Nota importante: Esta versión do Regulamento foi aprobada no curso 2001-02 e na actualidade está sendo revisada para que se adapte ás novas disposicións lexislativas.

REGULAMENTO DE RÉXIME INTERIOR

I. O principio básico é a educación e a formación dos alumnos/as e o desenvolvemento da vida no centro, baseada no respecto dos dereitos e liberdades fundamentais dentro dos principios democráticos, de conciencia e do exercicio da tolerancia e da liberdade.

II. PRINCIPIOS XERAIS
Art.1- A comunidade Escolar está constituída polos alumnos/as, profesores/as, pais/nais ou titores/as dos alumnos/as, persoal laboral da administración e servicios e o representante do Concello no Consello Escolar.
Art.2-Tódolos membros do centro están obrigados a coñecer este regulamento, sen que o seu descoñecemento total ou parcial supoña a exención do seu cumprimento.
Art.3- Á dirección do centro correspóndelle velar polo seu cumprimento, procurando que o conxunto dos membros teña acceso a toda a información que se poida proporcionar. O Claustro e o Consello Escolar velarán para que esto se cumpra.
Art.4- Prohíbense terminantemente os castigos físicos e humillantes, así como calquera manifestación de violencia e coacción física, moral e mental. Igualmente, prohíbense as ameazas e insultos persoais.
Art.5- Este regulamento será aplicado en tódalas actividades escolares e extraescolares do Centro.

III. FUNCIONAMENTO DO CENTRO
Art.6- As entradas e as saídas da clase indicaranse por medio do timbre do Centro, que soará cinco minutos antes como aviso previo á primeira hora de clase e despois do recreo para que non se produza ningún retraso. Entre clase e clase os alumnos/as non poderán entrar nin saír da aula, salvo xustificación, para non interferir na orde académica.
6.1 A duración das clases será de cincuenta minutos; non existirá ningún tipo de descanso entre clase e clase, agás o recreo, que terá unha duración de media hora.
6.2 Esixirase a máxima puntualidade na entrada ás clases tanto ós alumnos/as coma ós/ás profesores/as.
6.3 Os/as alumnos/as, cando cheguen ó Centro á hora de entrada, deberán permanecer dentro do recinto escolar, non podendo quedar en ningún caso na rúa.
6.4 Os/as alumnos/as deberán permanecer dentro do recinto escolar na hora dos recreos e durante todo o período lectivo. Se por unha causa xustificada tivesen que saír, deberán comunicalo á Xefatura de Estudios, cargo directivo de garda ou ó/á titor/a; farase cargo deles unha persoa adulta que se responsabilice, despois de cubri-lo impreso correspondente.
6.5 Os/as alumnos/as asistirán puntualmente á clase. En caso de retraso:
-Os/as alumnos/as de ESO que cheguen tarde deben ser admitidos na clase polo profesor, despois de pedir correctamente permiso para entrar. Se a falta de puntualidade é reiterada, aplicaráselles a sanción e corrección que correspondan.
-Os/as alumnos/as das demais etapas que cheguen tarde poderán entrar na aula se o profesor correspondente llelo permite. Se non lles dá permiso, deberán dirixirse ó/á profesor/a de garda. No caso de que a falta de puntualidade sexa reiterada, aplicaráselle a corrección que corresponda.
6.6 Entre clase e clase os/as alumnos/as non poderán saír da aula, a non ser por causa xustificada.
6.7 Durante os recreos, os alumnos/as non poderán permanecer nas aulas nin nos corredores, agás na biblioteca e, cando o tempo non permita estar fóra, nos corredores da cafetería e secretaría.
6.8 As entradas e saídas das aulas e do edificio faranse ordenadamente.
6.9 Os/as alumnos/as que utilicen o transporte escolar deberán permanecer dentro do recinto escolar ata que non estea aparcado o autobús, momento no que, ordenadamente, deberán dirixirse a el.
6.10 Poderán realizarse agrupamentos flexibles, se os recursos do Centro o permiten. Partirase dunha avaliación inicial e criterios de agrupamento:
-Composición do grupo dentro da aula e interniveis.
-Áreas de aprendizaxe (calquera área do currículo).
-Características individuais dos/as alumnos/as.

