A saída foi o venres cinco de abril. Chovía.

Chegamos a Segovia a primeira hora da tarde. É unha cidade parada no tempo na que descubrimos rúas medievais, a catedral gótica, e algo que foi do agrado xeral, o Alcázar. É un castelo medieval que parece un palacio, con interiores de artesonados, dourados e madeiras nobres no que viviron os reis de Castela. E sempre a presencia do Acueducto, obra romana que permanece en pé sen cemento e resistindo ós efectos da contaminación sobre a pedra. Chovía.

O sábado prometía claros e moito frío, pero tamén chovería. Saímos cara a Salamanca con parada en Ávila. A visita foi rápida á catedral, casco vello e murallas, porque algún de nós estaba en proceso de conxelación.

Continuamos viaxe e chegamos a Salamanca para comer. Chovía. O percorrido pola cidade é viaxar no tempo e meterse no século XVI. As dúas catedrais presiden a vista panorámica e, xa dentro, pasamos por igrexas, palacios, prazas, ata a Universidade. Por se acaso, ata o máis incrédulo buscou a rá, por aquelo de avivar a intelixencia cara ó final de curso. Sen embargo recordemos o dito: "Quod natura non dat, Salmantica non prestat". A climatoloxía volveu a interromper o paseo e dispersamos o grupo. Gozamos dos outros atractivos da cidade: cafés, compras, productos de porco ibérico, e disfrute dunha tarde-noite de sábado nunha cidade universitaria chea de atractivos para xente nova.

A volta á realidade iniciouse o domingo. Aproveitamos o camiño para ver Zamora. Pechadas nas murallas, as rúas medievais dos Francos e dos Notarios contan un pasado de Reconquista e igrexas románicas que percorremos disfrutando dun sol que nos despedía de Castela. Na vontade de aproveitar o tempo ó máximo, paramos en Puebla de Sanabria. Subimos ó castelo e vimos o panorama dunha pequena vila medieval dende a que se domina un enorme territorio. O cansazo dos excursionistas non foi inconveniente para rematar a viaxe en Ourense e subir e baixar a Ponte do Milenio.

Por fin, subimos ó autobús por última vez antes do regreso definitivo a Vila de Cruces. Era a noite do domingo e chovía.