Protocolo IP versión 6

De Wiki do Pazo da Mercé

A versión 4 do protocolo IP, que é a utilizada na actualidade, presenta un grave problema: Dada a expansión que tivo Internet, as direccións IP dispoñibles resultan insuficientes para o número de equipos actuais. Cando se deseñou o protocolo IP, pensouse que as direccións de 32 bits serían suficientes, xa que con elas se pode asignar direccións a 2³²=4.294.967.296 máquinas. Hai que ter en conta que ao organizar o espazo de direccións por clases e as direccións reservadas desperdicia millóns de direccións.

E aínda que o protocolo NAT paliou en gran medida este problema de escaseza de direccións, a solución definitiva pasa polo cambio da versión protocolo utilizado a outra versión que utilice direccións mais grandes (e polo tanto permita ter un maior número de direccións distintas): esta versión é o protocolo IP versión 6.

Entre as características mais importantes deste protocolo podemos destacar:

• Utiliza o algoritmo de encamiñamento RIPing.

• Utiliza direccións de 16 bytes (128 bits), co cal se dispón de 2¹²⁸ direccións.

• Permite unha maior velocidade de proceso nos nodos, xa que o formato do paquete só ten 7 campos na cabeceira, en lugar dos 13 da versión 4.

• É bastante compatible coa versión 4 do protocolo (utilizando protocolos de tradución de direccións), polo que os dous protocolos poden coexistir durante a implantación da nova versión.

A forma de representar as direccións IPv6 é diferente á IPv4. Hai varias posibilidades de representación:

• 8 números escritos en hexadecimal de 16 bits (máximo 4 cifras en hexadecimal), separados por “:”
  Exemplo: 456A:48DC:9672:FD5:4E5C:261A:AC4:282C

• Igual que o anterior, pero substituíndo os ceros consecutivos (só unha vez na dirección) por “::”
  Exemplo: 152::AC2:98AD:451F

• Unha notación mixta, con 6 números hexadecimais de 16 bits e 4 números decimais de 8 bits.
  Exemplo: ::124.68.251.128

As direccións IPv6 tamén teñen un campo de prefixo que indica o tipo de dirección (que pode ser IPv4, pública, privada para a rede, de multidifusión, etc.), os bits centrais que indican o número de rede e os bits finais que indican o número de estación.

As máscaras de rede tamén se utilizan en IPv6 de forma idéntica á versión 4.

Para saber máis...

• Páxina principal do goberno de España sobre IPv6