ENSAIO MES DE NOVEMBRO
31 October, 2016 por admin
O TEMA do ensaio deste mes garda relación co contido na nova Unidade de traballo, isto é, coa cuestión do COÑECEMENTO e A VERDADE.
COMO PODO ESTAR SEGURO DE QUE ALGO É CERTO?
Para afrontar este problema, propoño que consideredes os diferentes puntos de vista que difunden os medios de comunicación, en particular a televisión. Imaxinade que nos informativos de varias canles de televisión se afirman cousas contraditorias respecto dun mesmo feito que potencialmente vos pode afectar (por exemplo: un medicamento do que nalgunhas canles se di que é moi eficaz mentres noutras se di que é unha fraude; a oferta dun produto bancario que unhas din que permite obter altos intereses con baixo risco mentres outras aseguran o contrario …). É obvio que as afirmacións contraditorias non poden ser igualmente verdadeiras. Que procedemento debo seguir para distinguir o certo do falso?
- É imprescindible recorrer á observación sensorial directa?
- Acaso os sentidos son absolutamente fiables?, nunca nos enganan?
- Que outras facultades (o entendemento, a imaxinación, a memoria …), e de que modo, nos poden axudar a contrastar as informacións sensoriais?
- Hai algún recurso de carácter científico que pode axudar?
- A que testemuñas fiables podes recorrer para saber que canle merece maior credibilidade?
- Hai quen di que como a televisión está dominada polos avisos publicitarios, e estes son sempre manipuladores, é un medio non fiable, é dicir, esencialmente enganoso. Estás de acordo?
- Hai outros medios, distintos da televisión, que merecen maior credibilidade?
- Cres que as informacións que circulan polas redes sociais teñen maior fiabilidade?
- E os medios informativos alternativos na web?
- Que criterio, en definitiva, debes aplicar para poder determinar se algo é certo ou falso? Ou pensas quizais que non existe ningún criterio?
Non é preciso que respondas a todas estas preguntas pois só teñen un carácter orientativo. En calquera caso, lembra as túas respostas deben sempre estar debidamente argumentadas.
O prazo de entrega deste ensaio finaliza o último día do mes de novembro.
(As imaxes son todas de El Roto)