IV. DEREITOS DOS/AS ALUMNOS/AS
Art.7- Os/as alumnos/as teñen dereito a recibir unha educación que asegure o pleno desenvolvemento da súa personalidade.
Art.8- Tódolos/as alumnos/as teñen dereito ás mesmas oportunidades de acceso ós distintos niveis de ensino. Nos niveis non obrigatorios non haberá máis limitacións que as derivadas do seu aproveitamento ou das súas aptitudes para o estudio.
Art.9- Os/as alumnos/as teñen dereito a que o seu rendemento sexa avaliado con total obxectividade.
Art.10- Os/as alumnos/as teñen dereito a recibir orientación escolar e profesional para consegui-lo máximo desenvolvemento persoal, social e profesional, segundo as súas capacidades, aspiracións e intereses.
Art.11- Tódolos/as alumnos/as teñen dereito a que a súa actividade académica se desenvolva nas debidas condicións de seguridade e hixiene.
Art.12- Os/as alumnos/as teñen dereito a que se respecte a súa liberdade de conciencia, as súas conviccións relixiosas, morais ou ideolóxicas, así como a súa intimidade no que respecta a tales crenzas ou conviccións.
Art.13- Tódolos/as alumnos/as teñen dereito a que se lles respecte a súa integridade física e moral e a súa dignidade persoal, non podendo ser obxecto, en ningún caso, de tratos vexatorios ou degradantes.
Art.14- O Centro está obrigado a gardar reserva sobre toda a información de que dispoña sobre as circunstancias persoais e familiares do/a alumno/a. Sen embargo, o Centro comunicará ás autoridades competentes as circunstancias que poidan implicar malos tratos para o alumno/a ou calquera outro incumprimento dos deberes establecidos polas leis de protección dos menores.
Art.15- Os/as alumnos/as teñen dereito a participar no funcionamento e na vida do Centro, na actividade escolar e na xestión do mesmo, de acordo co disposto na Lei Orgánica reguladora do Dereito á Educación e nos respectivos Regulamentos Orgánicos.
Art.16- Os/as alumnos/as teñen o dereito de elixir, mediante sufraxio directo e secreto, ós seus representantes no Consello Escolar e os delegados de grupo nos termos establecidos nos correspondentes Regulamentos Orgánicos.
Art.17- As Xuntas de Delegados terán as atribucións, funcións e dereitos que lles determinen os correspondentes Regulamentos Orgánicos.
Art.18- Os delegados non poderán ser sancionados polo exercicio das súas funcións como portavoces dos/as alumnos/as, nos termos da normativa vixente.
Art.19- Os/as alumnos/as teñen dereito a asociarse, creando asociacións, federacións e confederacións de alumnos/as.
Art.20- Os/as alumnos/as poderán asociarse unha vez acabada a súa relación co Centro ó termo da súa escolarización en entidades que reúnan a antigos alumnos/as e colaborar a través delas no desenvolvemento do Centro.
Art.21- Os/as alumnos/as teñen dereito a seren informados polos membros da Xunta de Delegados e polos representantes nas asociacións de alumnos/as sobre as cuestións propias do Centro, así como outras que afecten a outros centros docentes e ó sistema educativo en xeral.
Art.22- Os/as alumnos/as teñen dereito á liberdade de expresión, sen perda dos dereitos de tódolos membros da comunidade educativa, e ó respecto que merecen as institucións de acordo cos principios e dereitos constitucionais.
Art.23- Os/as alumnos/as teñen dereito a manifesta-la súa discrepancia coas decisións educativas que lles afecten.
Art.24- Nos termos previstos no artigo 8 da Lei Orgánica reguladora do Dereito á Educación, os/as alumnos/as poderán reunirse nos seus centros para actividades de carácter escolar ou extraescolar que formen parte do Proxecto Educativo de Centro.
Art.25- Os/as alumnos/as teñen dereito a usa-las instalacións do Centro coas limitacións que se deriven da programación de actividades escolares ou extraescolares e coas precaucións necesarias en relación á seguridade das persoas, a adecuada conservación dos recursos e o seu correcto uso.
Art.26- Os/as alumnos/as teñen dereito a participar, en calidade de voluntarios/as, nas actividades dos centros docentes.
Art.27- Os/as alumnos/as teñen dereito a percibi-las axudas precisas para compensar posibles faltas de tipo familiar, económico e sociocultural, de tal forma que se promova o seu dereito de acceso ós distintos niveis educativos.
Art.28- Nas condicións académicas e económicas que se establezan, os alumnos/as que padezan infortunio familiar terán a protección social oportuna para que esto non determine a imposibilidade de continuar e finaliza-los estudios.
Art.29- Cando non se respecten os dereitos dos/as alumnos/as ou cando calquera membro da comunidade educativa impida o efectivo exercicio de ditos dereitos, o órgano competente do Centro tomará as medidas oportunas que procedan conforme ó disposto na lexislación vixente, previa audiencia dos interesados e consulta, no seu caso, ó Consello Escolar do Centro.

