Este curso fixen primeiro de bacharelato, e ó principio estaba moi agobiada, e por encima os profesores sempre nos botaban os seus sermóns dicindo: ¡Xa non sodes da ESO e isto non é a ESO...! Eu, ó principio, pensaba: Estes moito esbardallan, pero isto é igual e eu tamén son a de sempre. Pois o certo é que estaba enganada; agora, cando remata o curso, doume conta de que non son a mesma. Xa non paso dos "profes" coma antes, e ás veces aínda sigo algún que outro dos seus consellos; quen me ía dicir a min que eu ía seguir os consellos dos profesores. Ademais, agora xa non estudio por obrigación, senón porque quero aprender. Ben, con isto só quero darlles ánimos a aqueles/as que para o ano comecen o bacharelato; que non se desanimen porque non é imposible, e tranquilos se suspenden algunha, aínda queda xuño e setembro. Sobre todo ós que vaian por letras, que non fagan caso das persoas que din: As letras non valen para nada e con estudiar o día anterior xa chega... Esas persoas están moi enganadas, porque gracias ás letras, no mundo hai uns bos xornalistas dispostos a xogar a súa vida, arriscándose a ir a unha guerra só para informarnos a todos nós. Tamén atopamos a eses humanistas que trouxeron ós nosos días antigos manuscritos e teses sen as que a ciencia non sería nada. Ademais non debemos esquecer que a maioría das linguas europeas, incluída a nosa, proveñen do latín e do grego. Sobre todo non debedes esquecer que as humanidades son máis importantes que as ciencias, porque nelas está apoiada toda a cultura. Polo tanto, nós estamos a culturizarnos, mentres que os de ciencias perden o tempo facendo logaritmos, que non solucionan a vida, cousa que unha boa dose de cultura si pode facer.
Para rematar, gustaríame darlles as gracias a aquelas persoas que me axudaron a aproveitar un bo curso; a Susana Losada pola súa lección de amizade, porque gracias a ti arranxamos "aquelo". Ós meus compañeiros e amigos, en especial a Mar, Rodrigo e Natalia. Só a última cousa, xa non son da ESO e estou orgullosa do que aprendín neste curso.

Ana Belén Villamor Bande
1º Bac-B