Entrevista a Rodrigo Ayude, actual director da revista Intres, e estudiante de segundo de bacharelato da rama de humanidades.

"Se queremos darlle un novo enfoque á nosa revista, en primeiro lugar temos que conseguir nova xente."

¿Cantos anos levas sendo director?
Este é o primeiro ano que exerzo como director de Intres.

¿Cómo valorarías a participación nesta editorial por parte dos alumnos do primeiro ciclo da ESO?
Ata o de agora existe un predominio notable na colaboración por parte dos alumnos do segundo ciclo da ESO. Considero, sen embargo, que é mester que os máis pequenos do IES participedes nesta actividade de todos. Prodúceme ledicia a noticia que me dades, dicíndome que case toda a vosa clase (S1A) se apuntou para colaborar coa revista. Dende aquí agradézovolo no nome do equipo de redacción e no meu propio.

¿Cantos anos leva funcionando esta revista?
Este será o vixésimo segundo ano da edición.

¿Cales son os obxectivos dende o equipo de redacción para este ano?
Tras a primeira reunión mantida, decidimos por unanimidade que un dos obxectivos principais para este novo ano sexa que Intres saia antes de Nadal. Outros aspectos que estamos a ponderar, son, por exemplo, a división da revista en seccións ou o facer nós a maquetación.

¿Cales son as túas seccións preferidas?
En realidade, a revista non ten seccións fixas (non sei se esta frase sobrará cando se publique esta entrevista), pero gústame moito a orixinalidade nos artigos.

¿Que é o que máis lle gusta á xente? ¿E o que menos?
Unha pregunta difícil, a que me facedes. A mellor maneira de contestala sería facendo unha enquisa no centro. Intúo que algo que nos gusta a todos, é ver o noso traballo publicado, sempre produce satisfacción e gañas para seguir traballando. O que menos, é case seguro pagar 1€ para conseguila, aínda que sabedes que os colaboradores, coma vós, tedes dereito a adquirila gratuitamente.

¿Dá moito traballo face-la revista?
Si. Temos que agradecer a Susana Losada todo o que fai para conseguir que saia sempre a tempo. Non é fácil, e estamos escasos de tempo. Sempre se fai a toda présa. Pero é un traballo satisfactorio.

¿Quen escribe máis, os alumnos ou os profesores?
Os alumnos, xa que teñen presente a idea que tanto repetimos: "é a revista do alumnado do IES de Melide e non de un grupo de persoas que se divirte pasando artigos e colocando papeis". Os profesores, como non, tamén participan, e gustaríanos que cada vez o fixesen máis, pero sen perder de vista o primeiro, a revista é do alumnado.

¿Crees que deberían participar máis alumnos?
Si, aínda que nós somos conscientes de que estamos a facer todo o posible para animar á xente. Non podemos forzar a ninguén a escribir, ¡Deus nos libre!, pero si insistir e convencer. Se queremos darlle un novo enfoque á nosa revista, en primeiro lugar temos que conseguir nova xente.
¿Contades cos medios necesarios para organizar a Intres?
Ata o de agora contábamos cun departamento (Normalización Lingüística), un ordenador, e unha carpeta moi ampla. Susana Losada intentará este ano conseguir algúns medios máis.

¿Cobrades algo por editala? ¿Por qué a facedes?
Non. É un aspecto que en xeral a xente non ten claro. Non cobramos nada. Nin sequera cobramos o euro que paga a xente ó mercala. Todo iso é unha axuda para o centro, e que así non teña que pagar el todos os custos de maquetación e impresión. Facemos a revista porque sabemos que é unha cousa moi nosa, do noso instituto, coa que hai que colaborar senón desaparece. É non custa moito botar unha man... Ademais, alguén ten que facer ese traballo, se logo se quere deleitar coa súa lectura.

¿Que carreira queres facer o próximo ano?
Xornalismo. Sempre me gustou esta idea, porque é unha maneira moi boa de colaborar coa sociedade dende a información, e porque me gusta este tipo de traballos. Ademais, gozo moito coa lectura e a creación literaria.

¿Ser director da revista quítache tempo nos teus estudios?
Non. É compatible Intres e 2º de BAC, ou polo menos, polo momento. A veces non apetece despois dunha xornada de traballo intenso, pero facémolo polos lectores.

¿Gústache o nome da revista?
Por suposto que si. Paréceme moi orixinal e o que é mellor, non é ningún plaxio. Ademais xa é nome de tradición.

¿Pensas que é importante ser o director da revista?
Considérome un compañeiro máis dentro do equipo. Fun elixido por unanimidade nunhas eleccións, e creo que todos somos en certa forma directores desta editorial. É importante na medida da responsabilidade de contidos que poidan ferir ou molestar a alguén, pero ese clase de artigos non se van a publicar.

¿Cantas páxinas ten a revista?
Depende un pouco do que se colabore. O ano pasado, foi posible bater a marca, e publicar unha revista de 92 páxinas, que son moitas. Todo depende da colaboración que teñamos.

Gracias por dedicarnos un anaquiño do teu tempo.
Gracias a vós.

Noelia, Laura e Vanessa de S1A