IES "Francisco Aguiar"

Información académica: Criterios de Promoción e Titulación na ESO

NORMATIVA

• Orde do 21 de decembro de 2007 (DOG do 7 de xaneiro de 2008) pola que se regula a avaliación na ESO.

CUALIFICACIÓNS

A partir do curso 2007–08 os resultados da avaliación expresaranse nos termos seguintes: Insuficiente (IN), Suficiente (SU), Ben (BE), Notable (NT) e sobresaliente (SB), acompañadas dunha cualificación numérica na escala do 1 ao 10, sen cifras decimais, considerándose cualificación negativa o Insuficiente e positivas as restantes, correspondendo ao IN do 1 ao 4, ao SU o 5, ao BE o 6, ao NT o 7 e 8,e ao SB o  9 e 10 . Cando un alumno ou alumna non se presente á proba extraordinaria de setembro dunha materia, nos documentos de avaliación farase constar "non presentado" (NP)

MATERIAS PENDENTES

O alumnado que promocione de curso sen ter superado todas as materias, seguirá un programa de reforzo destinado a recuperar as aprendizaxes non adquiridas e deberá superar a avaliación correspondente ao devandito programa. A avaliación do programa de reforzo será tido en conta aos efectos de cualificación das materias non superadas. Corresponde aos departamentos didácticos a organización destes programas. Cada profesor ou profesora desenvolverao no curso no  que imparte docencia. Os centros educativos organizarán os procesos de avaliación da recuperación das materias pendentes.

AVALIACIÓNS

Ao comezo de cada curso haberá unha avaliación inicial para obter información sobre os coñecementos previos e o grao de desenvolvemento das competencias básicas. A avaliación incluirá á análise dos informes persoais da etapa ou curso anterior e completarase coa información obtida a través da persoa titora.

Ao longo de cada curso realizaranse para cada grupo, polo menos, tres sesións de avaliación. A persoa titora recollerá en acta o desenvolvemento das sesións e, as cualificacións das distintas materias e/ou ámbitos, o grao de desenvolvemento das competencias básicas, as decisións e os acordos acadados referidos a cada alumna e alumno e ao grupo no seu conxunto. Asi mesmo, farase o seguimento da recuperacion das materias pendentes, se fose o caso. A última destas tres sesións poderá coincidir coa avaliación final ordinario do mes de xuño.

Nos primeiros días do mes de setembro terá lugar unha sesión de avaliación, trala realización das probas extraordinarias, para o alumnado que non superara todas as materias na avaliación final ordinaria.

Nº TOTAL DE MATERIAS SUSPENSAS

No cómputo das materias para efectos de promoción, consideraranse tanto as materias non superadas do propio curso como as de cursos anteriores. Para estes efectos computarase como unha única materia as de diferentes cursos que teñan a mesma denominación. O proxecto interdisciplinar non computará e a materia de ciencias da natureza do 3º curso, desdobrada en bioloxía e xeoloxía / física e química, manterá o seu carácter unitario.

CRITERIOS DE PROMOCIÓN (téñase en conta o punto anterior)

• O alumno promociona ó seguinte curso se despois das avaliacións ordinaria ou extraordinaria aproba todo ou ten dúas materias suspensas como máximo.
• En caso contrario (con máis de dúas materias suspensas despois da avaliación extraordinaria), o alumno repite curso na súa totalidade. Excepcionalmente, unha vez realizadas as probas extraordinarias, o equipo docente poderá decidir a promoción dunha alumna ou un alumno con avaliación negativa en tres materias, se considera que a natureza das dificultades non lle impedirá seguir con éxito o curso seguinte. Esto último requerirá o acordo favorable da maioría simple do equipo docente.
• Só se pode repetir o mesmo curso unha soa vez e, con carácter xeral, dúas veces como máximo en toda a etapa. Excepcionalmente o alumnado poderá repetir unha segunda vez o 4º curso se non repetise nos cursos anteriores. Neste caso poderá prolongar a escolarización ata os 19 anos.
• Se xa está repetindo curso e despois da avaliación extraordinaria ten máis de dúas materias suspensas, o alumno promociona automaticamente ó seguinte curso (porque non pode repetir por segunda vez no mesmo curso).
• O alumno de primeiro de ano de Diversificación Curricular promociona ó segundo ano, pero arrastrando as materias e ámbitos suspensos de cursos anteriores como materias pendentes.

CRITERIOS DE TITULACIÓN (téñase en conta o relativo ó nº total de materias suspensas)

• Para obter o título de graduado en educación secundaria será preciso ter superadas todas as materias cursadas.
• Excepcionalmente, o equipo docente, poderá propor para a obtención do título ós alumnos que ó finalizaren o 4º curso (en setembro) teñan unha ou dúas materias suspensas, excepcionalmente en tres, sempre que o equipo docente considere que a natureza e o peso destas no conxunto da etapa non lle impediu alcanzar as competencias básicas e os obxectivos da etapa. Esta decisión requerirá o acordo favorable da maioría simple do equipo docente.
• O alumnado que curse programas de diversificación curricular obterá o título de graduado en ESO se supera todos os ámbitos e materias que integran o programa. Así mesmo, se teñen superado os dous ámbitos e avaliación negativa nunha ou dúas materias e, excepcionalmente, en tres, se o equipo docente considera alcanzadas, ao final do programa, as competencias básicas e os obxectivos xerais para a etapa.
• O alumnado con 18 anos cumpridos que non fose proposto para o título de graduado en ESO e teña avaliación negativa ata nun máximo de cinco materias disporá, durante os dous anos inmediatamente seguintes ao remate da súa escolarizacion, dunha convocatoria anual de probas para superar as materias con avaliación negativa. Esta convocatoria terá lugar no mes de xuño e será incompatible con estar cursando as ensinanzas de adultos ou coa presentación ás probas libres para obter o título de graduado en ESO.