Na semana do 16 ao 20 tiveron lugar no noso centro as III Xornadas de Orientación vocacional: Xa voltaron as Xornadas de Orientación Vocacional e este 2004 foron as IIIª. O Departamento de Orientación era, unhas semanas antes, todo un rebumbio organizativo, afloraban ideas ou ocorrencias (como diría Ortega y Gasset) por todos os lados: de que falaremos? A quen convidaremos? Ti fai isto, aquel aquilo! Eu a quen presento? Como avisamos aos titores/as? E aos alumnos/as? Onde hai que anotarse? Chamarei á prensa? Vaia revolución...!! Pero ben, pouco a pouco, a cousa foi indo. O programa para este ano era variado e despois de preguntar nas titorías ao alumnado de ESO, Bacharelato e do Ciclo de qué lles gustaría que se lles falara nestas xornadas, decantámonos por: - "información de ciclos medios" e de "Universidade" (os temas de sempre!), que foron os días 19 e 20 de febreiro. - "a cultura empresarial emprendedora" e "o cooperativismo" (temas estrela desta edición!), que se trataron os días 17 e 18. - e unha viaxe - visita "relaxante" polas empresas da Comarca de Deza adicadas ó sector do metal o día 16 de febreiro. Dúas conclusións debemos destacar das xornadas deste ano 2004: por unha banda, que o tempo non chega para nada e os moderadores, cada pouco, tiñan que estar avisando ós tertulianos de que se apresuraran; que os tertulianos, cada vez máis, enrolábanse como "persianas" e que o alumnado había días en que mesmo parecía que se esquecera da "lingua" na casa: nin preguntas nin respostas nin ideas...! E, por outra banda, a gran cantidade de inrformación aceptábel, aproveitábel e moi útil que para o alumnado se lles foi dando nas ponencias; fundamentalmente, naquelas onde xunto ó ponente "teórico" había un ponente "práctico" e se refundía todo nunha realidade empresarial ou formativa desmitificada. Por último, desde o IES Marco do Camballón queremos agradecer a todas aquelas persoas e institucións que participaron nas IIIª Xornadas de Orientación Vocacional e que permitiron que o alumnado percibira a realidade dun xeito non tan academicista. Moitas grazas.