Aos membros da Comisión desta revista pareceunos interesante investigar algúns aspectos relacionados coa sexualidade no noso instituto. Para iso, elaboramos dous modelos de enquisa, unha para o alumnado e outra para o profesorado; algunhas preguntas eran comúns e outras, obviamente, distintas. Responderon ao cuestinario 261 alumnos/as e 31 profesores/as, o que vén significar un 65% , aproxidamente, no primeiro caso e un 69% (parece broma...) no segundo. A seguir expoñémosvos os datos que obtivemos.
Para a maioría dos enquisados o sexo ten moita importancia e danlle as puntuacións máis altas: 4 ou 5 nunha escala de 1 a 5. Ademais, os profesores/as consideran que sería preocupante que os adolescentes non lle deramos importancia... como pensan en nós!
Alumnos/as 1. Valora cun número do 1 ao 5 a importancia que ten para ti o sexo:

Profes 6. Cres que os adolescentes lle dan demasiada importancia ao sexo?

A 2ª pregunta da enquisa pedía que se marcasen os sentimentos que nos produce o sexo ou a idea do sexo. Ao alumnado, maioritariamente, parécelle pracenteiro (60,1%), excitante (54%) e tamén nos pon nerviosos (28,3%) e nos crea inseguridade (24,5%). Isto último será pola pouca experiencia, pero supoñemos que iso se cura coa práctica...
Para os profesores/as é saudable (70,9%), necesario (74,1%), excitante (64,5%) e bo (64,5%). Que fogosos son estes “maiores”, estannos a sorprender!
Maioritariamente pensamos que o sexo é moi importante, pero aínda así tamén o preferimos con amor; aquí as porcentaxes falan por si soas: alumnado 63,6%, profesorado 67,7%.
E ata onde chegamos nas nosas relacións sexuais (os alumnos/as, enténdese)? Son moitos/as os que non tiveron ningún contacto (29,5%) ou só fan “manitas” (31,4%); outros chegaron ás caricias íntimas (20,3%) e son os máis vellos os que, en xeral, xa tiveron relacións completas (15,7%). Así, adoitamos manter a primeira relación sexual a partir dos 18 anos e escasamente aos dezasete ou dezaseis. Os profesores/as tamén “pasaron pola pedra” ás mesmas idades ca nós ou aínda parece que se apuraron menos á hora da verdade.
Idade de iniciación do alumnado:

Idade de iniciación do profesorado:


Outra das cuestións era qué métodos anticonceptivos son os máis utilizados e destacan os preservativos (87,8%), aínda que entre o profesorado tamén mostran preferencia polas pastillas anticonceptivas (22%), o DIU ou espiral (19,3%) e os preservativos acadan o 38,7%.
A seguinte pregunta feita ao alumnado pretendía saber cál é o seu grao de información e, para iso, pedía que se respondese se se estaba de acordo ou non coas afirmacións seguintes:

-“A marcha atrás é un método bastante seguro para evitar o embarazo”
-“Usar preservativos é un rollo porque se sente menos”
-“Se se sabe escoller as posturas adecuadas pódese evitar o embarazo”
-“A masturbación débese evitar porque pode provocar problemas de saúde”

En xeral, entre un 70% e un 80% mostran o seu desacordo coas aseveracións anteriores, aínda que un 23,7% confía na “marcha atrás” para evitar o embarazo e tamén hai quen pensa que masturbarse é malo para a saúde: ai, menos mal que non é malo, que senón a algún botaríanselle oitenta anos...
Así e todo, o peor é que non sabemos se estamos ben informados sobre sexualidade ou non (40%), aínda que tamén somos bastantes os que afirmamos que si (47,8%). Menos mal, senón habería que preocuparse. Hai que preocuparse?
En cambio, o profesorado pensa, maioritariamente, que nos falta información (51,6%) e tamén coñecementos (80%).
E a todo isto, onde obtemos a información? Dos amigos/as (65,9%), dos libros (38,6%), na escola (38,3%) e tamén dos nosos pais (31,8%). Aínda bo é que, polo menos algúns, confiamos nos nosos pais e eles escóitannos cando sae o tema da sexualidade.
Mais, a pesar do que se dicía no punto anterior de que se obtiña información na escola, a maioría do alumnado opina que se nos fala moi pouco do tema e, para algúns, os profesores evitan falar de sexualidade na clase:

Pero os profesores/as négano todo e pensan que cando corresponde tratan o tema con naturalidade; algúns tiñan que se ver a si mesmos...

E nós, como reaccionamos nós? Pois parece que a maioría atendemos normalmente (56,3%), aínda que tamén hai quen se ri (15,7%) e a outros/as é o único que lles interesa (17,2%).
A seguinte pregunta, para o profesorado, pedía opinión sobre os alumnos/as que se bican e abrazan polos corredores (xa di o refrán “o que sabe chegar e bicar, non se pode queixar”). Á maioría parécelles natural (51,6%), aínda que tamén un número elevado considéraa unha conduta inapropiada (32,2%). Non será que lles damos envexa...?

Pois despois de todo isto todos estamos de acordo en que a sexualidade é unha parte importante da nosa vida; así e todo, moi sobrados de coñecementos non parece que andemos (ímoslles dar algo de razón aos profes, que “sabe máis o demo por vello ca por demo”) e continuamos crendo que se trata pouco este tema a nivel escolar, de xeito que queremos propoñer que para o que queda de curso e/ou para os vindeiros se organicen encontros e charlas informativas teóricas..., porque prácticas é escusado que as pidamos... A ver se mentres tanto se vai acercando o noso día e, cando chegue, intentaremos aplicar aquilo da cántiga:
“Unha noite no muíño
unha noite non é nada,
unha semaniña enteira
iso si que é muiñada”

Ilustracións de Karlota Salgado e José Manuel Brocos, 4º ESO