Nilo Cea, mestre de Melide, naceu o 1 de xullo de 1919. Fillo do mestre Don Antonio Cea e de Leonor Rodríguez da que herdou as súas dotes artísticas.
Dende que rematou os seus estudios e ata o día da súa xubilación, Don Nilo foi o mestre de Furelos sendo a súa aula, a xuízo da Inspección Educativa daqueles anos, un lugar exemplar e un caso insólito no ensino. Destacar de Don Nilo que dedicaba moitas horas ó seu oficio procurando materiais que facilitaran a aprendizaxe dos seus alumnos: mapas, xogos de medidas, figuras xeométricas, letras, números, gráficos, debuxos,... que fixeron que sexa lembrado como un gran mestre.
Este veciño melidense era home de letras e de artes (debuxo, pintura, talla de madeira ), home orixinal e creativo cun fondo espírito galego e un profundo amor á Terra. No seu legado hai que destacar unha interesante obra poética e narrativa formada por moitos contos de escola que el deixou escritos e ben ordenados en sete cadernos que puidemos coñecer gracias á súa viúva, a tamén mestra Dona Matilde Sánchez, que permitiu que se publicaran en varios Boletíns do Museo da Terra de Melide.
Ademais hoxe podemos ver moitas das súas tallas de madeira no novo Museo melidense e coñecer así un pouco mellor a este destacado melidense.
Don Nilo, case cego nos derradeiros anos das súa vida, morreu en Melide no ano 1992.