V. DEBERES DOS ALUMNOS
Art.30- Os alumnos teñen tódolos deberes contemplados no Real Decreto 732/1995, do 5 de maio, ademais dos seguintes:
30.1 Asistir puntualmente ás clases co material pertinente para cada materia, participar en tódalas actividades da clase, estudiar e procura-lo máximo rendemento persoal, non interferindo no do grupo.
30.2 Manter sempre un comportamento correcto na aula e en tódalas dependencias do Centro.
30.3 Nos cambios de clase terán a mesma corrección no seu comportamento que durante a clase, tanto se esperan na súa aula ó profesor da materia correspondente como ó profesor de garda, cando sexa o caso.
30.4 Non perturba-la disciplina e o traballo normal das clases.
30.5 Respectar a tódalas persoas, sexan ou non membros da comunidade educativa, evitando ademais calquera actitude de violencia física ou verbal.
30.6 Devolve-los boletíns de notas debidamente asinados polo/a pai/nai ou titores legais na semana lectiva seguinte á súa entrega.
30.7 Xustifica-las faltas de asistencia a clase, mediante documento asinado polos/as pais/nais ou titores legais, ou documento oficial, nos dous días seguintes a producirse a ausencia.
30.8 Esperar nas aulas as instruccións do profesor de garda en caso de que falte o profesor correspondente, non podendo en ningún caso ausentarse do Centro.
30.9 Respectar e cumpri-las normas da biblioteca. Así mesmo, deberán respecta-lo material da biblioteca de aula.
30.10 Respecta-lo material e instalacións e usalos correctamente, tanto no Centro como nos lugares que se visiten en actividades extraescolares. Os desperfectos causados polo uso indebido serán satisfeitos polos responsables. No caso de que non aparecesen os responsables, será todo o grupo ou grupos implicados os que asuman os seus custos.
30.11 Mante-la limpeza nas aulas, nas demais dependencias do Centro e no seu contorno.

VI. DEREITOS DOS PROFESORES
Art.31- Os/as profesores/as teñen tódolos dereitos establecidos na lexislación vixente, ademais daqueles que deste regulamento se deriven.
Art.32- Que se respecte a súa ideoloxía, sempre que non atente contra a convivencia.
Art.33- A utilización das instalacións, mobiliario e material do Centro.
Art.34- A que o Centro, dentro das posibilidades reais, lles achegue medios suficientes para desenvolve-lo seu labor educativo.
Art.35- Organizar e realizar actividades culturais, deportivas e que se fomente no Centro un traballo coordinado e en equipo.
Art.36- Participar activamente na vida escolar e organizativa do Centro.
Art.37- Formular ante os membros da comunidade escolar cantas iniciativas, suxestións e reclamacións estimen oportunas.
Art.38- Participar en actividades e cursos de perfeccionamento, seguindo os requisitos que establece a lexislación vixente.
Art.39- Da-la súa explicación e ser oídos en caso de conflicto cos alumnos/as ou compañeiros/as.
Art.40- Asesora-los seus representantes no Consello Escolar e ser informados puntualmente por estes das resolucións tomadas nas reunións deste órgano.
Art.41- Ser informados de todo o concernente ó funcionamento do Centro.

