No curso 2001-02 as alumnas de 2º de Bacharelato de Humanidades elaboramos unha enquisa que constaba de oito preguntas arredor da temática amorosa (entendida en sentido amplo) na literatura galega. Enviámosllela, por correo electrónico ou carta tradicional, a 55 autores/as escollidos entre os máis coñecidos e os que máis nos gustan a nós. Respondéronnos, cordial e desinteresadamente, 34 deles. A seguir ímosvos falar dalgúns datos e conclusións extraídos deste inquérito.

A primeira pregunta referíase a se o amor, entendido en xeral, estaba ou non entre os temas predominantes da súa producción escrita; pois ben, a resposta maioritaria é afirmativa, un 75%. Neste apartado cabería salientar que Anxo Angueira comenta que se non fose así non escribiría nada ou que "tal vez só se pode escribir desde o amor e para o amor" como apunta Henrique Rabuñal. Mesmo os escritores que non consideran este tema como preferente nos seus textos, admiten certa presencia neles, tal é o caso de Cándido Pazó ou Miguel Vázquez Freire.

Se os nosos escritores teñen interese, como tales escritores, pola temática amorosa, é de supoñer que tamén serán lectores máis ou menos habituais deste tipo de textos. Foi por iso que lles solicitamos que escollesen o seu libro amoroso favorito de narrativa, poesía e teatro dentro da nosa literatura. Cinco autores non responderon esta pregunta alegando uns que non son capaces de escolleren unha única obra, outro confesa non ser lector habitual de literatura "adulta" e tamén hai quen opina que na literatura galega aínda non existen obras suficientemente consagradas como para citalas. Entre os que si contestaron algúns fixérono de xeito parcial, sobre todo no tocante ó teatro, posto que máis da metade non menciona ningunha obra; neste sentido, varios deles explícannos que non son lectores de obras dramáticas, aínda que si espectadores. Sobre este particular e á vista destes datos, cremos que o teatro necesita máis potenciación a todos os niveis e seguramente non estaría mal comezar polo ensino. Algo semellante ocorreu coa recomendación do libro de poesía, que tamén quedou incompleta, aínda que se compensou en certa maneira co feito de que os que responderon citaron con frecuencia máis dun título, polo que se revelan como ávidos lectores deste xénero e, nalgún caso, incluso en exclusiva. Quizás esto explique, xunto co feito de que boa parte dos autores son preferentemente poetas, que as recomendacións de títulos de poesía sexan (agás as cantigas medievais) máis recentes e variados ca en narrativa, onde se acode máis ós "clásicos". As obras máis citadas en narrativa foron Amor de Artur e O lapis do carpinteiro; en teatro Os vellos non deben de namorarse, Don Hamlet e A noite vai coma un río; finalmente, no campo da lírica destacan as cantigas medievais e mais os poemas a Moraima de Onde o mundo se chama Celanova, Con pólvora e magnolias e Prometo a flor do loto, aínda que as propostas son moi pouco unánimes. A seguir mostrámosvos todos os resultados de xeito máis detallado:

TEATRO 

NARRATIVA 

POESÍA 

Facendo unha lectura conxunta destas táboas concluímos que os autores que recibiron máis votos foron Méndez Ferrín e Manuel Rivas con 12, seguidos de Cunqueiro con 9. A máis distancia estarían Castelao con 5, Celso Emilio con 4 e Luz Pozo con 3. O grupo de dous votos confórmano Otero Pedrayo, Olga Novo, Anxo Angueira e Rafa Villar.

Como podedes observar, nos cadros anteriores xa tedes unha boa lista de lecturas para escoller. Mentres, e para ir abrindo boca, velaí vos vai unha selección das palabras máis bonitas relativas ó amor citadas por algúns dos autores/as enquisados/as. (Aínda que nós, como boas galegas, seguímonos preguntando ¿e o amor existirá? Esperaremos...)