Xogamos con outros centros europeos
	e estas son as nosas opinións:
	Tamara Navaza Sa Zaida Quinteiro Pulleiro (1º Bacharelato)
	Durante estes últimos meses, os alumnos de Economía de 1º de Bacharelato tivemos a oportunidade de coñecer máis de preto o mundo da Bolsa. Tivemos á nosa disposición 50.000 euros por grupo para investir comprando ou vendendo accións de diferentes empresas durante tres meses. As operacións facíanse por Internet, practicamente a tempo real, con diferentes Bolsas europeas. O grupo que máis beneficios obtivera, sería premiado cunha viaxe a Alemaña. O primeiro problema que se nos presentou foi o de poñernos dacordo entre os membros do grupo, en que empresas queríamos investir e o número de accións que queríamos mercar ou vender. As primeiras semanas gastabamos moi poucos cartos, pois tiñamos o medo do principiante, e así non obtiñamos grandes beneficios. Investimos preferentemente en empresas "estables" e coñecidas como Iberdrola, Gas Natural,... e noutras que non eran tan coñecidas para nós, pero que nos aportaban certa seguridade polas súas estatísticas. Ademáis tivemos cuidado coas empresas de telefonía porque estaban atravesando unha etapa de crise. En parte, seguimos os consellos que nos dera o experto en Bolsa que nos veu dar unha charla sobre o funcionamento do mercado de valores, e da profesora que sempre nos estaba animando a que gastaramos máis cartos. A pesar de todas as precaucións e consellos non tivemos moita sorte e só un dos seis grupos da clase obtivo beneficios; de todas maneiras, foron poucos. Quedounos un bo recordo desta experiencia. Foi moito máis amena e sinxela do que parecía, e ó fin e ó cabo ¡menos mal que os cartos non eran nosos!
	Lidia González Pena Leticia Verde Salgado (1º Bacharelato)
	Nós estivemos no mesmo grupo do xogo. Déronnos 50.000 euros para investir na Bolsa e o final acabamos tendo menos do que nos deron. Decidimos investir en Endesa pero non daba nin ganancias nin perdas, polo que chegamos á conclusión de que o mellor era vender. Máis tarde investimos en L'Óreal, pero o único resultado que tivemos foron moitas, moitas perdas. Entón, como único recurso posible, investimos en Ericson, con accións a 0,28 euros, porque era unha das poucas empresas que subía ou se mantiña estable. Ó día seguinte chegaba a 0,31 euros, e entón decidimos vender porque compraramos moitas accións. ¡Por fin beneficios! porque ata ese momento todo foran perdas, en parte por culpa dunha das compoñentes do grupo que se empeñou en investir en Harley-Davidson porque ía subindo, pero xusto ó comprar nós, baixaron considerablemente. Como vedes, investir non é tan fácil.
	Laura López Maceiro Diana Reimóndez Agra (1º Bacharelato) A experiencia na Bolsa non resultou de todo mala, pois ó final conseguimos gañar máis diñeiro do previsto. Nun principio tiñamos moito medo a investir e apenas gastabamos uns poucos euros. O primeiro día investímos 2000 euros de 50.000 e xa nos parecían demasiados. Sen embargo, a medida que foron pasando os días, fomos collendo máis práctica e xa investiamos moito máis que antes. O normal era gastar uns 5.000 euros en cada compra, e, normalmente, en valores seguros (bancos, hidroeléctricas) o un aquelas empresas que, despois de estudiar a súa marcha nos meses anteriores, nos parecían que ían subir. Deste modo, comprabamos accións que non eran moi caras e máis cantidade. As cousas estaban mellos que ó comezo, cando compramos empresas como Coca-Cola e resultou unha ruína a curto prazo. Unha das cousas que non quixemos facer, ó final tivo bó resultado. Ó realizar o rexistro da compra de accións de Telefónica, equivocámonos e comprámolas tres veces. Gastamos máis do que pensabamos, pero a operación saíu ben, porque nesa semana Telefónica subiu e gañamos tres veces máis do previsto. En definitiva, o noso grupo caracterizouse por gastar todos os cartos en grandes cantidades, aínda que a profesora non pensaba que foran tan grandes, e en valores seguros, que non darían enormes ganancias, pero tampouco perdiamos moito en caso de baixar. A experiencia do xogo da Bolsa pareceunos moi entretida, xa que aprendemos como funciona o mercado de valores, a forma de investir e valorar os cartos que podes gañar ou perder en determinadas operacións.