O pasado 26 de febreiro, os oito alumnos/as de Filosofía do Dereito, xunto con alumnado de Humanidades e Ciencias Sociais fomos visitar o Parlamento de Galicia, que se encontra en Santiago.
O edificio onde está agora o Parlamento de Galicia foi construído co fin de albergar a escola de veterinaria, pero ó final instalouse nel o Parlamento.
Este edificio ten un soto, planta baixa, entreplanta e piso alto. Na planta baixa están situados os despachos dos deputados, das deputadas e os dos grupos parlamentarios. Nesta mesma planta hai dúas bibliotecas moi bonitas e modernas, salas de reunións e dous amplos salóns. Nun deles están os retratos do rei e da raíña, este salón utilízase para actos solemnes e para as tomas de posesión dos presidentes da Xunta de Galicia e é tamén utilizado como sala de conferencias e recepcións. Alí están as bandeiras das comunidades autónomas.
Dende a porta principal chégase a un amplo vestíbulo, adornado con unha gran alfombra que contén no centro o escudo de Galicia. No teito hai unha fermosa vidreira con moitas cores.
Na primeira planta está o despacho do presidente, e os despachos dos vicepresidentes, as salas de reunións da Mesa, das comisións parlamentarias, etc. E por último, está o salón de plenos, no que predomina a madeira. Neste salón hai asentos para os deputados e deputadas. Na mesa central está o presidente do Parlamento, os dous vicepresidentes, os dous secretarios e os letrados. Tamén ten unha tribuna para o público e para os servicios de prensa, radio e televisión. Existen dous paneis que reflicten os resultados das votacións.
No exterior o edificio está rodeado por unha reixa moderna en forma de lanza de aceiro, con aspecto oxidado, entre a reixa e o edificio hai uns preciosos xardíns.
Este edificio ensinóunolo un home que está traballando alí, e el foi o que nos explicou cousas sobre o Parlamento. O parlamento representa o pobo de Galicia e constitúe a primeira das institucións da Comunidade Autónoma, da que derivan todas as outras.
Este órgano está constituído por deputados e deputadas que son elixidos por sufraxio universal, igual, libre, directo e secreto. Unha vez elixidos, son encargados de representar a todo o pobo galego. As funcións desta institución son: controlar a acción executiva da Xunta, aprobar os seus orzamentos, designar para cada lexislatura das Cortes Xerais os senadores representantes da Comunidade Autónoma Galega, etc.
O salón de sesións é o lugar habitual onde teñen lugar as sesións do Pleno, do Parlamento de Galicia. Neste salón os deputados e deputadas ocupan os asentos dispostos en forma de hemiciclo ante a Mesa Presidencial. O Presidente da Xunta de Galicia e o seu goberno ocupan a primeira fila de escanos, e o resto dos deputados están agrupados en grupos parlamentarios.
Nós tivemos a oportunidade de acudir a un pleno, neste sóense debater todas as cuestións que son da súa competencia. O Pleno debe contar coa asistencia da maioría absoluta dos deputados e deputadas, e, segundo puidemos observar, os deputados non facían ningún caso ó que estaba falando, excepto dous ou tres; algúns estaban lendo o periódico, outros chamando por teléfono, outros mirando papeis, etc.
Á hora da votación entraron bastantes deputados que non estaban na mesa e, sen saber do que estaban falando, porque acababan de chegar, votaron igual, o voto facíase levantando a man a favor ou en contra do que alí se estaba debatendo.
A min esta visita gustoume moito, o que máis me gustou do edificio foi o salón onde estaban os retratos dos reis, o vestíbulo, as bibliotecas e o salón onde se celebra o Pleno.