Libros galegos por catálogo

Biblos preséntase como o proxecto máis ambicioso para a promoción da lectura en Galicia dos últimos anos. Da lectura en galego, claro.

Biblos quere ser a versión galaica de experiencias empresariais de venda e distribución de libros a domicilio xa asentadas no mercado, como Círculo de Lectores. Por unha cota anual de subscrición de 15 euros, os abonados a Biblos poderán mercar por catálogo, e sen gastos de envío, unha selección de libros xa editados e rebaixados nun 5%. A obriga, mercar polo menos un volume cada dous meses.

Os accionistas desta iniciativa empresarial son o xornalista Tucho Calvo e a súa muller Carmela González Boo. Pretenden "chegar co libro galego a toda Galicia, acabar coa súa invisibilidade". Lembran librerías pechadas nas vilas e apostan pola venda por catálogo como saída de futuro. Comezaron a debullar na idea a finais do 2001, e só nos últimos meses foron pechando os acordos cos provedores.
Confesa o xornalista Calvo que recibiron apoios entusiastas das editoriais, "conscientes do mal momento que atravesa o sector"
O sector do libro, iso é verdade, está ferido. Con raquíticos índices de lectura, tamén á cola de Europa, con escasas campañas institucionais de promoción e cunha desenfreada carreira das industrias do lecer por gañar cota de mercado, o libro vai quedando atrás. Ademais, a crise demográfica vai erosionando o consumo de libros (de texto e non) para baleiro dos petos de editores e libreiros. O presidente da Federación de Libreiros, Xaime Corral, da librería Nós de Sanxenxo, non se quere pronunciar sobre o proxecto Biblos. Pola súa parte Tucho Calvo acode a testemuñas persoais de libreiros, que afirman que un repunte do sector do libro os beneficiaría indirectamente.

OBXECTIVO

O obxectivo de Biblos Clube son 8.000 subscritores para garantir unha normalidade nos balanozos.

Non semella doado, aínda que velaí van uns datos de referencia: Círculo de Lectores factura 8 millóns de euros anuais e ten 110.000 socios só en Galicia. Para abrir o espectro ofertan non só libro galego de creación: tamén de fotografías, de receitas, guías de viaxes, diccionarios. E destacan que entre os primeiros abonados a Biblos "non hai case mestres, non hai case literatos". O futuro do libro (e probablemente tamén o de Biblos) pasa por descubrir vetas e non petar no mesmo ferro xa batido polos viaxantes das editoriais.
Sen embargo, as comisións e a pouca marxe non lle deixan espacio a Biblos para o traballo a domicilio, peza básica do éxito da venda por catálogo.

O ENL do IES de Melide desexa moita sorte a esta interesante inciciativa.

Equipo de Normalización Lingüística- (ENL)