Nós recomendamos a...
Roberto Salgueiro

Roberto Salgueiro González: Eliana en ardentía ou Bernardo destemplado, Ed. Xerais, 2001, 61 páxs.

¿Como andades de traballo? ¿Agobiados? ¿Ata arriba? Pois eu vouvos propoñer unha solución para desconectar, aínda que só sexa un anaquiño: Eliana en ardentía ou Bernardo destemplado. É unha peza de teatro, concretamente unha comedia, cunha temática erótica e amorosa. Nela, unha desfogado mozo de Verona chamado Bernardo ándalle a facer as beiras á unha nova "víctima", a virxinal Eliana que, axudada pola súa criada Rosalía, vai intentar que o encontro amoroso entre os dous excitados amantes sexa perfecto.
O mellor toque de comicidade vén da man dunha vella "báltica", a cotío enfurecida por mor das desfeitas ocasionadas polo protagonista na súa horta.
A obra en conxunto ten certas resonancias da Celestina de Fernando de Rojas, pero entrando nos detalles é totalmente diferente. E ademais, seguro que non vos esperades ese final tan... ¿asombroso? ¿cómico? ¿paixonal? Opinade vós mesmos sobre isto, deixo a resposta no aire.
Roberto Salgueiro ganou con esta obra o "Premio Álvaro Cunqueiro de Teatro" no ano 2000 e representouna coa súa propia compañía no 2001; e non foi este o seu primeiro galardón, posto que xa se introduciu no mundo dramático cando era moi novo levando a cabo diversas actividades na Aula de Teatro da Universidade de Santiago, que actualmente dirixe. É tamén autor doutras pezas como O arce no xardín e de varios ensaios sobre o teatro.
Con todo isto non pretendo outra cousa que animarvos a ler esta obriña que de seguro que vos fará pasar un bo anaco.

Ana Rouco
1º Bacharelato