¡Xa temos nome no Instituto!

Como xa todos sabemos, o noso centro foi bautizado durante este curso baixo o nome de IES "Marco do Camballón", así que ¡noraboa!
Pero… ¿que é o Marco do Camballón? Pois esta é a denominación que recibe o poboado de monumentos megalíticos que se sitúa no monte do Camballón, máis concretamente de cara a Oirós. No Marco do Camballón rexístranse quince mámoas, que datan do ano 4.000 a.C., aproximadamente, sendo dolmens simples, e que polo tanto son exemplos do primeiro megalitismo galego. Entre todos estes túmulos achouse un de maior curiosidade ou interese, xa que contén un dolmen de cámara poligonal, con tendencia circular, formada por sete ortostatos.
Logo de varias investigacións arqueolóxicas, por parte do Departamento de Arqueoloxía da Universidade de Santiago, atopouse nun dos ortostatos unha serie de gravados en forma de serpe e un motivo solar, pero tamén apareceron obxectos dos nosos antepasados da cultura celta como restos cerámicos, tanto lisos como campaniformes, un disco perforado, e unha serie de pequenas pezas de ouro; por isto, algúns estudiosos consideran que o tóponimo de Oirós ten que ver con ouro, debido a tales descubrimentos entre o solo.

¿Que sabes dos monumentos megalíticos…?
Os monumentos megalíticos son froito do pobo celta, que é a cultura da que descendemos todos os galegos e, como sabes, os celtas eran un pobo que asentou en Galicia no século VIII, máis ou menos, sendo a etapa anterior ó esplendor do Imperio Romano.
Dentro deste preciado e valioso legado distinguimos tres tipos: os dolmens, as pedrafitas e os círculos líticos. Os monumentos atopados no Marco do Camballón correspóndense todos eles, como dixemos anteriormente, con dolmens simples, que son os máis comúns descubertos en Galicia; estes adoptan un carácter funerario: neles facíanse enterramentos colectivos, pero, ademais, servían como elementos delimitadores do territorio da propia comunidade, motivo polo cal adoitan aparecer en lugares altos ou cumes de montes e tamén á beira de correntes de auga.
Sería interesante que pasaras polo Marco do Camballón para descubrires por ti mesmo ese legado que nos deixou o pobo celta vinteoito séculos atrás, para que comprobes en que lugar tan interesante vivimos, que afortunados somos e, tamén hai que dicilo, que pouco coidamos ás veces o que temos…

David Fiuza
1º Bacharelato