traballos especí- ficos no horario lectivo co obxecto de redimir a falta..	· Os profesores/as do centro. · O titor/a do alumno/a. · O xefe/a de estudos. · O director/a.	· Oído o alumno/a . e a familia. · Oído o profesor/a ou titor/a do alumno/a.
c) Realización de tarefas para reparar o dano causado nas instala-cións ou nos materiais do centro ou nas pertenzas doutros mem-bros da comunidade educativa.	· Os profesores/as do centro. · O titor/a do alumno/a. · O xefe/a de estudos. · O director/a.	· Oído o alumno/a e a familia. · Oído o profesor/a ou titor/a do alumno/a.
d) Suspensión do dereito a participar en determinadas actividades extraescolares ou complementarias do centro.	· O xefe/a de estudos. · O director/a.	· Oído o alumno/a e a familia. · Oído o profesor/a ou titor/a do alumno/a.
e) Cambio de grupo do alumno/a durante unha sesión.	· Profesor/a do alumno/a.	· Oído o alumno/a e a familia
f) Cambio de grupo do alumno/a durante un día.	· O titor/a do alumno/a	· Oído o alumno/a e a familia
g) Cambio de grupo do alumno por un prazo máximo dunha semana.	· O xefe/a de estudos. · O director/a.	· Oído o alumno/a e a familia · Oído o profesor/a ou titor/a do alumno/a.
h) Cambio definitivo de grupo do alumno/a.	· O xefe/a de estudos. · O director/a. · O consello escolar	· Oído o alumno/a e a familia · Oído o titor.
i) Suspensión do dereito de asis-tencia a determinadas clases por un prazo máximo de 3 días. (Proporánselle deberes ou traballos para eses días).	· O director/a.	· Oído o alumno/a · Oído o titor/a, e o equipo directivo. · Oído o alumno/a (os pais ou representantes legais se é menor de idade). · Levantarase acta da reunión co alumno/a (ou cos pais). · Seralle comunicado á comisión de convivencia ou ao consello escolar en pleno.
k) Suspensión do dereito de asis- tencia ao centro por un prazo máximo de 3 días lectivos. (Deberanlle propoñer deberes ou traballos para eses días).	· O director.	· Oído o alumno/a · Oído o titor/a, e o equipo directivo. · Oído o alumno/a (os pais ou representantes legais se é menor de idade). · Comunicaráselle á comisión de convivencia ou ó consello escolar en pleno.

9.5 Condutas gravemente prexudiciais

para a convivencia no Centro

Art. 80

Condutas gravemente prexudiciais para a convivencia no centro. Tipificación e correccións

As condutas gravemente prexudiciais quedan tipificadas segundo se establece neste artigo. Quedan tamén graduadas as correccións correspondentes, tendo en conta que a partir da corrección 4 será necesaria a incoación dun expediente sancionador, tal e como se establece no artigo 84 deste RRI. A potestade correctora correspóndelle á dirección do centro, de acordo co profesor/a titor/a do alumno/a, despois de consultar ao equipo de profesorado do grupo ao que pertence o alumno/a.

CONDUTAS CONSIDERADAS GRAVES

a) Os actos de indisciplina, inxuria ou ofensas graves contra os membros da comunidade educativa.

b) A reiteración, nun mesmo curso, de condutas contrarias ás normas de convivencia.

c) A agresión ou discriminación grave, física ou moral, contra os demais membros da comunidade educativa.

d) A suplantación de personalidade nos actos da vida docente.

e) A falsificación ou subtracción de documentos académicos.

f) Os danos graves causados por uso indebido ou intencional nos locais, material ou documentación do centro ou nos bens doutros membros da comunidade educativa.

g) Os actos inxustificados que perturben gravemente o normal desenvolvemento das actividades do centro.

h) As actuacións prexudiciais para a saúde e a integridade persoal dos membros da comunidade educativa do centro, ou a incitación a estas.

i)O incumprimento das sancións impostas.

j) Susbtración de material do centro

k) Deterioro grave de material informático, audiovisual ou de calquera outra índole.

l) Gravación, en formato audio ou vídeo, de calquera membro da CE, agás para actividades docentes.

CORRECCIÓNS DAS CONDUTAS GRAVES

1. Realización, fóra do horario lectivo, de tarefas que contribúan a mellorar o desenvolvemento das actividades no centro ou a reparar os danos causados.

