EXERCICIO PARA O ALUMNADO DE 1º DE BACHARELATO
2 December, 2011 por admin
QUEN SON EU
Nota previa: Este é un traballo voluntario para o alumnado de 1º de bacharelato que queira mellorar nota. Os traballos deben ser enviados a este blog antes do venres da semana vindeira (día 9 de decembro).
“Coñécete a ti mesmo” era a frase que, segundo as crónicas, figuraba na entrada do venerado templo de Apolo en Delfos na Grecia clásica. Foi tamén o lema que os filósofos clásicos adoptaron como un dos principios esenciais da sabedoría. Ninguén pode aspirar ao saber (a coñecer o ser das cousas) se non comeza por coñecerse a si mesmo. Pero que ninguén pense que ese é un coñecemento doado. Non o é, senón un dos máis difíciles. Coñecer o meu ser propio é coñecer a miña “identidade”, así que o problema do autocoñecemento é tamén o problema da identidade, e coñecer a miña identidade implica responder á pregunta: ¿quen son eu? Este é o obxecto do traballo que se vos propón e, para realizalo, desta vez non se vos esixirá a lectura de ningún texto específico. Tan só se vos pide que tomedes en consideración as seguintes cuestións previas:
“Eu son un ser humano”. Reflexiona sobre o que implica, para a túa identidade, a condición humana.
“Eu son un adolescente”. Recoñéceste na condición de “adolescente”? Que implicacións ten esta condición para a túa identidade?
“Eu son moza” / “Eu son mozo”. Ata que punto a condición sexual determina a túa identidade? A condición feminina / masculina, en que medida é un “feito biolóxico” e en cal un “feito cultural”? Podes elixir ser “moi home” ou “moi muller” ou ser “menos feminina” ou “menos masculino”? Pódese escapar ao determinismo sexual (isto é, elixir non ser muller / non ser home contra a condición biolóxica recibida no nacemento)? Pódese escapar ao determinismo de xénero (isto é, non aceptar os roles sociais que se atribúen á condición de home ou muller)?
Cres que a túa identidade está xa formada ou máis ben está aínda en formación? Pensas que a formación da identidade é algo no que a túa propia vontade (o que ti queres ser) é o factor decisivo ou, pola contra, son factores externos a ti (o contorno familiar e social, a educación) os que deciden?
En que medida a presión dos teus/túas amigos/as, colegas ou compañeiros/as de clase condicionan as túas eleccións? Cres que ti mesmo/a e, en xeral, os mozos e mozas da túa idade se comportan igual cando estades en grupo que cando estades sós ou en compañía de adultos? Procura un por qué explicativo, sexa cal sexa a túa resposta.
Pensas que as mensaxes dos medios de comunicación de masas (as revistas, a publicidade, a televisión, o cine, os videoxogos) inflúen sobre a construción da identidade dos adolescentes? Cres que a influencia da moda é capaz de modificar os teus hábitos (no vestido, na alimentación, nos gustos, nos costumes) ou considéraste inmune a ela?
Nas imaxes que de seguido poderás ver, observarás figuras de adolescentes ou mozos/as que se consideran que, en diversas épocas e culturas, chegaron a exercer influencia ou mesmo a están a exercer aínda hoxe. Identifícaste con algunha? Trata de explicar, se é o caso, por que te identificas máis con algunha que con outras. Pode ter que ver cos cambios culturais?, pode que a razón sexa a distancia entre distintos ámbitos culturais? Ocórrenseche outras figuras que teñan maior influencia ca estas na mocidade que ti coñeces e coa que ti máis te identificas?
De arriba a abaixo e de esquerda a dereita: Apolo, deus grego, ideal de beleza; Arthur Rimbaud, poeta; Lou Andreas Salomé, intelectual centroeuropea, discípula de Nietzsche e de Freud; James Dean, actor cinematográfico dos anos cincuenta; a mocidade universitaria manifestándose en París durante o maio de 1968; Deborah Harris, cantante do grupo de pop-rock Blondie; Venus Williams, tenista; Cristiano Ronaldo, futbolista.
A partir das consideracións que che teñan suscitado estas cuestións, e outras que ti mesmo/a te podas formular, redacta un texto (cun mínimo de 3.000 e un máximo de 6.000 caracteres) coa túa resposta á pregunta QUEN SON EU?