| |
Páxina seguinte
UN NOVO MÉTODO DE EXAMES
O outro día na clase de lingua a profesora comentounos un
novo método para a temida semana dos exames, un método
que ela quixo poñer en práctica, aínda que
os demais profesores non lle deixaron.
Como todos sabemos, temos unha semana "a tope" de exames;
pois este método consiste en que esa semana non haxa clase,
excepto nas horas nas que haxa exames, para que así poidamos
aproveitar o tempo estudiando e preparando o mellor posible a materia
que nos entre. Como sabedes tamén, hai exames que duran máis
dos cincuenta minutos da clase. Este método permitiría
facer exames de dúas horas ou do tempo que se quixese.
A nós parécenos unha boa idea porque, total se temos
un exame a terceira hora, a primeira e a segunda non imos estar
atentos á clase correspondente, senón que, ou imos
estar pensando no exame, ou imos estar estudiando. Así que,
¿que máis lles dá aos profesores? Nós
propoñemos a idea, agora que se vós pensades o mesmo
ca nós, poñeremos en marcha iniciativas para que o
Director o considere. Nós xa puxemos da nosa parte o que
debiamos, é dicir, poñelo no voso coñecemento.
Agora o traballo é voso, decidir o que é mellor ou
peor para nós.
Belén Penas. S4C.
Mª Xosé Varela. S3D.
ÓRNITOS E CANAL CLANDESTINO, NOVOS COLECTIVOS DO CENTRO
No Centro formáronse este curso dous novos colectivos de
alumnos e profes (mesturados, se entende). Un, chamado ÓRNITOS,
pretende investigar as aves da Terra de Melide; xa sabedes, identificalas,
localizalas no seu hábitat, ver en qué estado se atopan,
facerlles niños. O outro, chamado CANAL CLANDESTINO, é
un grupo de vídeo, e está xa rodando a súa
primeira película. Canal Clandestino xa existira hai moitos
cursos para atrás, e as súas montaxes audiovisuais
seica eran dignas de ver, polo paveras que resultaban. Por certo
que, estate atento para colaborar con eles se queren gravarte.
ÓRNITOS e CANAL CLANDESTINO son dous grupos novos, pero hai
outros moitos. Duns e doutros, infórmate na Vicedirección,
ho, que están esperando por ti, porque xa está ben
de pensar que aquí só se vén a aprender a regra
de tres, os logaritmos ou ese rollo da análise sintáctica.
RENOVACIÓN DO NOSO "PARLAMENTO"
Que ninguén se alarme, que estamos a falar das eleccións
ó Consello Escolar, que para o caso é o noso parlamento,
xa que é o que corta o bacallao no instituto. Como hai moito
despistado por aí imos aclarar un pouco as cousas.
A renovación do consello foi parcial, xa que nas eleccións,
que tiveron lugar na última semana de novembro, votamos só
a metade dos representantes de cada sector. Imos por partes.
Os alumnos tiñan que elixir dous representantes e mais cubrir
a vacante que deixara Lebre. Non temos noticia da campaña
feita polos candidatos, pero cremos que non se esmilagraron moito,
anque pillamos algún/a facendo campaña na xornada
de reflexión e coméndolles o tarro ós votantes.
Ó final saíron elixidos Daniel Sánchez, Iván
Fernández Carril e Natalia Rial (para cubrir a vacante).
Os profes votaron catro representantes, e a pesares da contracampaña
feita por algúns, resultaron elixidos Marica Fernández,
Ppe Jiménez (o de Madeira), Eva Álvarez e o anterior
Director, Xulio Pérez.
Do sector de pais e nais saíron Mª Luísa Vázquez
e Mª Jesús Sánchez. O persoal non docente, o
Concello e a Asociación de Empresarios non tiveron que renovar
a ninguén, xa que só teñen un representante,
e renovar medio non sería cuestión.
Rematamos esta crónica cun chamamento ás rapazas e
rapaces da ESO, que non vos presentastes ninguén a candidato
e logo queixádesvos de que os maiores vos mangonean. Ademais
estes novos "deputados" van liscar pronto do insti (ou
deberían) e volveredes quedar sen representantes.
DITO POPULAR (SABIO)
O meu avó ensinoume este dito popular que, á súa
vez, lle ensinara o seu avó. Como se observa, o que se intenta
calcular son os anos de varios seres vivos, en relación dos
uns cos outros. Reparade ben.
3 anos, sebe; (3 anos)
3 sebes, can; (3.3=9 anos)
3 cans, besta; (9.3=27 anos)
3 bestas, home; (27.3=81 anos)
3 homes, corvo; (81.3=243 anos)
3 corvos, pino. (243.3=729 anos)
Lémbrovos que a sebe é un valado feito de pólas,
de xestas e doutros arbustos, e serve normalmente para pechar unha
leira.
Marcos Pampín. B1A.
BÚSCALLE A MORALEXA
Dous amigos quedaran para ir ver o partido de fútbol entre
o Deportivo e a Juventus. Un deles era un rapaz formal e consecuente
cos seus actos, mentres que o outro era todo o contrario. Pois ben,
foron ver o partido e, á volta, un colleu un coche que viña
para Melide e o outro quedou tomando unhas copas na Coruña.
Os dous, durante o partido xa tomaran unha copiñas, pero
non vos vou dicir cál foi o que quedou alí.
Moralexa: Casaron un gato e unha lebre; ¿cál dos dous
se comeu? O que se comeu estaba rico.
Marcos Porto. B1B
|
|
