Actualmente está tristemente de moda o tema do maltrato a mulleres e esa "punta do iceberg" que son as estatísticas de mortes de mulleres a mans da súa parella. Sorprende comprobar con canta frecuencia saltan ás páxinas dos xornais os "novos casos" de agresión con resultado de morte. As análises que se realizan deste "fenómeno" son a miúdo simplistas e ben intencionadas, incluso cando proceden de supostos "expertos" nestes temas.
Causas como a ocultación do problema a familiares, a falta de independencia económica, o baixo nivel sociocultural (no presente en moitos casos) e, por suposto, a suposta agresividade innata do varón levan en si mesmos a posta en marcha de políticas que tenden a mitigar estes aspectos, como por exemplo a necesidade de tutela a muller maltratada a través de medios como proporcionar a vivenda e educación ou formación suficiente para poder ter unha vida independente do seu agresor.
Este é un asunto complexo do que non se poden ver as raíces na inmediatez do problema. É preciso ir un pouco máis alá para descubrir qué hai na socialización feminina e masculina que converte a uns en dominados e a outros en dominadores con "apabullante" frecuencia.
A miúdo hai homes e mulleres que comparten uns ideais similares, pero con diferente intensidade. Por exemplo, a idea de estar incompleto se non se constitúe un en parella, o ideal do "amor romántico" como fusión que impulsa a idea do sacrificio individual en pos dun ben superior: a vida en parella, a aceptación dos celos como consecuencia necesaria do amor exclusivo, o sentimento de fracaso se non se produce o encontro amoroso.
Na consideración do maltrato deberían terse en conta as primeiras formas de agresión que se producen no seo dunha relación e o seu crecemento ascendente. Na miña opinión, formas distintas de maltrato son a de descualificación da opinión dunha muller, a presión para que a muller se adapte ás demandas sexuais ou doutro tipo do varón, a prohibición de que traballe fóra da casa, etc... Un varón que impón condicións deste tipo a unha muller é moi probable que se converta nun maltratador e iso é o que moi frecuentemente se cala.
Un home que maltrata non é un enfermo, é alguén que acepta sen cuestionar todos os valores recibidos desde a súa máis tenra infancia. Sentir respecto e aprecio por quen un é convértese nun factor protector tanto como ter cuestionado crenzas como a de que "non se pode ser feliz sen un home ó teu lado ou sen ser nai"