2. Suspensión do dereito a participar nas activi- dades extraescolares e complementarias do centro.

3. Cambio definitivo de grupo.

4. Suspensión do dereito de asistencia a de- terminadas clases durante un período superior a 5 días e inferior a 2 semanas. (Deberá realizar os deberes ou traballos formativos que se determinen).

5. Suspensión do dereito de asistencia ao centro durante un período superior a 3 días e inferior a 1 mes. (Deberá realizar os deberes ou traballos formativos que se determinen).

6. Cambio de centro.

Art. 81

Aspectos que se deberán ter en conta nos procedementos de corrección

As correccións dos incumprimentos das normas, sexa cal sexa o grao destes, deberán ter en conta os seguintes aspectos:

· Non se poderá privar a ningún alumno/a do exercicio do seu dereito á educación.

· Non se poderá privar a ningún alumno/a do seu dereito á escolaridade, no caso da Educación Secundaria Obrigatoria, agás nos casos de alumnado escolarizado neste nivel maior de 16 anos.

· Non se poderán impoñer correccións contrarias á integridade física do alumno/a.

· Non se poderán impoñer correccións contrarias á dignidade persoal do alumno/a.

· As correccións respectarán a proporcionalidade coa conduta do alumno/a.

· Contribuirán á mellora do proceso educativo.

· Terán en conta a idade do alumno/a.

· Terán en conta as circunstancias persoais, familiares e sociais do alumno/a.

· Propiciarase o exercicio da función mediadora do titor, especialmente na ESO.

Art. 82

Circunstancias atenuantes e acentuantes que se deberán ter en conta nos procedementos de corrección

As circunstancias atenuantes e acentuantes que se deberán ter en conta nos procedementos de corrección, sexa cal for o seu grao, e sexa cal for o tipo de falta cometida, quedan establecidas da seguinte maneira:

CIRCUNSTANCIAS PALIATIVAS OU ATENUANTES

·O recoñecemento espontáneo da súa conduta incorrecta.

·A falta de intencionalidade.

· A petición de desculpas.

CIRCUNSTANCIAS ACENTUANTES

·A premeditación.

·A reiteración.

·Causar dano, inxuria ou ofensa aos compañeiros de menor idade e aos acabados de incorporar ao centro.

·O carácter colectivo da falta.

·Calquera acto que atente contra :

- A non discriminación por razón de nacemento, raza, sexo, capacidade económica, nivel social ou conviccións políticas, morais ou relixiosas.

- A non discriminación por razóns físicas, sensoriais ou psíquicas.

- Calquera outra condición ou circunstancia persoal ou social.

Art. 83

Tipos de actos que poderán corrixirse

Poderán corrixirse os actos contrarios ás normas de convivencia realizados polos alumnos/as:

- No recinto escolar.

- Durante a realización de actividades complementarias e extraescolares.

- Fóra do recinto escolar, que estean motivadas ou directamente relacionadas coa vida escolar e afecten aos compañeiros/as ou a outros membros da comunidade escolar.

Art. 84

Procedemento para a incoación dun expediente sancionador

O procedemento para a incoación dun expediente sancionador queda establecido da seguinte maneira:

Que se produzan condutas sancionables	* As gravemente prexudiciais para a convivencia no centro, agás nos casos nos que se corrixan a través dalgún dos tres primeiros graos de corrección establecidos no art. 80 deste RRI.
Iniciación	* Por acordo da dirección do centro. - Por propia iniciativa. - Por proposta do consello escolar.
Instrutor/a	* Profesor/a do centro designado pola dirección, preferentemente sen relación directa co alumno/a.
Comunicación da incoación do expediente	* Aos pais, titores ou responsables do menor. Ao alumno/a, se é maior de idade. * Á inspección educativa.
Recusación do instrutor/a	* Polo alumno/a e, se é o caso, os seus representantes legais. * Ante a dirección do centro. * Cando da súa conduta ou manifestacións poida inferirse falta de obxectividade na instrución do expediente.
Medidas provisionais	* Poderá adoptalas a dirección do centro: - Por decisión propia. - A proposta do instrutor/a. * Poderán adoptarse: - Ao iniciarse o procedemento. - En calquera momento da instrución. * Poderán consistir en: - Cambio temporal de grupo. - Suspensión do dereito de asistencia ao centro ou a determinadas clases por un período que non sexa superior a 5 días. - Deberán comunicarse ao consello escolar. * O consello escolar poderá revogalas en calquera momento.
Prazo de iniciación	* Non superior a 10 días desde que se tivo coñecemento dos feitos sancionables.
Trámite de audiencia	* O alumno e ademais, se é menor de idade, os pais ou representante legais, comunicándolles: - As condutas que se lle imputan. - As medidas de corrección que se propoñen ao consello escolar.
Prazo de instrución	* Non deberá exceder de 7 días.
Resolución	* Polo director/a. * No prazo máximo de 1 mes desde a iniciación.
Recursos contra a resolución	* Recurso ordinario: - Diante do xefe territorial de educación. - No prazo de 1 mes a contar desde a súa notificación.
Prescrición das sancións	* Ao remate do curso escolar.

