Los del Cid vencen a los de Carrión

desí vinién los de mio Çid a los ifantes de Carrión
e llos ifantes de Carrión a los del Campeador,
cada uno d'ellos mientes tiene al so.
Abraçan los escudos delant los coraçones,
abaxan las lanças abueltas con los pendones,
enclinavan las caras sobre los arzones,
batién los cavallos con los espolones,
tembrar querié la tierra dond eran movedores.
Cada uno d'ellos mientes tiene al so,
todos tres por tres ya juntados son,
cuédanse que essora cadrán muertos los que están aderredor.
Pero Vermúez, el que antes rebtó,
con Ferrán Gonçález de cara se juntó,
firiénse en los escudos sin todo pavor.
Ferrán Gonçález a Pero Vermúez el escúdol' passó,
prísol' en vazío, en carne nol' tomó,
bien en dos logares el astil le quebró.
Firme estido Pero Vermúez, por esso no s'encamó,
un colpe reçibiera, mas otro firió,
quebrantó la bloca del escudo, apart ge la echó,
passógelo todo, que nada nol' valió,
metiól' la lança por los pechos, que nada nol' valió.
Tres dobles de loriga tenié Fernando, aquéstol' prestó,
las dos le desmanchan e la terçera fincó,
el belmez con la camisa e con la guarnizón
de dentro en la carne una mano ge la metió,
por la boca afuera la sángrel' salió,