EXERCICIO PARA O ALUMNADO DE PSICOLOXÍA (2º BACHARELATO)
31 October, 2016 por admin
Un problema psicolóxico
De entre os seguintes problemas debes escoller un:
A. Un alumno ou alumna dun centro de ensino presenta condutas disruptivas, é dicir, condutas que provocan alteracións graves da orde necesaria para impartir clases, incluíndo accións que beirean o delictivo (roubos, agresións).
B. Un mozo ou moza cae nun grave estado de depresión a causa dun desengano de carácter afectivo.
C. Unha empresa pretende mellorar os procedementos de selección de persoal para garantir que os traballadores contratados reúnan as competencias necesarias para as funcións ás que os van destinar.
D. Certas persoas influentes queren impoñer medidas discriminatorias (limitación do acceso ás funcións públicas e da participación na vida política democrática) de certos grupos étnicos, aducindo que presentan diferenzas innatas no desenvolvemento de determinadas capacidades intelectuais.
Unha vez escollido o problema, debes elaborar un procedemento para o estudo do mesmo seguindo un enfoque propio de algunha das escolas filosóficas vistas en clase, que naturalmente deberás identificar.
De seguido, debes establecer a hipótese (ou hipóteses) concreta que pretendes comprobar en relación co problema. Establecida esta, especifica o obxectivo (ou obxectivos) e o procedemento metodolóxico que seguirías para o desenvolvemento do teu estudo.
Obviamente non se trata de que anticipes as conclusións porque estas só poden ser resultado da investigación, mais lembra que unha hipótese é un suposto sobre o que esperas atopar, tanto se ao final da investigación ese suposto acaba sendo confirmado como se é refutado.