Sacerdote, matemático e astrónomo nacido en Lalín no 1878. Foi doutor en Teoloxía con tan só 20 anos e membro da Real Academia de Ciencias Exactas, Físicas e Naturais de Madrid, así como numerario da Real Academia Galega e conselleiro de honra do Consello Superior de Investigacións Científicas. Así mesmo formou parte do grupo de escritores e investigadores do Seminario de Estudos Galegos.

No ano 1912 constrúe en Lalín o primeiro observatorio astronómico de Galicia, seguindo a afección amosada dende neno, chegando a ser director do Observatorio astronómico da Universidade de Santiago. Nel estudiaba o firmamento en estreita relación cos principais astrónomos europeos do momento, non en van dominaba dez idiomas. Foi tamén inventor de aparellos de observación e de medición, algún deles adoptado polo observatorio de París.
O "milagre de Lalín", como lle chamaba Castroviejo, pasaba mirando as estrelas tódalas horas que lle deixaban libres as súas ocupacións docentes e pastorais.
Aller Ulloa debe ser considerado pola categoría dos seus libros, artigos, observacións, aparellos deseñados e escola por el creada, como un dos científicos galegos máis salientables do século XX.
Faleceu no 1966 ós 92 anos de idade.
No 1989 editouse con carácter póstumo o volume Os ensaios en galego.