| |
A
cociña de Sonia
1º
PRATO: Filloas recheas de grelos
Ingredientes:
12 filloas, 1 presa de grelos (cocidos), 2 dentes
de allo, 1 cebola, 50 gr de piñóns,
2 ovos, pementa, noz moscada, aceite e sal.
Elaboración: Poñemos aceite nunha
tixola coa cebola picada; cando estea dourada
engadimos os grelos troceados, os piñóns,
os allos machacados, a pementa e a noz moscada.
Refogamos todo e retirámolo do lume. Con
esta mestura enchemos a filloas; despois rebozámolas
con ovo e pan relado e fritímolas en abundante
aceite. Sérvense dúas por persoa.
2º
PRATO: Capón recheo de castañas
Ingredientes:
1 capón duns dous quilos (desosado), 100
gr de xamón, 100 gr de manteiga de porco,
1/2 quilo de castañas, 2 ovos, 2 culleradas
de manteiga, 1/4 litro de caldo ou auga, 1 vaso
de viño branco, 1 copa de coñac,
1 cunca de nata, pementa, noz moscada e sal.
Elaboración:
Refogamos o xamón coa manteiga, engadimos
as castañas previamente asadas e peladas,
sazonamos todo e botámoslle tamén
a pementa, a noz moscada e o viño; cando
o viño estea reducido incorporamos a nata,
deixamos que coza un minuto e engadímoslle
os ovos batidos, deixándoos que callen
un chisco. De seguido enchemos o capón
desosado co preparado anterior. Salgámolo
e untámolo coa manteiga de porco; metémolo
no forno de lado e, transcorridos 30 minutos,
dámoslle a volta e deixámolo outros
20; durante todo este proceso hai que ilo regando
co seu propio prebe. Un anaco antes de sacalo
do forno, régase con coñac, aclaramos
a salsa co caldo e deixámola cocer uns
segundos. Admite calquera gornición, por
ex. de cogomelos en láminas.
SOBREMESA:
Follas de limón
Ingredientes:
Follas de limoeiro tirando a verdes, 1/2 ducia
de ovos, fariña (a que se precise ata que
o amoado quede espeso), 1/2 vaso de auga, aceite
para fritir.
Elaboración: Bater os ovos, a fariña
e a auga. Pasar pola masa unha folla de limón
para comprobar que estea ben espesa. Despois collemos
unha folla de limón, pasámola pola
masa e fritímola en aceite ben quente;
ó que estea frita retiramos a folla. Pódeselle
facer un recheo de crema pasteleira, nata ou que
se desexe. Preséntanse con azucre moído
esparexido por enriba.
Sonia
García, Cafetería
|
|
