................... .........................................................................Páxina 4 >>>

COMPARATIVA SOBRE A SITUACIÓN DA LINGUA
O Instituto Galego de Estatística, na Enquisa de Condicións de Vida do ano 2003, proporciona importantes observacións sobre situación actual do noso idioma, que poñen en evidencia a necesidade de políticas efectivas e preocupadas pola recuperación da nosa lingua.
O 42,85% dos residentes en Galiza exprésanse habitualmente só en galego, fronte ao 20% que o fai só en castelán. Nembargantes, na escrita as cousas son diferentes: máis do 46 por cento recoñece non saber escribir en galego.
En canto á muda de lingua, máis do 5% mudaron de lingua, e destes, o 56% fíxoo cara ao galego ou cara a falar "máis galego que castelán" correspondendo a maior porcentaxe a persoas con estudos superiores.
No mundo do ensino, percíbese que o galego non está ben tratado. Nos exames, soamente o 8% utiliza o galego, mentres que o 30% utiliza sempre o castelán. En canto ao idioma de relación cos compañeir@s de aulas, o 23% usa o galego e o 41,9% só usa o castelán.
No ámbito laboral, obsérvase que o galego segue a usarse cos compañeiros de traballo, pero non así para dirixirse aos superiores, o que supón un claro hábito diglósico.
Dende logo, parece claro que o mundo do ensino debe cambiar esta situación, promovendo o uso do galego, tanto na fala coma na escrita, e defendendo sempre a liberdade para elixir a lingua que queremos adoptar coma nosa. Agora ben , non nos ides dicir que o galego non é unha lingua agarimosa e fermosa, con méritos abondo para merecer a vosa elección.