A BIBLIOTECA MUNICIPAL
|
|
|
|
A Biblioteca Municipal de Melide
comezou a funcionar en outubro ou novembro do ano 1977 (non se sabe moi ben a
data exacta, xa que non aparece no rexistro do Concello). O Ministerio de
Cultura aportou ao comezo 2500 volumes e o concello de Melide comprou 500
exemplares máis. Pouco a pouco, o número foise incrementando ata chegar aos
14400 volumes que había no antigo local da biblioteca. Como todos sabedes, esta cambiouse de
local hai unhas semanas; con este cambio expurgáronse 2000 volumes que
estaban moi deteriorados debido ao moito uso e a que algúns comezaban a
quedarse antigos, como pode ser o caso dalgúns libros de economía, por
exemplo, e a que outros estaban moi repetidos e non compensaba telos nos andeis ocupando sitio xa que se
lían moi pouco. En consecuencia, hoxe, na nova Biblioteca, atópanse uns 12000
volumes. Por certo que, na historia da Biblioteca, hai tres nomes a destacar: D. José Hermida, D. José Carrera e D.
Fernando Somoza, tres mestres xubilados que catalogaron os fondos e a botaron
a andar. A este novo local poden acudir todos
aqueles que queiran, pero os que desexen levar libros para a casa teñen que
facer un carné de socio/a. Para isto só fai falta unha foto (aínda que non
sexa recente) e hai que pagar 0.60€ anuais, aínda que dentro de pouco xa non
haberá que pagar nin iso, será completamente gratuíto. Así que todos aqueles
que vos queirades facer socios/as, xa sabedes o que tedes que facer. O motivo de que haxa que facerse socios para levar os
libros a casa é que os peregrinos que pasaban pola vila levaban os libros e non
os devolvían, non porque os quixesen roubar (habería de todo) senón porque se
esquecían de devolvelos, e cando se lles acordaba, xa era moi tarde e a
Biblioteca estaba pechada. Así se chegou á conclusión de que todos aqueles
que non se fixesen socios, e polo tanto non tivesen os seus datos
rexistrados, non poderían sacar os libros do local da biblioteca, e só
poderían consultar os libros alí, e así se segue facendo hoxe en día. Nesta Biblioteca encóntranse as
últimas novidades tecnolóxicas, como, por exemplo, internet. Gracias á rede,
podemos encontrar con máis facilidade o libro que nos interese sen necesidade
de ter que acudir á bibliotecaria. Existe ademais un programa,
"MEGA", no que aparecen todos os libros que hai na biblioteca e o lugar
onde se poden encontrar. Dentro duns anos a Biblioteca contará cun avance
máis: estará en rede; é dicir, non necesitaremos saír da casa para saber se
hai ou non o libro que necesitamos na Biblioteca; isto será de moita
utilidade incluso para outras Bibliotecas. A Biblioteca é válida para todos
aqueles que queiran facer traballos, ou simplemente estudiar, pois é un lugar
moi acolledor, aínda que algúns días, mércores e xoves en concreto, non é
aconsellable, pois hai moita xente e, como é normal, hai un pouco de
ruído.. Por último, cabe destacar que, na
Biblioteca, non só podemos encontrar libros, senón que tamén hai xornais,
revistas, música (clásica sobre todo), vídeos.... que, ao igual que os
libros, tamén se poden levar para a casa (¡sendo socios/as claro!). Pois, xa sabedes: se aínda non sodes
socios/as, ¡tranquilos!, estades a tempo. Só tes que facer unha pequena
parada cando vas cara a "NOELA" ou o "J.L". Agora non
vale a escusa de que queda moi lonxe. ¡¡¡¡¡Ahhhhh!!!!, case non nos lembramos
de felicitar a Ángeles por aguantar aí dende o comezo. ¡NORABOA! MÓNICA RODRÍGUEZ VALIÑO
& M.JOSÉ SÁNCHEZ CARRICOBA |