En 1954 deron comezo as obras de construcción do novo (hoxe antigo) edificio do Instituto, do arquitecto Antonio Tenreiro Brochón, que entraría en funcionamento en 1957. Dese fermoso edificio, hoxe desaparecido, que constituíu un modelo arquitectónico entre os do seu xénero, gardan grata e entrañable lembranza cantos nel estudiaron e traballaron. O paso do tempo foino deixando pequeno para atende-la crecente demanda de matrícula e en xaneiro de 1980 produciuse o traslado ó edificio que ocupa na actualidade.