EXERCICIO PARA ALUMNADO DE VALORES ÉTICOS (4º ESO)
24 November, 2016 por admin
DILEMA
NOVAS TECNOLOXÍAS E IDENTIDADES HUMANAS
Posiblemente a ti che custe traballo imaxinarte sen o teu móbil, sen as túas conexións a través das Redes Sociais (whatsapp, facebook, instagram), sen a túa play station e os teus videoxogos. Por esa mesma razón, por que xa non comprendes a túa propia identidade sen asociala cos aparellos proporcionados polas novas tecnoloxías dixitais, seguramente non che será doado revisar criticamente o que supuxo a súa irrupción nas novas xeracións de adolescentes.
Ese é o dilema que che propoño desenvolver: ¿ten mellorado a vida dos mozos e mozas coa influencia nas súas vidas das novas tecnoloxías?, ¿ou ten empeorado?, ¿contribúen a que sexan mellores persoas ou os fan peores?
O que debes facer, logo, nunha exposición dun máximo de catro folios (9.000 caracteres con espazo ou 1.600 palabras) é dar resposta a esta cuestión, analizando dun xeito argumentado que vantaxes e que desavantaxes teñen traído consigo as novas tecnoloxías dixitais.
O prazo para a entrega rematará o venres da semana que vén, día 2 de decembro.