Art. 85

Procedemento específico de sanción das expulsións de aula e dos partes de actitudes e accións contrarias ás normas de convivencia

O procedemento específico para a sanción das expulsións de aula, recollidas no artigo 63 deste RRI, será o seguinte:

1. Cando un alumno/a acumule dúas (2) expulsións de aula, será amoestado oficialmente. Cando esta circunstancia se repita noutra ocasión durante o mesmo curso, obviarase esta amonestación oficial.

2. Cando un alumno/a acumule un total de tres (3) ou máis expulsións de aula sen asumir, a corrección que se lle aplicará será a indicada no punto k) do artigo 79 deste RRI.

3. O feito de que un alumno/a non cumpra, no momento de ser expulsado da aula, con algún dos requirimentos recollidos no artigo 63, provocará que a expulsión sexa considerada dobre, levando esta circunstancia á aplicación do suposto correspondente recollido neste artigo.

4. A reiteración das expulsións de aula, unha vez feita efectiva a corrección k) recollida no artigo 79, provocará a apertura dun expediente sancionador, tal e como establece o artigo 84 do RRI.

Os partes de actitudes e accións contrarias ás normas de convivencia terán a mesma consideración, para os efectos deste artigo, que as expulsións de aula.

10 Actividades complementarias e extraescolares

10.1 Asistencia ás actividades

Art. 86

Participación nas actividades

1. A asistencia ás actividades complementarias é sempre voluntaria para o alumnado cando se desenvolvan, na súa totalidade ou en parte, fóra do seu horario lectivo.

2. Como norma xeral, os alumnos/as que non participen nas actividades complementarias terán que asistir á clase. O equipo directivo analizará e determinará en que casos estas non se van poder desenvolver en condicións de normalidade suficiente e poderá suspendelas.

3. O profesorado deberá acompañar ao alumnado co que tivese clase cando as actividades programadas sexan para grupos enteiros, teñan lugar dentro do centro e se solicite a súa colaboración por parte dos responsables da organización do acto.

4. Os alumnos e alumnas que participen en viaxes culturais deberán repectar as normas propostas polo profesorado organizador. Para evitar que a baixa na actividade dalgún alumno ou alumna supoña un prexuízo para o resto do grupo ou para o centro, establécense as seguintes condicións:

a) Cumprir rigorosamente os prazos de pago.

b) Comunicar de inmediato ao profesorado responsable calquera baixa e os seus motivos.

c) Se algún participante decide retirarse nun prazo inferior a 15 días antes da realización da viaxe sen argumentar causas de forza maior, deberá cubrir os custos económicos necesarios para que o resto do grupo non sufra un incremento no prezo da viaxe.

d) O alumnado que incumpra estas normas poderá verse privado da asistencia a outras viaxes culturais durante ese curso escolar.

e) O alumnado ten dereito a participar nas actividades que se organicen fóra do centro agás nos seguintes casos:

o Cando estea sancionado coa privación de participar nas actividades por acumulación faltas de asistencia non xustificadas ou por conduta contraria ás normas de convivencia.

o Cando o alumno/a teña acreditada unha conduta incívica ou irrespectuosa cos responsábeis da actividade, o profesorado poderá denegarlle a súa participación, sempre que achegue o informe correspondente ante a dirección. Cando esta conduta teña lugar no momento do comezo da actividade, comunicarase con carácter de urxencia ao cargo directivo de garda que disporá o que proceda para a atención deste alumnado no centro.

5. Os alumnos que non participen por calquera motivo nas actividades están obrigados a asistir á clase, ou se esta non pudese impartirse, a presentarse ante a xefatura de estudos ou ao cargo directivo de garda quen disporá o que proceda para a súa atención.

6. Procurarase que o profesor/a acompañante sexa preferentemente o que imparte docencia no grupo.

Art. 87

Normas específicas

1. O profesorado acompañante velará polo adecuado desenvolvemento da actividade mediando nos problemas que se presenten e atendendo á seguridade do grupo.