VII. DEBERES DOS PROFESORES
Art.42- Os/as profesores/as teñen tódolos deberes establecidos na lexislación vixente, ademais daqueles que deste regulamento se deriven.
Art.43- Velar pola convivencia no Centro e colaborar no mantemento da disciplina académica.
Art.44- Manter unha conducta respectuosa e digna cos restantes membros da comunidade educativa.
Art.45- Asistir puntualmente ás clases.
Art.46- Asistir ós actos e reunións regulamentarias ás que fosen convocados.
Art.47- Cooperar e participar na actividade educativa e de orientación, achegando o resultado das súas observacións sobre as condicións intelectuais e persoais dos alumnos/as .
Art.48- Participar nos traballos dos Departamentos didácticos, áreas didácticas e educativas, colaborando cos demais profesores.
Art.49- Recibir individualmente ós/ás alumnos/as, pais/nais ou titores legais dos alumnos/as que o solicitasen, previo acordo na hora e a través do profesor titor.
Art.50- Escoitar ó/á alumno/a nas súas observacións e suxestións.
Art.51- Mostrarlles ós/ás alumnos/as as probas que realizaron unha vez corrixidas e cualificadas, nun prazo razoable e antes de cada avaliación.
Art.52- Comunicar pública e previamente ós/ás alumnos/as os criterios de valoración de cada unha das probas que realice en tódolos seus apartados.
Art.53- Respecta-las normas relativas a sancións e correccións establecidas para as faltas dos/as alumnos/as contra a convivencia do Centro. En ningún caso aplicarán outras que contradigan as establecidas polo Real Decreto 732/95 do 5 de maio e polo presente regulamento.
Art.54- Controlar diariamente as faltas de asistencia dos alumnos/as a cada unha das súas clases en tódolos niveis.
Art.55- Velar para que se manteña a limpeza en todo o recinto escolar.

VIII. PROFESOR/A TITOR/A
Art.56- Cada grupo de alumnos/as estará a cargo dun profesor/a titor/a. As súas funcións son:
56.1 No primeiro mes o titor/a fará unha reunión cos/as pais/nais ou titores legais dos alumnos/as do seu grupo para informalos das normas académicas e de convivencia do Centro.
56.2 Coordinar todo o relativo ó grupo.
56.3 O/a profesor/a dedicará unha hora semanal ós/ás alumnos/as, que figurará no seu horario.
56.4 Notificar ós/ás alumnos/as, pais/nais ou titores dos alumnos/as cantas observacións fosen necesarias.
56.5 Ter unha hora semanal para recibir ós/ás pais/nais ou titores dos/das alumnos/as do seu grupo, que figurará, así mesmo, no seu horario.
56.6 Presidir todas e cada unha das sesións de avaliación do seu grupo.
56.7 Entrega-los boletíns de notas na data sinalada nos calendarios de avaliación. O profesor-titor debe ter tódolos xustificantes dos boletíns asinados polos pais/nais ou titores legais dos/as alumnos/as na seguinte semana lectiva á da entrega.
56.8 Convocar cantas reunións da xunta de avaliación do grupo crea necesarias ou sexan demandadas por calquera profesor/a do grupo, para tratar problemas relativos ós seus alumnos/as.
56.9 Controla-la asistencia ás clases dos/das alumnos/as do seu grupo notificándolles ós/ás pais/nais as súas ausencias puntualmente.
56.10 Facer un informe das faltas sen xustificar nas distintas materias e entregarllo ó/á Xefe/a de Estudios para establece-las medidas correctoras oportunas.
56.11 Explicar no seu grupo as funcións que desempeñarán os delegados antes da súa elección, insistindo na súa importancia.
56.12 Crear unha Comisión de Aula formada polo/a titor/a, delegado/a, subdelegado/a e un/unha alumno/a, co fin de informar e indagar sobre posibles anomalías, desperfectos, actividades, etc.

IX. PROFESOR/A DE GARDA
Art.57- En cada hora lectiva haberá un ou máis profesores/as de garda e ateranse ás seguintes normas:
57.1 As gardas empezarán no momento en que soe o timbre.
57.2 Deberá facerse cargo das clases ou grupos onde falte o/a profesor/a, pasar lista, controla-las faltas de asistencia e permanecer cos/as alumnos/as na aula ou, se o cre conveniente, ir á biblioteca ou á aula de vídeo.
57.3 No caso de haber máis grupos sen profesor/a ca profesores/as de garda, deberá comunicalo ó cargo directivo de garda, que tomará as medidas oportunas.
57.4 Nos recreos e nas horas lectivas, cando o horario xeral o permita, haberá un profesor de garda na biblioteca, que se encargará de mante-la orde nela.
57.5 É o encargado de mante-la normalidade no Centro durante a súa hora de garda, procurando pórse en contacto o antes posible co/coa Xefatura de Estudios no caso de que se produza algún feito que exceda as súas funcións.
57.6 Debe anotar no libro de gardas as ausencias dos/das profesores/as e calquera incidencia que se produza no Centro.
57.7 Percorrerá os corredores para comproba-la normalidade nas aulas e impedir que se formen grupos de alumnos/as durante o período de clases ou entre clase e clase.
57.8 No caso de alumnos/as non admitidos ou expulsados da clase, o/a profesor/a de garda encargarase de mandalos á biblioteca e vixialos.

