Ruta de sendeirismo

Camiñar é o medio básico de desprazamento que temos os seres humanos e unha actividade moi sa que debemos practicar a cotío. Actualmente, os nosos hábitos sedentarizáronse, estamos perdendo o costume de desprazarnos a pé incluso para pequenas distancias. Camiñar axudaranos a mellorar a nosa saúde, coñecer sitios de interese e facer amigos. Por todo esto, debemos incluír o sendeirismo como unha actividade necesaria no noso tempo de lecer; ademais xa se sabe aquelo de Mens sana in corpore sano.
Para facer sendeirismo só tes que quedar con algún amigo, marcar unha ruta que che interese e poñerte a camiñar, ¡ánimo!

A ruta que nós fixemos o sábado día 19 de maio, de 9 quilómetros, foi esta: Ferry (Cortegada) - Outeiro - Arxe -Encoro de Portodemouros - Fervenza das Hortas.

Esta ruta é un agradable paseo, bonita e boa de facer. Ó seu comezo, no alto, contémplanse excelentes vistas panorámicas do encoro; continúa baixando cara Arxe por camiños entre os piñeirais ata os criadeiros de troitas. O camiño transcorre agora á beira da auga, cruza o río Ulla polo dique e, unha vez na outra marxe, baixa entre aldeas ata chegar á fervenza das Hortas. Fermosa camiñada, en fin, na que a principal mestra foi a natureza. ¡Moitas gracias!