2. O alumnado seguirá puntualmente o programa establecido e as indicacións dos responsables, debendo cumprir as normas vixentes nas dependencias nas que se atopen ou que visiten e respectando as instalacións, mobles e demais efectos que se atopen nelas.

3. De padecer algunha afección que supoña limitacións ou requira un trato especial deberá comunicalo, antes do comezo da viaxe, aos responsables. Procederase igualmente de estar seguindo algún tratamento ou tomando medicación.

4. Está terminantemente prohibida a tenencia e consumo de bebidas alcohólicas ou substancias de efectos semellantes e, polo tanto, a introdución destas nos autocares ou nos hoteis.

5. A participación nas viaxes e visitas implica a obriga de realizar aquelas tarefas que fixen os responsables da actividade, segundo a dimensión formativa desta.

Art. 88

Responsabilidade por danos

1. Os alumnos serán individualmente responsábeis dos danos que causen nas instalacións que se visiten, no autobús ou no lugar de aloxamento debendo asumir o custo resultante.

2. De non poder establecerse a responsabilidade individual será responsable o grupo, que deberá facerse cargo do custo de reparación do dano.

Art. 89

Medidas correctoras

1. Durante o desenvolvemento das actividades son de aplicación as normas de convivencia recollidas neste regulamento e as correccións correspondentes, que se imporán unha vez acabada esta, agás o disposto no punto seguinte.

2. Cando a conduta de algún alumno/a poña en risco o normal desenvolvemento da actividade, este/a poderá ver limitada a súa participación e os seus movementos, e inclusive ser devolto ao seu domicilio, correndo cos gastos resultantes os seus pais ou titores legais.

Art. 90

Normas de comportamento nas actividades

Calquera que sexa o tipo de actividade complementaria, e independentemente do lugar no que se celebre, son de plena aplicación as normas que rexen no centro e que se recollen neste RRI.

10.2 Programación das actividades complementarias e extraescolares

Art. 91

Aprobación das actividades

As actividades de carácter anual e aquelas que se desenvolvan cunha periodicidade prefixada deberán contar coa aprobación do consello escolar ao principio do curso.

Art. 92

Publicidade das actividades

A relación das actividades citadas no artigo anterior figurará na programación xeral anual e do seu calendario darase publicidade tan axiña como o permitan os preparativos necesarios para levalas a cabo.

Art. 93

Prioridade das actividades

As actividades complementarias mencionadas terán prioridade a respecto de calquera actividade lectiva.

Art. 94

Autorización de actividades non programadas

Cando algún membro do profesorado ou outros membros da comunidade escolar desexen desenvolver actividades complementarias non programadas, non fixadas na programación xeral anual, deberán solicitalo á dirección con antelación suficiente. Facilitarase a información necesaria para que a dirección poida resolver segundo proceda.

11 Dependencias e material: uso e conservación

11.1 Aulas

Art. 95

Aulas

A asignación e utilización de aulas farase seguindo as seguintes normas:

1. A dirección asignará unha aula a cada grupo para o desenvolvemento normal das súas actividades lectivas. Indicará tamén en que espazos deben impartirse determinadas materias que requiren do uso de medios específicos ou que coinciden na súa hora con outras optativas.

2. O profesorado que o desexe poderá utilizar as aulas de desdobramento , fóra das horas de ocupación marcadas pola dirección. Deste feito facilitarase comunicación á xefatura de estudos.

3. O proresorado poderá utilizar a aula de medios audiovisuais nas horas nas que esta non teña unha ocupación fixa, solicitándoo antes ao xefe/a de estudos. A prioridade na utilización virá marcada pola orde de solicitude.

4. Para usar as aulas específicas en horas nas que non estean ocupadas deberase contar co permiso do xefe ou xefa do departamento que imparta as súas clases nelas. Unha vez obtido este, informarase da circunstancia á Xefatura de Estudos.

5. O profesorado será responsable de anotar calquera tipo de incidencia que se produza ou se detecte no uso das aulas.

11.2 Biblioteca

Art. 96

Biblioteca

O funcionamento da biblioteca do centro regúlase da seguinte maneira:

1. Todos os membros da comunidade educativa terán acceso á biblioteca.

Na súa permanencia deberán ter en conta as seguintes normas:

A) Débese gardar silencio.

B) A biblioteca é un lugar de estudo individual.

C) Non se pode introducir na biblioteca ningún tipo de comida ou bebida.

D) O servizo de préstamo realizarase exclusivamente en presenza do profesorado de garda.

