DE VOLTA

E seguimos; si, compañeiros e compañeiras, xa temos preparado o 4º número da nosa revista Camballón.com que, unha vez máis, vén chea de forza e novidades. Levou o seu tempo e esforzo elaborar estas 52 páxinas (aínda que ao mellor hai a quen lle parecen poucas); pero coas colaboracións duns e doutros estamos de novo aquí. E tamén grazas ás axudas económicas do Concello e dos distintos comercios, aos que lle agradecemos inmensamente a súa colaboración.
Aínda que tampouco foi todo un camiño de rosas, xa que os cartos non lle sobran a ninguén, ou iso parece... pois algún non debe ser moi consciente do que custa a cultura...
Como vos dixemos antes, este número ten moitas novidades. Entre elas está unha sección de investigación, “Falando de sexo”, que a máis dun/ha vai deixar coa boca aberta; tamén vos poderedes rir un pouco dalgúns profes coas súas “caricaturas”; informarvos dos “Xogos olímpicos” na antigüidade; saber máis cousas de Víctor Mosqueira; e, para os máis papadores/as, a sección que recomendamos é a de “Cociña internacional”, capaz de abrirlle o apetito a calquera.
Pero aínda hai máis: un capítulo de Orixe de Séchu Sende, novela gañadora do premio Blanco Amor deste ano; noraboa, Séchu; imos correr todos a mercala para que logo nos bote unha firmiña.
Finalmente, como esta publicación non pode ser allea aos feitos de actualidade, tamén nela está o brutal atentado de Madrid, páxina negra na nosa revista e na nosa historia; con fonda amargura dedicámoslle un recuncho de Camballón.com e pedimos o cesamento definitivo de todo tipo de violencia porque, se cadra, mentres ledes isto, está sendo asasinada outra muller máis.
E agora si, toca ler. A que esperades?