X. ACTIVIDADES ESCOLARES COMPLEMENTARIAS E EXTRAESCOLARES
Art.58- Para a organización e a realización das actividades escolares complementarias e extraescolares seguiranse as seguintes normas:
58.1 Os/as profesores/as e alumnos/as poderán propoñer conxunta ou separadamente ante a Vicedirección do Centro a constitución de comisións e organizacións con fins especificamente culturais.
58.2 A Dirección do Centro poñerá a disposición destas organizacións e comisións os medios necesarios, dentro das súas posibilidades, e os seus servicios e instalacións. Só poderá a Dirección suspende-las actividades dunha comisión cando esta conculque algún dos preceptos deste regulamento ou as normas dictadas por cada comisión.
58.3 A Dirección, os Departamentos Didácticos, os/as titores/as e os Delegados/as dos alumnos/as poderán propoñer proxectos de actividades complementarias ou extraescolares cun ou máis grupos de alumnos/as.
58.4 Estas actividades consideraranse como parte do traballo académico e, polo tanto, promoverase a participación de todo o alumnado.
58.5 Os/as profesores/as e alumnos/as participantes estarán obrigados a garda-las normas que se dicten para cada actividade extraescolar ou complementaria e, ademais, estarán suxeitos ás normas deste Regulamento.
58.6 A Dirección coidará de que tódolos/as alumnos/as participen ó longo do curso nas actividades e proporcionará as axudas necesarias para eso, sempre que as necesidades do Centro o permitan.
58.7 As actividades complementarias ou extraescolares que se realicen en nome do Centro requiren a autorización expresa da Dirección e a presencia dun profesor responsable e de profesores acompañantes se é necesario.
58.8 Advertirase ós/ás pais/nais ou titores legais, coa debida antelación, dunha viaxe ou visita fóra do Centro, indicándolles a data e o lugar de saída, o itinerario que se vai seguir e os fins que se pretenden, así como as persoas ou profesores encargados de acompañalos. Os/as pais/nais ou titores legais deberán enviar ó Centro unha autorización no impreso oficial debidamente asinado e con antelación suficiente á actividade.
58.9 O/a profesor/a ou profesores/as organizadores dunha actividade deben estar presentes e supervisala durante todo o tempo que dure. En tódalas actividades complementarias ou extraescolares deberá haber alomenos un profesor por cada 20 alumnos/as .
58.10 Procurarase, na medida do posible, planifica-las actividades complementarias e extraescolares de maneira que interrompan o menos posible as tarefas das clases.
58.11 O non especificado neste artigo deberá selo polas normas que se dicten para cada actividade en concreto.

XI. REUNIÓNS
Art.59- Os/as profesores/as e persoal non docente, APA ou APAs poderán celebrar reunións no recinto académico para tratar asuntos relacionados coa súa vida profesional ou coa marcha do Centro, segundo as seguintes normas:
59.1 En cada reunión haberá unhas persoas ou comisión responsable da súa convocatoria ou organización.
59.2 Con suficiente antelación, as persoas ou comisión responsables solicitarán da Dirección o permiso correspondente, tanto para a convocatoria como para a súa celebración, indicando data, lugar e motivo da reunión.
59.3 Se os resultados da reunión afectaran ó Centro, comunicaranse na maior brevidade á dirección.
59.4 No caso de suspensión ou aprazamento, a nova reunión celebrarase conforme ás mesmas normas coma se se tratase da primeira.
59.5 A dirección non poderá negar permiso para reunión, excepto no caso de que non se cumprisen as presentes normas ou algúns dos artigos deste regulamento.
Art.60- Para a celebración de reunións de alumnos/as nas instalacións do Centro, deberán presentar, por medio dos seus representantes legais correspondentes, a orde do día e o lugar da reunión ante a Xefatura de Estudios -sen a súa autorización non se poderán levar a cabo. Posteriormente, comunicarán os resultados habidos se lle afectan á vida do Centro.
XII. PERSOAL DE ADMINISTRACIÓN E SERVICIOS
Art.61- O equipo directivo terá que coordina-las funcións do persoal de servicios para garanti-lo bo funcionamento do Centro.
Art.62- Persoal Subalterno. Depende do/a Director/a do Centro e, por delegación, do/a Secretario/a. Cumprirá o estipulado na lei 4/1988 do 26 de maio, da Función Pública de Galicia (DOG do 1 de xuño de 1988). Desempeñará funcións ordinarias de vixilancia, custodia, reparto de correspondencia e documentación, transporte manual de mobiliario, centraliña e reprografía e outras semellantes.
Art.63- Persoal administrativo. Depende do/a Director/a do Centro e, por delegación, do/a Secretario/a. Cumprirán as funcións encomendadas e regulamentadas pola Lei da Función Pública de Galicia. Proporcionará correcta información referente a matrículas, bolsas, certificacións de estudios e outras que puidesen afectar ós/as alumnos/as para a tramitación de documentos oficiais.
Art.64- Persoal de limpeza. Depende do/a Director/a do Centro e, por delegación, do/a Secretario/a. As súas funcións serán as que teña regulamentadas por lei ou convenio. Limpará coa asiduidade necesaria tódalas dependencias do Centro. Informará das deficiencias que vexa durante o desenvolvemento da súa xornada laboral.

