| |
Choios
extraescolares
Actividades
extraescolares
Despois
de dous anos de seca, sen actividades complementarias
nin extraescolares, este foi un ano moi prolífico,
como poderedes comprobar no resumo que vos imos
presentar de seguido. Algunhas resultaron moi
ben e outras non tanto, pero todas tiveron algo
aproveitable: aprendemos cousas novas, pasámolo
ben ou, como mínimo, perdemos clases, que
xa non é pouco...
| |
A
primeira actividade que se realizou neste
curso 2000-2001 foi no mes de novembro:
unha excursión do alumnado de 4º
de ESO a Santiago para ir ver unha peza de
teatro do actor Ricardo Frazer e facer un
percorrido guiado por un plano polas rúas
da zona vella da cidade, deseñando
un croquis das prazas máis importantes.
A visita rematou cunha comida en Área
Central e algún tempo libre que cadaquén
aproveitou como mellor lle pareceu... |
No
mes de decembro
o máis destacable foron as actividades
programadas para o Nadal:
· Por iniciativa do Departamento de
Plástica e o Equipo de Normalización,
convocouse un concurso de "Postais de
Nadal". No 1º ciclo de ESO resultou
premiada Carlota Salgado Leal (1ºB) e
no 2º ciclo Belén Guzmán
Perdigao (3ºB). As postais ganadoras
imprimíronse en cuatricomía
(unha tirada de 400 exemplares) e repartíronse
entre alumnos e profesores como tarxetas de
felicitación das festas.
· Xa dentro das actividades do último
día antes das vacacións, cómpre
destacar o concerto do grupo Diapasón
e a organización dun "Supermartes"
e dun bingo para xuntar cartos para a excursión
a Salou que querían facer os alumnos
de 4º de ESO e 1º de Bacharelato
(esta foi simplemente unha das moitas e variadas
estratexias que usaron ó longo do curso
para ir sacando cartos: vender -carísimos-
productos de Nadal, camisetas, facer un rastro,
rifas para apetecibles cestas que non daban
tocado...) |
|
| |
Despois
da paréntese do mes de xaneiro, en
febreiro
comezou todo un maratón de actividades:
· Celso Fernández Sanmartín
veu realizar dúas divertidas sesións
de contacontos para os rapaces e rapazas de
1º e 2º de ESO.
· O editor e escritor Fran Alonso levou
a cabo unha charla-coloquio co alumnado de
Bacharelato. |
E
despois chegou o Entroido,
para o que se argallaron as seguintes distraccións:
· Concurso de disfraces, con dúas
categorías: grupos e individuais. Na
primeira das categorías o 1º premio
(bono de 5000 pesetas para consumir na cafetería)
recaeu no grupo de enfermeiras "Misión
061", que ó tempo que atendían
un accidentado en padiola, miraban tamén
por unha embarazada que deu a luz no mesmo
momento do desfile. Concedeuse tamén
un accésit (3000 pesetas para gastos
de cafetería) para o disfraz "Un
día de clase en 3ºC", no
que os alumnos deste grupo "representaban"
as funcións dos seus profesores.
Na categoría de individual o primeiro
premio (bono de 3000 pesetas para mercar un
CD) foi para Raquel Buján de 1º
de Bacharelato por "La reina de las noticias"
(e tamén da paciencia porque aínda
lle debeu de levar o seu tempo coser todos
os papeis de xornais que compuñan o
seu vestido e paraugas). O segundo agasallo
(un bono de 1000 pesetas para a cafetería)
recibiuno Víctor Vilariño de
2º de ESO polo disfraz "La Faraona"
O xurado estivo composto polos profesores
do Departamento de Plástica Sara Vázquez
e Jorge Rodríguez e polas alumnas Carlota
Salgado e Belén Guzmán e o desfile
tivo lugar no ximnasio do instituto, dado
que non dispoñemos de salón
de actos nin de ningunha outra aula suficientemente
ampla para celebrar eventos deste tipo.
· Ademais, na Sala de Usos Múltiples,
volveuse facer unha nova sesión de
bingo e sorteouse unha videoconsola, todo
iso con representacións de anuncios
publicitarios intercalados.
· Paralelamente, os alumnos de 4º
de ESO e de Bacharelato montaron un rastro
confeccionado a bases de obxectos que foron
entregando desinteresadamente os profesores
e eles mesmos e venderon o que puideron; ó
mesmo tempo trouxeron diversos doces típicos
da época da súas casas (roscas,
filloas, cañas, tortas...) que estaban
á venda na cafetería. Todo isto,
unha vez máis, para recaudar fondos
para a excursión a Salou.
· Os actos do día remataron
cunha demostracións de Loita Libre
e Loita Grecorromana (organizada por xentileza
do Club Keltoi, de Vila de Cruces) e mais
de Kung-Fu. |
|
| |
E
xa nos primeiros días do mes de marzo
(venres, sábado e domingo) os alumnos
de Bacharelato marcharon a Madrid para ver
unha obra de teatro (Las amistades peligrosas),
visitar museos (Reina Sofía, El Prado)
e outras zonas da cidade como o Parque do
Retiro. Mentres tanto, o día 1 os rapaces
e rapazas de 4º de ESO e algúns
de 3º de ESO desprazáronse a Lalín
para escoitar a Emilio Pascual, fascinante
autor de Días de Reyes Magos, libro
que todos eles leran previamente.
