O día de 23 de maio foi a data programada polo Instituto do Castro para celebrar diversos actos que teñen como motivo central o Día das letras galegas e a festa dos maios.

As celebracións deste día inclúen actividades relacionadas cos xogos populares, fallo dos premios de diversos concursos literarios e recitado das coplas que teñen que ver coa festa tradicional dos Maios.

Este ano a clebración do día das Letras galegas, adicado ao ilustre vigués X. M. Álvarez Blázquez, non podía pasar desapercibida para este Instituto porque moi cerca de aquí atópase o paseo que leva o seu nome e o monumento adicado á súa memoria no ano 1995, sendo alcalde da cidade González Príncipe, en conmemoración do décimo aniversario da súa morte.

Pois ben, cando xa están arrefriando os actos en memoria do poeta- mestre-profesor-historiador-arqueólogo (-dicimos isto por destacar aquelas actividades coas que nos sentimos máis involucrados), a comunidade educativa do Ies do Castro vén de renderlle unha sentida homenaxe que consistiu en depositar ao pé dese monumento, onde el realizou as primeiras escavacións na aba do Castro, un ramo de flores que se acompañou do recitado de dous poemas por alumnado de 3º de ESO.

Esta actividade completouse coas referencias ineludibles a outra efeméride que sempre tivo o Castro como lugar de encontro dun traballo interdisciplinar .Trátase do traslado do monumento de Curros Enríquez ao seu lugar de orixe coincidindo co centenario do seu pasamento en 1908 e que para o centro deixa un baleiro nun percorrido didáctico de moita tradición que se completa con moitos datos referidos á flora, fauna, paisaxe,tradición literaria, etc.