XIII. PAIS/NAIS DE ALUMNOS/AS
Art.65- Os/as pais/nais de alumnos/as terán os seguintes dereitos:
65.1 Serán informados por parte do Centro de todo o referente ó comportamento dos/as seus/súas fillos/as ou tutelados no relativo á vida académica.
65.2 Serán electores ou elixibles no Consello Escolar ou en calquera órgano ou comisión que se constitúa con representación de pais/nais ou titores de alumnos/as.
Art.66- Os/as pais/nais terán os seguintes deberes:
66.1 Segui-lo rendemento escolar e o comportamento no Centro de cada un dos seus fillos.
66.2 Colaborar no mellor funcionamento do Centro mediante suxestións, propostas e participación nas comisións que se constitúan nel.
66.3 Colaborar co/a titor/a e os/as profesores/as dos seus fillos na súa educación e axudar para que respecten as normas de convivencia do Centro.
66.4 Asistir, sempre que sexan convocados, a unha entrevista co/a titor/a ou os/as profesores/as e coa Dirección do Centro para tratar asuntos relacionados coa educación dos seus fillos.

XIV. TIPIFICACIÓN DE FALTAS E CORRECCIÓNS
Art.67- Este Regulamento remítese ó establecido no Título IV do Real Decreto 732/1995 do 5 de maio no que se refire á tipificación de faltas do alumnado, ás súas correccións e ó procedemento para a tramitación dos expedientes disciplinarios. Non obstante, para concretar máis este capítulo, o Centro establece unha serie de normas e procedementos para a corrección de faltas que quedan plasmadas nos seguintes artigos deste Regulamento:

TIPIFICACIÓN DE CONDUCTAS CONTRARIAS ÁS NORMAS DE CONVIVENCIA
Art.68- Considéranse conductas contrarias ás normas de convivencia as seguintes:
a. As faltas inxustificadas de puntualidade.
b. As faltas de asistencia á clase sen xustificar en Bacharelato.
c. A asistencia á clase sen o material escolar necesario.
d. Aquelas conductas que perturben levemente o normal desenvolvemento das clases, impedindo o exercicio do dereito ó estudio dos seus compañeiros e o dereito do/a profesor/a a cumprir co seu deber de impartir clase, así como tamén calquera conducta que perturbe levemente o desenvolvemento doutras actividades do Centro; son consideradas como tales, entre outras, as seguintes conductas:
- Proferir gritos, ruídos, ou causar alboroto durante o desenvolvemento das actividades docentes.
- Te-lo teléfono móbil acendido nas clases.
- Obstaculiza-los accesos ó edificio, aulas, servicios, etc.
- Non respecta-los prazos de entrega de libros na biblioteca.
- Xogar ás cartas, levar a cabo actos violentos ou agresivos, empregar unha linguaxe groseira, sexista e/ou discriminatoria e mostrar xestos e/ou posturas irrespectuosas.
- A falta de atención ás explicacións do/a profesor/a.
- Fumar dentro do recinto escolar os/as alumnos/as de ESO e alumnos de bacharelato menores de 18 anos e fóra dos lugares permitidos os de Bacharelato maiores de 18 anos.
- Falta de hixiene e limpeza persoal.
e. O deterioro non grave, causado intencionadamente nas dependencias do Centro, do material deste ou dos obxectos ou pertenzas doutros membros da comunidade educativa; son consideradas como tal, entre outras, as seguintes conductas:
- Tirar xices, borradores, papeis, desperdicios, latas, etc, ó chan.
- Ensucia-lo chan, paredes, teitos, mesas ou cadeiras.
- Deteriorar levemente materiais e instrumentos didácticos ou deportivos, así como o equipamento do Centro.
- Deteriorar levemente as pertenzas doutros membros da comunidade escolar.
f. Abandono manifesto das tarefas escolares.
g. Calquera conducta que supoña unha falta de respecto ó/á profesor/a ou ós seus compañeiros, tanto dentro das aulas como fóra.
h. Permanecer na rúa, fóra do recinto escolar, unha vez que cheguen ó Centro á 1ª hora.
Art.69- Considéranse conductas gravemente contrarias ás normas de convivencia as seguintes:
a. Calquera falta de asistencia á clase non xustificada na ESO.
b. Abandona-lo recinto escolar durante todo o período lectivo.
c. En Bacharelato, faltas de asistencia á clase inxustificadas e reiteradas nunha mesma materia segundo o número límite que queda fixado como segue:

