NUNCA MÁIS

A edición deste 3º número da nosa revista vén rodeada de parabéns por varios motivos: primeiro, os premios conseguidos co nº2 de Camballón.com no curso pasado no concurso "Entre nós, en galego", convocado pola Dirección Xeral de Política Lingüística da Consellería de Educación: 1º premio á mellor revista escolar da provincia de Pontevedra e 3º a nivel autonómico; segundo, porque este mesmo número foi enviado á Asociación de Prensa Juvenil a Barcelona e entrou na preselección das mellores oitenta revistas de toda España para o concurso "Lobos de oro, plata y bronce" e, ademais, formou parte da exposición que se montou para o XVI Congreso Nacional sobre Prensa y Educación (podédelo ver en www.prensajuvenil.org); e, terceiro, xa temos versión electrónica da revista na recén estreada web do centro (www.camballon.com).
Así que todo isto supuxo, por un lado, un certo respiro económico e, por outro, que seguimos na vangarda da modernidade, agora a disposición do mundo enteiro... ¡Aí queda iso!
Por suposto, queremos aproveitar a ocasión para agradecerlles a tod@s os que colaboraron a súa contribución e mais para felicitalos agarimosamente.
E xa imos a pola 3ª... ¿Que vos ofrecemos desta volta? Pois temas de moita actualidade (Shin Chan, o Prestige, Operación Triunfo, a guerra de Irak, ...) e outros que nunca deixan de selo (cociña, música con Milladoiro e Guadi Galego, empresas da zona, ...), ademais dun relato inédito de Xavier Queipo e, por suposto, os nosos "Choios extraescolares". E non vos perdades unha nova sección que agora inauguramos: "Os que se van", con fotos de grupo dos alumn@s que marchan do noso centro.
Sen embargo, a ilusión e o traballo destes meses tamén estiveron tinxidos de negro, de negro chapapote; e de maldade, de morte, de tristura; por iso, para que a negrume e a dor dos nosos corazóns non impida ver o que somos, o que queremos e o que facemos, tamén nós desexamos berrar con forza e esperanza ¡NON MÁIS GUERRAS NUNCA MÁIS!