E) Os alumnos/as non poderán subir ao andar superior da biblioteca agás que o baixo estea totalmente ocupado e se dispoña dun profesor/a de garda para cada andar.

F) O uso dos ordenadores da biblioteca será exclusivo para realizar traballos de aula ou consultas relacionadas con estes.

2. O horario de apertura da biblioteca coincidirá co horario lectivo, sempre e cando haxa dispoñibilidade no horario do profesorado para facelo.

3. O profesorado encargado da biblioteca será designado a principios de curso.

4. En horas non lectivas os alumnos/as poderán usar a biblioteca con permiso dalgún profesor/a ou subalterno que se responsabilice da súa custodia.

5. O equipo directivo nomeará ao comezo do curso un responsable da biblioteca que organizará o seu funcionamento.

6. O profesorado encargado da biblioteca deberá atender o servizo de préstamo e devolución de libros e colaborar coas tarefas de mantemento da biblioteca, mediante o programa de xestión da biblioteca, instalado par estes efectos no ordenador desta sala.

7. O período de préstamo dos libros será de 10 días, renovables. Non poderán sacarse fóra do centro dicionarios, enciclopedias nin outro tipo de libros ou publicacións que decida o equipo de profesorado responsable da biblioteca.

8. O período de préstamo poderá variar por decisión, derivada da necesidade de utilización de determinadas publicacións, do equipo responsable da biblioteca.

11.3 Recursos materiais

Art. 97

Recursos materiais

Todos os instrumentos ou materiais existentes no centro que fosen mercados con fondos públicos, así como aqueles que lles fosen dados ao profesorado, ao alumnado ou aos pais, como membros da comunidade escolar, son propiedade do centro. Deberanse manter cos seus orzamentos e poderán ser usados por calquera dos demais membros da comunidade que os precise para o desenvolvemento do seu labor educativo dentro do instituto, sen prexuízo do que se dispón nos artigos seguintes. A dirección promoverá o inventariado destes materiais.

Os libros de texto gratuítos entregados ao alumnado ao comezo de curso considéranse material do centro, polo que en caso de deterioro intencionado ou perda deberá ser reposto. Aplicarase o que este regulamento recolle para as correccións por maltrato de material.

Art. 98

Uso dos recursos materiais

Os materiais utilizaranse tendo en conta as seguintes directrices:

1. Terán prioridade absoluta para o uso de determinados recursos materiais aqueles departamentos que os mercasen cos fondos que o centro lles tivese asignado para o desenvolvemento do seu labor ou que os recibisen como doazón de entidades ás que llelos solicitaron.

2. Terán dereito preferente de uso sobre determinados recursos materiais aqueles departamentos que solicitasen a súa adquisición por parte do centro

3. por consideralos necesarios para o desenvolvemento das actividades docentes nas materias que lles corresponde impartir.

4. Nos casos anteriores, o uso dos materiais por parte doutros profesores/as require a autorización por parte dos xefes/as de departamento que os tivesen asignados. Se tal autorización fose denegada, deberanse facer constar por escrito as causas que motivan a negativa. A dirección resolverá a procedencia de tal resposta.

Art. 99

Recursos materiais para os departamentos

Os departamentos poderán mercar material didáctico en función das súas necesidades e das partidas do orzamento.

Art. 100

Custodia dos recursos materiais

Para a custodia de materiais teranse en conta as seguintes directrices:

1. Os materiais asignados a determinados departamentos ou colectivos quedarán baixo a súa custodia e será da súa responsabilidade informar do seu deterioro.

2. Os libros adquiridos a petición dos departamentos poderanse custodiar nos locais destes cando se trate de material de consulta para o profesorado. En todo caso, deberán estar fichados na Biblioteca, con mención expresa da súa localización.

3. Os materiais que sexan propiedade do centro non se poderán sacar deste sen o coñecemento e a autorización expresa da dirección.

Art. 101

Aulas de informática e material informático

O alumnado non poderá acceder sen a compaña dun profesor/a á aula de informática.