	Horas semanais da materia		Nº de faltas sen xustificar
	1 h/sem.		2
	2 h/sem.		4
	3 h/sem.		6
	4 h/sem.		8

d. A reiteración de faltas contrarias ás normas de convivencia.
Art.70- Considéranse conductas gravemente prexudiciais para a convivencia no Centro as seguintes:
a. Os actos de indisciplina, inxuria ou ofensa grave contra os membros da comunidade educativa, entre outras:
- Falta de respecto a calquera membro da comunidade educativa.
- As malas contestacións ó profesorado e ó persoal de administración e servicios.
- Insultos a compañeiros/as.
- Boicotear o/a profesor/a.
- Ausencias colectivas sen previa autorización da Xefatura de Estudios.
- Folgas realizadas sen comunicalas á Dirección con 48 horas de antelación.
b. Agresión física contra os demais membros da comunidade educativa, así como o acoso e abuso que coarten a liberdade persoal.
c. Suplantación de personalidade nos actos da vida docente e a falsificación ou roubo de documentos académicos.
d. Causar, por uso indebido, danos graves nos locais, materiais ou documentos do Centro ou nos obxectos que pertenzan a outros membros da comunidade educativa, tales como:
- Roubos ou subtracción dos materiais do Centro e obxectos doutros membros da comunidade educativa.
- A entrada en dependencias do Centro non estando autorizados.
e. O incumprimento das sancións impostas.
f. A reiteración de conductas gravemente contrarias ás normas de convivencia.

SANCIÓNS E CORRECCIÓNS DE FALTAS
Art.71- A efectos da gradación das correccións teranse en conta as contempladas no artigo 45 do Real Decreto 732/1995 do 5 de maio.
Art.72- Unha falta contraria ás normas de convivencia, que non supoña reiteración grave (a 1ª ou 2ª chamada de atención), corrixirase cunha amoestación privada, advertíndolle ó/á alumno/a o que supón a reiteración deste tipo de faltas. Así mesmo, poderáselle impoñe-la realización dun labor específico nunha determinada materia ou dun labor que facilite a aprendizaxe dun comportamento correcto, tal pode se-la reposición en horas non lectivas do deterioro causado, dando conta ó/á titor/a.
Art.73- As Conductas gravemente contrarias ás normas de convivencias do Centro, mencionadas no art. 69 deste Regulamento, e cantas emanen dos deberes dos alumnos/as , serán corrixidas mediante o seguinte procedemento:
a. A 1ª falta grave por conductas reiteradas (despois de dúas chamadas previas de atención) contrarias ás normas de convivencia corrixirase cunha amoestación privada do/a profesor/a, que informará ó/á titor/a do grupo e conxuntamente poderán aplica-las correccións que establece o Real Decreto 732/1995 no seu art. 48 a), b), c), d). Así mesmo, o/a titor/a informará ós/ás pais/nais ou titores legais do/a alumno/a.
b. A 2ª falta grave motivará a comparecencia inmediata do/a alumno/a diante do/a Xefe/a de Estudios e o/a Director/a aplicará ás correccións previstas no art.48 e), f), g), h) do Real Decreto 732/1995. O profesor deberá comunicalo ó/á titor/a e este deberá poñerse en contacto co/ca Xefe/a de Estudios e o/a Director/a. O/a titor/a elaborará un informe sobre a conducta do alumno/a que constará no seu expediente académico e informará inmediatamente ós/ás seus pais/nais ou titores legais. Tamén intervirá a Comisión de Convivencia se o/a Director/a o cre conveniente.
O/a Director/a poderá aplica-la suspensión do dereito de asistencia a determinadas clases, ou de asistencia ó Instituto, por un prazo máximo de tres días. Durante o tempo que dure a suspensión, o alumno/a deberá realiza-los deberes ou traballos que se determinen para evita-la interrupción do seu proceso formativo.
c. A 3ª falta grave constituirá unha conducta gravemente prexudicial para a convivencia no Centro, contemplada no art. 52 do Real Decreto 732/1995.
Art. 74
74.1 As conductas gravemente prexudiciais para a convivencia no Centro contempladas no artigo 70 deste Regulamento serán corrixidas segundo o procedemento que se describe no artigo 53 de dito Real Decreto, sendo necesaria a instrucción dun expediente que consta das seguintes fases:

