Editorial

¿Cal é o motivo? Pois o mesmo que no número anterior: sentímonos orgullosos da nosa maneira de ser e encántanos comprobar o que somos capaces de facer. Neste novo número de Camballón.com tentamos plasmar o noso enxeño, a nosa creatividade, reflectir as nosas propostas… en definitiva, queremos potenciarnos a nós mesmos máis alá dos límites marcados por un centro de ensino e, para brindar polo éxito do primeiro número, ¿que mellor que publicar un segundo? Porque o do primeiro ser foi de "arrase", de feito está totalmente esgotado, e da atención que nos prestaron os medios de comunicación ¿que vos podemos dicir? Xa semellabamos ata famosos e importantes...

Como poderedes comprobar hai neste número máis novidades cás dos euros, posto que na portada xa se ve que aquí houbo un "bautizo": o noso centro, por fin, ten nome: IES "Marco do Camballón". Nas páxinas seguintes explicámosvos polo miúdo o seu significado. Ademais disto, tamén hai cambios, claro está, nos contidos, porque este é un centro dinámico, que traballa, que se move, que aspira a ir cos tempos...

Pero, como sempre hai un pero, aí estaba outravolta o tema económico…, era de imaxinar; partimos case de cero, xa que as vendas do primeiro número destináronse a cubrir os seus gastos; así que de novo tivemos que botarnos á auga atrevidamente e, ademais, queriamos aumentar a tirada inicial de 600 exemplares. Pouco a pouco, case pedindo esmola polos comercios da vila, conseguimos xuntar unha cantidade suficiente para animarnos e, entre estas axudiñas e outras axudas maiores do Concello ou de Edicións Xerais, fíxose posible que saia á luz este novo número anual. Vaia o noso máis sincero agradecemento para todos eles; de todos os xeitos, non queremos deixar pasar a ocasión de darlle especialmente as gracias a algúns establecementos que nos axudaron de xeito absolutamente desinteresado, posto que polas súas características nin sequera lles podemos ofrecer publicidade.

¡Ah!, pero tamén queremos dar unha boa estarricadela de orellas: seguimos botando en falta o apoio e a colaboración dalgunha entidade á que lle correspondería mostrarse activa e preocupada pola vida do centro do que forma parte e non será porque nós non insistamos e o reclamemos... Decepciónanos profundamente a súa pasividade.

Estas páxinas van empapadas da ilusión, o esforzo e o traballo de moita xente. Recibídeas agarimosamente, pero se hai que "dar caña" non o dubidedes, iso axudaranos a mellorar. ¡A por elas!