Tamén neste mesmo mes os de 1º
e 2º de ESO foron de visita á
Casa das Ciencias da Coruña e o día
31 marcharon, por fin, para Salou (unha semana)
os de 4º de ESO e 1º de Bacharelato. |
Xa
no mes de abril,
o día 3, programouse unha excursión
a Pontevedra (Museo e diversos aspectos do
casco antigo, varios ciclos formativos do
Instituto Politécnico...) para os de
3º de ESO; é lástima que
o que máis haxa que lembrar desta viaxe
sexa o accidente de autobús que se
nos conta na crónica.
Tres días máis tarde, aproximadamente
uns sesenta alumnos de distintos niveis puideron
disfrutar en Lalín dun espectáculo
poético-musical no que se cantaron
poemas de destacados autores españois
como García Lorca ou Alberti e tamén
galegos como Miguel Anxo Fernán-Vello
ou Salvador García Bodaño.
Foi, así mesmo, neste mes cando os
de 2º de ESO foron visitar o Acuario
do Grobe, facer unha viaxe en catamarán,
ver unhas bateas... |
|
| |
Para
o mes de maio
estaba programada unha visita polas mámoas
de Vila de Cruces, que non se puido levar
a cabo a causa do mal tempo que, sen embargo,
non impediu a visita que o día 22 se
realizou a Lugo para ver a muralla, as termas,
o nacemento do Miño, o castro de Viladonga...
E como xa entramos na recta final do curso,
xa vai ben, pero, así e todo, aínda
quedan algunhas cousas:
· O Equipo de Normalización
Lingüística fixo unha proposta
para que os alumnos traian das súas
casas ferramentas ou pezas antigas, coa finalidade
de montar unha exposición para final
de curso.
· Os alumnos de Francés de Bacharelato
marchan unha semana a París (¡case
nada!) na penúltima do curso. As súas
estratexias para sacarnos cartos tamén
foron variadas: camisetas coa Tour Eiffel,
caraveis e cartas no 14 de febreiro, plantas
para o Día da Nai, un mercadiño
na Festa do Galo de Curral coa axuda do Concello...
· E, finalmente, á parte da
posta en marcha desta revista, preténdese
pintar un mural exterior nas paredes de entrada
ó Instituto (pola estrada de Toiriz).
A proposta partiu do Concello de Vila de Cruces,
que se puxo en contacto do Departamento de
Plástica ó principio de curso;
daquela decidiuse facer o traballo nos meses
de maio-xuño, dependendo das condicións
meteorolóxicas (que xa vistes que non
axudaron moito). É o propio Concello
o que proporciona todo o material necesario:
pintura, pinceis, cubos, botes...; ademais,
comprometeuse a limpar o muro e darlle unha
primeira capa de pintura. A actividade retomarase
a principios do curso que vén e irana
realizando ós poucos todos os alumnos
de Plástica do instituto, que se organizarán
por grupos e horas. |
| Ademais
de todo o que contamos ata aquí, e
seguro que aínda nos había de
esquecer algo, temos que falar dos concursos
literarios, porque parece que o
noso centro vai ser berce de futuros escritores
-neste caso escritoras- que andan ganando
premios por aí adiante:
·
En primeiro lugar, a nosa noraboa a Rocío
Sánchez de 4º de ESO, que ganou
o 2º Premio do I Concurso de Contos
"Agora conto" da Asociación
Cultural Ágora de Lugo co relato
titulado A elixida, polo que recibiu un
diploma e un lote de libros.
· Por outra parte, este centro, a
través do seu Equipo de Normalización
Lingüística, participou no concurso
literario da campaña de normalización
da Dirección Xeral de Política
Lingüística da Consellería
de Educación denominada "Entre
nós, en galego". Había
dúas modalidades: poesía e
narrativa e, dentro de cada unha delas,
dúas categorías: Educación
Secundaria Obrigatoria e Bacharelato. Primeiramente,
debiamos facer unha selección dentro
do propio centro, despois pasábase
á fase de competición provincial
e, finalmente, á autonómica.
As premiadas na fase do centro foron as
seguintes: en ESO Miryam Ríos en
poesía con Potenciemos o galego e
Patricia Méndez en narrativa co relato
Cartas Últimas, ambas as dúas
de 4º nivel; en Bacharelato a modalidade
de poesía quedou deserta porque non
houbo participantes e en narrativa premiouse
a Soraya Méijome polo texto Ringg,
ringg, ringg. Todas elas obtiveron como
premio un lote de libros en galego e o xurado,
segundo se establecía nas bases,
estivo composto pola Coordinadora do ENL
(Magdalena García), a Directora do
Centro (Enriqueta Gutiérrez), a Xefa
de Estudios (Mª Victoria de Soto) e
a Xefa do Departamento de Galego (Rosa Salgueiro).
Unha vez establecida esta selección,
os traballos premiados foron enviados á
Delegación Provincial de Educación
de Pontevedra para competir xa a nivel de
provincia; nesta fase Soraya Méijome
recibiu un 3º premio, que consistía
nun vale de 10.000 pesetas para libros en
lingua galega. Os nosos parabéns
a todos os premiados e tamén, dalgunha
maneira, estamos todos de noraboa, non só
por ter compañeiras de talento, senón
porque o propio centro vai recibir algúns
cartos (aínda non sabemos cántos)
para mercar material por ter participado
neste concurso e iso é bo para todos
e todas ¿ou non?
|
|
|
|
