Adquiri-la competencia profesional característica do título.
	Comprende-la organización e características do sector, coñece-la lexislación laboral básica e os dereitos e obrigacións que dela se derivan, así como os mecanismos de inserción laboral; dispoñer dos coñecementos e habilidades necesarios para traballar en condicións de seguridade, amosando unha actitude preventiva ante os posibles riscos derivados das situacións de traballo.
	Afondar na autonomía, identidade e madurez persoal e profesional de forma que permita realizar futuras aprendizaxes e adaptacións ó cambio de cualificacións.

Materias e módulos

	CICLO FORMATIVO		MATERIAS / MÓDULOS
	1º Soldadura e caldeirería		- Desenvolvementos xeométricos en construccións metálicas - Mecanizado en construccións metálicas - Soldadura en atmosfera natural - Administración, xestión e comercialización na pequena empresa - Relacións no contorno de traballo - Formación e orientación laboral
	2º Soldadura e caldeirería		- Trazado e conformado en construccións metálicas - Soldadura en atmosfera protexida - Montaxe de construccións metálicas - Calidade en construcións metálicas - Seguridade nas industrias de construcción metálicas - Formación en centros de traballo (desenvólvese nunha empresa)

Avaliación

Os criterios e procedementos de avaliación aplicados polo equipo docente terán en conta a competencia xeral e as capacidades profesionais características do título, que constitúen a referencia para defini-los obxectivos xerais do ciclo formativo e os obxectivos, expresados en termos de capacidades, dos módulos profesionais que o conforman; a valoración do grao de consecución destas capacidades farase tomando como referencia inmediata os criterios de avaliación establecidos para cada módulo. O equipo docente avaliará, así mesmo, a madurez do alumnado en relación coas restantes finalidades da formación profesional específica.
Na avaliación do módulo de formación en centros de traballo (FCT), terase en conta a valoración do responsable ou responsables designados polos correspondentes centros de traballo para o seguimento da formación do alumnado durante a estadía nestes.
As cualificacións expresaranse mediante unha escala numérica do un ó dez, sen decimais. Considéranse positivas as cualificacións iguais ou superiores a cinco. No caso do bloque de formación en centros de traballo a cualificación expresarase como APTO ou NON APTO.

Promoción de ciclo
Os/as alumnos/as poderán realiza-las actividades programadas para un mesmo módulo profesional un máximo de dúas veces. Quen despois da repetición non obtivese avaliación positiva no módulo, ou quen en calquera momento abandone o centro, poderá completa-los módulos profesionais non superados e así concluí-los seus estudios por algúns dos procedementos previstos no artigo 53 da Lei orgánica 1/1990, do 3 de outubro.
Para a realización do módulo de formación en centros de traballo, é necesaria a avaliación positiva en tódolos restantes módulos profesionais que compoñen o ciclo formativo. Sen embargo, un/unha alumno/a cun módulo avaliado negativamente, poderá acceder a FCT se o equipo docente considera que o alumno mostrou, en xeral, un bo rendemento e suficiente maduración. O equipo docente establecerá as oportunas actividades de recuperación do módulo non superado, sendo avaliado no mes de maio. Se o/a alumno/a non superou positivamente o módulo abandonará a empresa non podendo realiza-la FCT ata que teña superado o citado módulo.
Os/as alumnos/as ou os seus representantes legais poderán presentar reclamacións perante o/a director/a do centro contra as cualificacións finais outorgadas, nun prazo de cinco días a partir da súa notificación.

Titulación
A superación dun ciclo formativo requirirá a avaliación positiva en todos e cada un dos módulos profesionais que o compoñen.