O Pozo Piagro

O lugar máis fermoso de Toiriz chámase Pozo Piagro. É un lugar afastado do ruído, rodeado de moita vexetación e cheo de maxia.

O Pozo Piagro é un ensanchamento no leito do río Arnego cando pasa polo Fondo da Serra (Toiriz).
Este recuncho está rodeado de moitas árbores como carballos, freixos, salgueiros... e conta cunha gran vista ós montes, que na época da primavera están máis bonitos pola floración dos toxos.

Neste pequeno recuncho o día faise un soño e o anoitecer un longo conto.
Co despertar do sol o Pozo Piagro énchese de vida, os paxaros comezan a cantar, os peixes voltan a ser visibles polo leito do río, o olor das flores revive a nosa mente e pérdese a noción do tempo.
Cando comeza a caer o sol, no río todo é máxico e moi misterioso. As sombras das árbores son máis humanas, o croar dalgunhas ras parece a voz das persoas; o único que non cambia é o inconfundible son do río: un río claro, lento, tranquilo, que reflicte a realidade do revés permitíndonos ver doutra maneira a paisaxe que nos rodea.

O Pozo Piagro é un lugar que existiu sempre, un lugar no que hai moitas cousas sen descubrir.

Unhas das características máis chamativas é que hai unha palabra moi semellante a Piagro que significa pozo profundo no leito dun río. Esta definición pódeselle dar ó Pozo Piagro, un pozo no medio do río. Este pozo é moi profundo, aínda que se intentou medir a súa profundidade non se conseguiu.
Outra característica singular é que hai unha lenda sobre este Pozo. Cóntase que no interior do Piagro hai un buraco que se dirixe ó interior da Terra. Esta lenda cóntana moitos anciáns que aseguran que o buraco existe, xa que ás veces no medio do río prodúcese un remuíño.

Estas antigas lendas fan deste Pozo un recuncho fantástico, cheo de beleza, no que un día se converte nunha hora e onde este mundo cheo de guerras se converte nun mal soño.

Estela Veiga