POR PRESENTAR UNHA DEMANDA DE DIVORCIO EN GALEGO

A administración de Xustiza abriu un expediente disciplinario á avogada compostelá Isabel Castillo por presentar unha demanda de divorcio en galego. Os feitos ocorreron o pasado 19 de febreiro, cando a xuíza de Muros devolvía o texto da avogada e dáballe dez días de prazo para que presentase unha copia traducida ó castelán.
Ante a actuación da xuíza, un procurador interpuxo un recurso cualificando o feito de "aberración e unha burla do dereito máis elemental dun pobo: o de usar a súa propia lingua".
Por se fose pouco, a xuíza de Muros iniciou o día 27 de marzo un expediente contra a avogada que podería suporlle unha sanción ou multa de 180. 000 euros.
Isabel Castillo decidiu non defenderse "polo noxento e repugnante que resulta facelo ante unha acusación que ten o seu único fundamento no exercicio de dereitos básicos e elementais". Sen embargo, o Colexio de Avogados de Santiago decidiu, por unanimidade, amparar a esta profesional perante tan desafortunado expediente e criticar a actuación da xuíza.
Castillo afirmou que leva presentado moitas demandas en galego hai moitos anos en Santiago e outros lugares e nunca lle pasou nada igual. O asunto tamén chegou ó Valedor do Pobo.

Para Carlos Callón, presidente da Mesa pola Normalización Lingüística, este caso é "o máis grave exemplo de vulneración de direitos lingüísticos producido nos últimos anos en Galiza".