Que é a avaliación diagnóstica?
É un
proceso de avaliación para a mellora dos centros, que mide o
nivel de desenvolvemento das competencias básicas de cada un
dos alumnos e alumnas escolarizados en 4º de E. Primaria e
2º de ESO. (Excepcionalmente, a correspondente ao curso
pasado, celebrarase o día 21 de outubro) Esta avaliación
realízase a través dun conxunto de probas e cuestionarios de
contexto, comúns para todo o alumnado de Galicia, que serán
aplicadas con criterios estandarizados en todos os centros
sostidos con fondos públicos. Como resultado desta
avaliación, cada centro escolar, o seu profesorado e as
familias do alumnado, e en xeral todo o sistema educativo,
poderá dispoñer dunha información suficientemente obxectiva
sobre a súa situación, que deberá complementar cos seus
propios datos internos, e posibilitará a posta en marcha de
procesos de mellora.
Por que debe facerse esta avaliación?
A Lei Orgánica 2/2006 de 3 de maio, de Educación (LOE), regula
as avaliacións de diagnóstico relativas á E. Primaria e á
ESO: “Ao remate do 2º ciclo de E. Primaria e o 2º curso da
ESO, todos os centros realizarán unha avaliación de
diagnóstico das competencias básicas acadadas polos seus
alumnos”
Por que se fai en 4º de Primaria e en 2º da
ESO?
Porque o carácter diagnóstico e formativo desta
avaliación aconsella situala na metade de cada etapa
obrigatoria de forma que os seus resultados e informacións
poidan ser empregados para detectar problemas, adaptar os
currículos ao proceso de ensino-aprendizaxe de cada centro e
adoptar medidas de apoio a aqueles alumnos que se considere
necesario.
Para que serven estas probas?
Para coñecer o grao
de desenvolvemento das competencias básicas no alumnado e
para que os centros organicen as medidas de reforzo que
requira o seu alumnado. Para que a Administración Educativa
adopte cantas medidas estime oportunas para mellorar o
desenvolvemento das competencias básicas avaliadas e poida
orientar a súa política educativa.
Que se vai a avaliar?
Neste curso avaliaranse as seguintes competencias básicas:
lingüística e matemática.
Avaliarase se o alumnado é quen de
aplicar o que aprenderon na clase para solucionar situacións
e problemas da vida real.
O novo enfoque do ensino por
competencias non lle resta importancia aos coñecementos
(saber), pero é preciso “saber facer” e “querer facer”: as
capacidades dos alumnos desenvólvense cando os coñecementos
adquiridos son empregados para resolver as esixencias de
cada situación.
A quen se vai avaliar e cando?
A avaliación de diagnóstico vai dirixida a todos os
alumnos e alumnas de 4º de E.Primaria e de 2º de ESO no
último trimestre de cada curso.
Excepcionalmente, a correspondente ao pasado curso
celebrarase o mércores, 21 de outubro. As probas pasaranse a
todos os alumnos que cursaron 4º no curso 08/09.
Como se vai a avaliar?
Os actuais titores de
5º aplicarán as probas, elaboradas pola Consellería de
Educación para todos os centros de Galicia, e que están
custodiadas no centro ata o día da proba.
Ao longo da mañá, avaliaranse as dúas
competencias cun descanso entre ambas. Despois do recreo, pasarase
o cuestionario do alumnado e levarán para a casa o
cuestionario das familias, que deberá ser devolto antes do
venres, día 23 de outubro.
A corrección das probas e a carga
de datos na aplicación informática habilitada pola Xunta
serán realizadas por outro profesorado do centro. Para a
valoración global dos resultados teranse en conta as probas
realizadas polo alumnado e o resultados dos cuestionarios de
contexto: alumnos, familias e equipo docente.
Que relación
existe entre esta avaliación diagnóstica e a que realiza
habitualmente o profesorado?
As avaliacións habituais que
fai o profesorado están referidas ao que se está dando na
aula e teñen en conta as características de cada alumno. O
profesorado, tendo en conta todas as informacións coas que
conta pon as cualificacións de cada alumno.
A avaliación de
diagnóstico realízase mediante probas estandarizadas e
deseñadas pola Consellería de Educación e son comúns para
todos os alumnos e alumnas de Galicia. Os resultados da
avaliación de diagnóstico non terán valor académico, é dicir,
non van incidir nas cualificacións nin nas promocións de
ciclo.
Daranse a coñecer os resultados?
A Consellería de
Educación fará público o resultado da avaliación de
diagnóstico de Galicia, detallando a media global da
Comunidade en cada unha das competencias avaliadas, xunto
coa puntuación acadada polo centro así como en relación a
outros centros das mesmas características socioeconómicas e
culturais. Será o centro educativo o que informe ás familias
do resultado destas probas. Como consecuencia da avaliación
diagnóstica, os centros, a través dos seus órganos
colexiados de goberno, realizarán unha reflexión interna
tras a que se establecerán as accións de mellora
pertinentes.
En definitiva, a avaliación diagnóstica
persegue os seguintes obxectivos:
-
Obter información sobre
as competencias curriculares acadadas polo alumnado nas
áreas avaliadas.
-
Analizar os resultados para mellorar a
calidade do ensino.
-
Proporcionar a cada centro información
do rendemento dos seus alumnos e alumnas nas materias
avaliadas.
-
Establecer comparacións ao longo do tempo para
determinar como e en qué dirección se produce a evolución
dos resultados de cada centro.
A Consellería de Educación e O.U. regulou
o desenvolvemento da avaliación diagnóstica en Galicia coa
súa propia normativa e así, na Orde do 16 de febreiro de
2009, recóllese: “A finalidade da avaliación de diagnóstico
é contribuír a determinar o nivel de desenvolvemento das
competencias básicas do alumnado, de cara a promover accións
de mellora do sistema educativo. En consecuencia, a
avaliación diagnóstica será formativa e orientadora para os
centros e informativa para as familias e o conxunto da
comunidade educativa. Así mesmo, carecerá de efectos
académicos”.