O Conservatorio Superior de Música de Vigo existe como centro totalmente independente dende o curso académico 2003/04. En 1956 inaugúrase como institución pública, polo que no curso académico 2005/06 celebra o seu 50 aniversario.
A orixe da afición viguesa pola música sitúase xa no principio do S.XX, cando na cidade desenvolvíase unha programación estable de ópera. Tras a Guerra Civil a actividade musical decaeu bastante, aínda que a Sociedade Filarmónica de Vigo seguiu a traballar para que Vigo contase cunha programación de concertos. Antes da inauguración do noso centro só se podía acceder ao ensino musical nas Escolas Nieto e na propia Sociedade Filarmónica. O Conservatorio de Vigo creouse en 1956 como o segundo centro de Galicia.
O Conservatorio de Música de Vigo foi creado por iniciativa do concelleiro e delegado de cultura Don Manuel Dorda Estrada, sendo alcalde do Exmo. Concello de Vigo, Don Tomás Pérez LLorente. Inaugurado oficialmente o día 26 de outubro de 1956. Estivo situado nun primeiro edificio na rúa Velázquez Moreno, nol nº 57, inmoble propiedade da entón Caixa de Aforros Municipal de Vigo. O seu primeiro director foi Don Jesús Fernández de Yepes Cotte, profesor de piano, e foille concedida validez académica oficial ao centro polo Ministerio de Educación Nacional o 14 de Xuño de 1957 (BOE do 17-7-57).O Conservatorio comezou a súa andaina como centro de ensino de nivel elemental, no que os estudos cursados teñen validez oficial, segundo o plan de estudos musicais aprobado en 1942 polo Ministerio de Educación.