a. Inicio do expediente, a proposta do/a Director/a ou da Comisión de Convivencia, unha vez recadada a información necesaria, nun prazo non superior ós dez días, desde que se tivo coñecemento dos feitos ou conductas merecedoras de corrección con base a este Regulamento.
b. Nomeamento do instructor, que será un/unha profesor/a do Centro designado polo/a Director/a.
c. Notificación do expediente e do instructor ó/á pai/nai ou titor do alumno/a.
d. Instrucción do expediente (non deberá exceder de sete días).
e. Celebración da audiencia ó/á alumno/a e, se é menor de idade, ós seus pais ou representantes legais, comunicándolle en todo caso as conductas que se lle imputan e as medidas de corrección que se propoñen ó Consello Escolar do Centro.
f. A resolución do procedemento deberá producirse no prazo máximo dun mes dende a súa data de iniciación e contra a resolución do Consello Escolar poderá interpoñerse recurso ordinario ante o Delegado Provincial no prazo dun mes, nos termos previstos nos artigos 114 e seguintes da Lei 30/1992, do 26 de novembro, de Réxime Xurídico das Administracións Públicas e do Procedemento Administrativo Común.
74.2 Excepcionalmente, o/a Director/a, por decisión propia ou a proposta do/a instructor/a, poderá adoptar medidas provisionais, como cambio temporal de grupo ou suspensión do dereito de asistencia a determinadas clases ou ó Centro nun período non superior a cinco días. Estas medidas poderán ser revogadas polo Consello Escolar en calquera momento.
74.3 As correccións impostas prescriben ó final do curso escolar.
Art.75- Os actos contrarios ás normas de convivencia non só serán considerados como tales dentro do recinto escolar, senón tamén os que se produzan fóra do recinto durante as actividades extraescolares e os que estean directamente relacionados coa vida escolar e afecten ós seus compañeiros ou a outros membros da comunidade educativa.
Art.76- Ante calquera desperfecto nas instalación do Centro ou noutras instalacións visitadas en actividades extraescolares a sanción que se imporá será a do pagamento do importe do amaño ou do material cando sexa preciso.

XV. NORMAS DA BIBLIOTECA
Art.77- A biblioteca do Centro deberá cumprir entre as súas funcións fundamentais as dúas seguintes:
a) Ser un lugar adecuado de traballo.
b) Dispor dun servicio eficaz de préstamo de libros.
Como consecuencia do anterior, os/as profesores/as non poderán enviar á biblioteca ós/ás alumnos/as castigados sen recreo.
Art.78- Na biblioteca estará rigorosamente prohibido xogar (xadrez, cartas, etc), beber ou comer, debéndose gardar aínda maior corrección ca noutras dependencias do Centro.
Art.79- Os/as alumnos/as que queiran levar prestado ou devolver un libro teñen que facelo no recreo, tras cubri-la correspondente ficha.
Art.80- O prazo máximo de préstamo para os alumnos/as é de quince días e dous libros de cada vez. Se se entrega un libro fóra de prazo, a primeira vez o alumno/a recibirá unha amoestación, pero a segunda será suspendido do dereito a préstamo durante un trimestre.
Art.81- Se se devolve un libro estragado ou non se devolve, o responsable deberá restituílo.
Art.82- O/a profesor/a da biblioteca será o/a encargado/a de facer cumprir tódalas normas anteriores.
Art.83- Poderase renovar o préstamo por un prazo dunha semana, sempre e cando o/os libro/os non estean entre os moi solicitados.