Xa celebraches unhas cantas veces o día do teu aniversario, pero probablemente descoñezas moitos dos acontecementos que sucederon cando ti naciches e nos anos inmediatamente posteriores, porque daquela... o mundo xa che era mundo!!!

A ver, sabes que ía ver a xente ao cine? Cales eran as cancións de moda? Que estaba pasando en España e Europa? Ou como lle ía á literatura galega?

Pois vas investigar estes asuntos en Internet. Porque agora ti tamén formas parte do mundo.

Isto é unha webquest, de xeito que Internet vai ser a túa principal fonte de información. A túa primeira misión consiste en realizar as tarefas que se indican a continuación, ao mesmo tempo que navegas pola rede mundial.

As tarefas son:

• Explicar o significado do teu nome.
• Descubrir algúns dos acontecementos sucedidos na época do teu nacemento.
• Informarte sobre o que era noticia no mes do ano no que naciches.
• Investigar sobre a literatura que se publicou nesa época.
• Buscar os títulos de películas e cancións que destacaron na década do teu nacemento.
• Elaborar un informe escrito e persoal que recolla con claridade toda esta información.

Se o precisas tamén poderás utilizar outras ferramentas (ex., dicionarios, enciclopedias) para terminar algunha das tarefas citadas.

A resolución das diferentes actividades segue este proceso:

• 1ª actividade: Busca e explica a orixe e o significado do teu nome. Se che apetece podes incluír algunha curiosidade a maiores. Esta información terás que presentala en forma de ficha.

• 2ª actividade: Localiza tres acontecementos destacados a nivel mundial que se produciran no ano do teu nacemento.

• 3ª actividade: Infórmate sobre os principais feitos ocorridos no estado español na década do teu nacemento. Esta información e mais a do exercicio anterior deberás presentala conxuntamente en forma de esquema.

• 4ª actividade: Busca titulares de noticias do mes do teu nacemento. Escolle dúas noticias de distintas semanas e resúmeas (máximo 5 liñas cada unha).

• 5ª actividade: Investiga cantos libros en galego se publicaron nese ano e logo escolle 10 títulos de literatura de autores/as galegos/as. Despois localiza 3 títulos de obras traducidas. Debes elaborar dúas listas coas citas bibliográficas completas; na das traducións tes que incluír tamén a lingua de procedencia.
  
  
• 6ª actividade: Elabora unha lista que conteña cinco títulos de discos e outras tantas películas destacados na década do teu nacemento. Engade unha valoración xeral sobre o tipo de música e cine que triunfaba daquela.

Para atopar toda a información que se vos pide, cada grupo accederá on-line (é dicir, por medio de Internet) aos recursos que están xa seleccionados no apartado seguinte. Debes ir tomando nota de todo o que che interese. Este material será o que che sirva de base para a elaboración do informe individual que deberás presentar ao rematar esta experiencia dentro do prazo que se estableza.

O traballo deberá contar cunha portada e un índice, ademais de toda a información especificada anteriormente. Permítese o uso de gráficos, fotografías e outros recursos que consideres que melloran a súa presentación. E non te esquezas de que a corrección ortográfica, a coherencia e a precisión léxica son partes fundamentais no teu informe.

A información podes conseguila dos sitios de Internet que che ofrecemos. Preme co rato nos enlaces para acceder a ela.

O significado dos nomes I

O significado dos nomes II

O significado dos nomes III

O que pasaba no mundo

O que pasaba no estado español

As noticias da época

Literatura

Os discos dos 90

As películas dos 90

Se non aparece o que desexas nas páxinas web anteriores, emprega esta ferramenta para buscar por palabras clave.

A avaliación das tarefas realizadas e de todo o proceso deste traballo, tanto a nivel individual como en grupo, analizará os seguintes aspectos:

Conclusión

Esta webquest concibiuse fundamentalmente para realizar unha aplicación global dos distintos procedementos e estratexias que, ao longo do curso, se traballaron co alumnado en relación á expresión escrita.
Ademais disto, pretendeuse un achegamento ás novas tecnoloxías e ao mundo da información dixital, así como unha mellora da comprensión lectora e da busca e selección da información.

abril, 2007

índice de lingua galega e literatura