Nas horas de lecer ningún alumn@ poderá estar na aula sen a presenza dun profesor/a. Tampouco se poderá usar ningún ordenador do instituto sen a supervisión dun profesor.
Os ordenadores deben contar só con programas educativos seleccionados polos profesores. De ningunha maneira se poderán cargar no disco duro programas non educativos que prexudiquen o normal funcionamento do computador.
O acceso a internet e as páxinas web deberá contar coa autorización expresa do profesorado. Tamén se debe contar co permiso do profesorado para baixar calquera programa.
Os ordenadores son propiedade do instituto, estando a disposición de todos os alumn@s, polo que non se poden personalizar. Queda prohibido introducir salvapantallas e crear documentos ou arquivos persoais sen permiso expreso do profesorado.
Queda absolutamente prohibido entrar en páxinas web con contidos violentos, racistas, sexistas ou discriminatorios. Tampouco se poden introducir mensaxes desas características no ordenador.
Para utilizar a aula de informática é preceptivo anotarse no horario mensual exposto na sala de profesores, deixar constancia do seu uso
no libro da aula, e no caso de que haxa algunha incidencia anotarase tamén no devandito libro dita circunstancia..
O profesorado que use a aula de informática debe ter uns coñecementos mínimos que permitan un uso correcto dos ordenadores por parte do alumnado.
Os cambios de configuración que se fagan por esixencias do programa educativo deberán ser restituídos antes de rematar a clase, para non entorpecer o traballo dos grupos seguintes.
O/a profesor/a, coñecedor do lugar ocupado por cada alumn@, revisará o estado en que quedan os ordenadores ao rematar a clase.
Cinco minutos antes de rematar a clase apagaranse os ordenadores, recolleranse as cadeiras e a clase quedará en orde para ser usada polo seguinte grupo.
O incumprimento de calquera destas normas por parte do alumnado, ademais ter o seu reflexo nas cualificacións, considerarase unha falta de orde, contraria ás normas de convivencia establecidas no RRI, e sancionarase como tal.

Art.102

Pavillón polivalente

1. O pavillón polivalente destínase ao desenvolvemento de actividades deportivas, culturais, de educación física e conmemorativas .

2. O alumnado que estea participando nalgunha actividade no pavillón, deberá estar acompañado do responsable desta, quen actuará por delegación da dirección para a toma das decisións que estime oportunas.

3. As actividades complementarias que requiran a participación de tres ou máis grupos, desenvolveranse no pavillón polivalente. Terán prioridade, sempre e cando non haxa outra posibilidade, sobre outras actividades que coincidan en tempo e lugar, sendo necesaria a autorización da dirección.

4. A dirección designará un responsable da actividade a desenvolver no pavillón, e tomará as medidas organizativas de utilización deste. Comunicará coa suficiente antelación a ocupación, dispoñibilidade ou cambio de actividade no pavillón.

5. Os usuarios/as do pavillón polivalente deberán cumprir estrictamente as normas para a utilización e conservación do material, expostas no mesmo pavillón.

6. O pavillón polivalente poderá ser usado fóra das horas de ocupación marcadas (pola dirección), polo profesorado que o desexe, coa autorización da dirección do centro.

7. O uso externo do pavillón, fóra do horario lectivo, verase condicionado pola dispoñibilidade de persoal subalterno e o compromiso escrito de asumir os gastos de funcionamento ocasionados e a limpeza e coidado do local.

8. No uso do pavillón fóra das horas de educación física, non poderá utilizarse o material de educación física nin o audiovisual, salvo permiso expreso do departamento de educación física e/ou da dirección.

12 Actuación en situacións de continxencia

Art. 103

Actuación en situacións de continxencia

No caso de producirse algunha situación de continxencia que obrigue a desaloxar o edificio do centro, seguirase o plano de evacuación que se inclúe como anexo a este RRI, xunto coas instrucións que o acompañan.

13 Revisión do Regulamento

Art. 104

Revisión do RRI

A revisión do RRI deberá ser planeada no comezo de calquera curso escolar, formando parte, o proxecto de revisión, da programación xeral anual do centro. Calquera dos órganos enumerados no artigo 105 deste RRI poderán propoñer diante da dirección do centro a revisión do RRI, correspondéndolle á dirección promover a redacción das modificacións deste.

Art. 105

Participación na revisión do RRI

Na revisión do RRI poderán participar todos e cada un dos sectores da comunidade educativa. Correspóndelle á dirección do centro promover a redacción dun borrador que deberá ser debatido polos seguintes organismos:

a) Observatorio de convivencia

b)Claustro de profesorado.

c)Xunta de delegados/as.

d)Asociacións de alumnado.

e)Xunta do persoal de administración e servizos.

f)Asociacións de Pais e Nais do Alumnado (ANPA).

Art. 106

Aprobación do RRI

O consello escolar do centro estudiará as contribucións de todos os sectores da comunidade educativa e aprobará a redacción definitiva do RRI.